އީރާނުގެ ރޫހާނީ ލީޑަރަށް އިސްރާއީލުން ދިން "މަރުގެ އިންޒާރާ" ގުޅިގެން، އިސްރާއީލަށް ވަރުގަދަ ރައްދެއް އީރާނުން ދީފި

އީރާނުގެ ރޫހާނީ ލީޑަރު މުޖްތަބާ ޚާމަނާއީ އަވަހާރަކޮށްލާނެ ކަމަށް ބުނެ އިސްރާއީލުގެ ޑިފެންސް މިނިސްޓަރު އިސްރާއީލް ކަޓްޒް ދިން "މަރުގެ އިންޒާރާ" ގުޅިގެން، އިޒްރޭލަށް ވަރުގަދަ އަދި ވަގުތުން ރައްދު ދޭނެ ކަމުގެ އިންޒާރު އީރާނުގެ ފޮރިން މިނިސްޓަރު އައްބާސް އަރަގްޗީ ބުދަ ދުވަހު ދެއްވައިފި އެވެ.

އެކްސްގައި ކުރެއްވި ޕޯސްޓެއްގައި އަރަގްޗީ ވިދާޅުވީ، އިސްލާމްއާބާދު އެމްއޯޔޫގެ މާއްދާތަކަކީ އެންމެންނަށް ފެންނަން އޮތް ވަރަށް ސާފު އެއްޗެއް ކަމަށެވެ. އަދި ތެލް އަވީވްގައި ތިބި އެމެރިކާގެ "އޮޅު ޖަނަވާރުތައް" ކޮންޓްރޯލް ކުރުމަށް އެމެރިކާގެ ރައީސް ވައުދުވެވަޑައިގެންފައިވާ ކަމަށާއި، އެމީހުންގެ ސާހިބުމީހާގެ ބަހަށް ނުކިޔަމަންތެރިވެއްޖެ ނަމަ، އީރާނުން އެމީހުންނަށް ފިލާވަޅެއް ދަސްކޮށްދޭނެ ކަމަށް އަރަގްޗީ ވިދާޅުވި އެވެ.

އިސްރާއީލުގެ ޑިފެންސް މިނިސްޓަރު އިސްރާއީލް ކަޓްޒް ވަނީ އީރާނުގެ ރޫހާނީ ލީޑަރު މުޖުތަބާ ޚާމަނާއީ އަކީ "އަވަހާރަކޮށްލަން ޖެހޭ މީހެއްގެ" ގޮތުގައި މާކް ކޮށްފައިވާ ފަރާތެއް ކަމަށް ބުނެފަ އެވެ. 

އޭގެ އިތުރުން އީރާނުގެ ރައްޔިތުންނަކީ މަޝްވަރާތަކުގައި މަންފާ ހޯދަން މަސައްކަތްކުރާ "މޮޅު ވިޔަފާރިވެރިން" ތަކެއްގެ ގޮތުގައި އިސްރާއީލުގެ ޑިފެންސް މިނިސްޓަރު ހޯމަ ދުވަހު ވަނީ ސިފަކޮށްފައި ކަމަށް އިސްރާއީލުގެ މީޑިއާތަކުން ރިޕޯޓްކޮށްފައިވެ އެވެ. މީގެ އިތުރުން، އީރާނުން ނިއުކްލިއާ ހަތިޔާރު އުފެއްދުމަށް އިސްރާއީލުން ފުރުސަތު ނުދޭނެ ކަމަށްވެސް ކަޓްޒް ވަނީ ހާމަ ކޮށްފަ އެވެ.

އީރާނުގެ ރައްޔިތުންނާއި ލީޑަޝިޕަށް އަމާޒުކޮށް ދޭ ކޮންމެ އިންޒާރަކަށް، ވަގުތުން ވަރުގަދަ ރައްދެއް ދޭނެ ކަމަށް ވެސް އަރާގްޗީގެ ރައްދުގައި ވިދާޅުވި އެވެ.

ޑިޕްލޮމެސީގެ މަގު އިޚްތިޔާރު ކުރުމަށް އެމެރިކާއިން މަސައްކަތް ކުރަމުންދިޔަ ނަމަވެސް، "ބޭނުންވެއްޖެ ހިނދެއްގައި" އަލުން އީރާނަށް ހަމަލާދީފާނެ ކަމަށް ވެސް ކަޓްޒް ވަނީ ހާމަކޮށްފަ އެވެ.

2006 ވަނަ އަހަރު ލުބުނާނުގައި ކުރި ހަނގުރާމައިގައި މަރުވި މީހުންގެ ހަނދާނުގައި ބޭއްވި ރަސްމިއްޔާތެއްގައި ވާހަކަ ދައްކަވަމުން ކަޓްޒް ބުނެފައިވަނީ، އިސްވެ ހަމަލާދިނުމުގެ އުސޫލުން ދެ ފަހަރެއްގެ މަތިން އީރާނަށް ހަމަލާދީފައިވާނެ ކަމަށާއި، ބޭނުންވެއްޖެ ނަމަ ތިންވަނަ ފަހަރަށް ވެސް ހަމަލާދޭނެ ކަމަށެވެ.

މީގެ އިތުރުން، އިސްރާއީލު ހިމާޔަތް ކުރުމަށްޓަކައި ލުބުނާނާއި، ސޫރިއާ އަދި ޣައްޒާ ގައި އިޒްރޭލުން ކަނޑައަޅާފައިވާ "ސެކިއުރިޓީ ޒޯން" ތަކުގައި އިޒްރޭލުގެ ސިފައިން މުއްދަތެއް ނެތް ގޮތަށް ތިބޭނެ ކަމަށް ވެސް އޭނާ ބުނެފައި އެވެ.

2026 ވަނަ އަހަރުގެ ފެބްރުއަރީ މަހު، އެމެރިކާ އާއި އިސްރާއީލުން ވަނީ އީރާނުގެ އަސްކަރީ މަރުކަޒުތަކަށާއި އިންފްރާސްޓްރަކްޗާއަށް އަމާޒުކޮށް ހަމަލާތަކެއް ދީފަ އެވެ. އޭގެ ފަހުން މި ކުރިމަތިލުންތައް ބަދަލުވެގެން ދިޔައީ ދެ ގައުމުގެ ދެމެދުގައި ސީދާކޮށް ބަދަލުކުރެވުނު ހަމަލާތަކަކަށެވެ.

މީގެ އިތުރުން، 2025 ވަނަ އަހަރުގެ ޖޫން މަހު އިސްރާއީލުން ވަނީ އީރާނުގެ އެތެރޭގެ އަމާޒުތަކަށް ބޮޑެތި ހަމަލާތަކެއް ދީފަ އެވެ. އިސްރާއީލުން ބުނެފައިވަނީ އެއީ ތެހެރާންގެ ނިއުކްލިއާ ޕްރޮގްރާމާއި މިސައިލް ގާބިލުކަމަށް އަމާޒުކޮށް ދިން ހަމަލާތަކެއް ކަމަށެވެ. ނަމަވެސް އީރާނުން ވަނީ ނިއުކްލިއާ ހަތިޔާރު އުފައްދަން މަސައްކަތް ކުރާ ކަމަށް ބުނާ ވާހަކަތައް ދޮގުކޮށް، އެ ގައުމުގެ ނިއުކްލިއާ ޕްރޮގްރާމަކީ ހަމައެކަނި ސުލްހަވެރި ބޭނުންތަކަށް ކުރިއަށްގެންދާ ޕްރޮގްރާމެއް ކަމަށް ބުނެފަ އެވެ.

ބައިނަލްއަގުވާމީ އެއްވެސް ރިޕޯޓަކުން އީރާނުގެ އަތުގައި ނިއުކްލިއާ ހަތިޔާރު ހުރިކަން މިހާތަނަށް ކަށަވަރުކޮށްދީފައެއް ނުވެ އެވެ.

އެމެރިކާ އާއި އިސްރާއީލުން ތުހުމަތު ކުރާ ގޮތުގައި އީރާނުން ހިންގާ ނިއުކްލިއާ އަދި މިސައިލް ޕްރޮގްރާމްތަކަކީ އިޒްރޭލަށާއި ސަރަހައްދީ އެހެން ބައިވެރިންނަށް އޮތް ނުރައްކަލެކެވެ. ނަމަވެސް ތެހެރާނުން ބުނަމުންދަނީ އެ ގައުމުގެ ނިއުކްލިއާ ޕްރޮގްރާމަކީ ސުލްހަވެރި މަގްސަދުތަކުގައި ހިންގާ ޕްރޮގްރާމެއް ކަމަށާއި، ނިއުކްލިއާ ހަތިޔާރު އުފައްދަން މަސައްކަތް ނުކުރާ ކަމަށެވެ.

ފަލަސްތީނުގެ ބިންތަކުގެ އިތުރުން ލުބުނާނާއި ސޫރިއާގެ ބިންތަކަށް ވެރިވެގަނެގެން އުޅޭ އިސްރާއީލަކީ، މެދުއިރުމަތީގައި ނިއުކްލިއާ ހަތިޔާރު ހުރި ހަމައެކަނި ގައުމު ކަމަށް ބައިނަލްއަގުވާމީ މާހިރުން ގަބޫލުކުރެ އެވެ. ނަމަވެސް އިސްރާއީލުން ރަސްމީކޮށް އެކަމަށް އިއުތިރާފެއް ނުވެ އެވެ. އަދި އިސްރާއީލުގެ ނިއުކްލިއާ މަރުކަޒުތަކަކީ އިންޓަނޭޝަނަލް އެޓޮމިކް އެނާޖީ އެޖެންސީ (އައިއޭއީއޭ) ގެ ބެލުމުގެ ދަށުގައި ހުރި ތަންތަނެއް ނޫނެވެ.