ބޮސް އަކީ ކާކުކަން ނަތަންޔާހޫ އަށް ވަރަށް ރަނގަޅަށް އިނގޭނެ: ޓްރަމްޕް

އިޒްރޭލްގެ ބޮޑު ވަޒީރު ބެންޖަމިން ނަތަންޔާހޫއާ ދެމެދު އޮންނަ ގުޅުން ވަރަށް ރަނގަޅު ކަމަށާއި، ބޮސް އަކީ ކާކުކަން ނަތަންޔާހޫ އަށް ވަރަށް ރަނގަޅަށް އެނގިވަޑައިގަންނަވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ޓްރަމްޕް މިހެން ވިދާޅުވެފައި ވަނީ، ނަތަންޔާހޫ އެމެރިކާ އަށް ކުރައްވަން ހަމަޖެހިފައިވާ ރަސްމީ ދަތުރުފުޅާ ގުޅޭ ގޮތުން އެކްސިއޯސް ނޫހަށް ދެއްވި ޚާއްސަ ބަސްދީގަތުމެއްގައި އެވެ. 

ޓްރަމްޕް ވިދާޅުވި ގޮތުގައި، ނަތަންޔާހޫ އެމެރިކާ އަށް ވަޑައިގަންނަވާނީ ތުރުކީގައި އޮންނަ ނޭޓޯ ސަމިޓަށް ފަހު އެވެ. އެގޮތުން ޖުލައި މަހުގެ ހަތް ވަނަ ދުވަހުން އަށް ވަނަ ދުވަހަށް އޮންނަ ނޭޓޯ ސަމިޓަށް ފަހު، ޓްރަމްޕް އެނބުރި އެމެރިކާ އަށް ވަޑައިގެންނެވުމުން، ނަތަންޔާހޫ އެމެރިކާ އަށް ވަޑައިގަންނަވާނެ އެވެ. 

ޓްރަމްޕް އާއި ނަތަންޔާހޫއާ ދެމެދު އޮތް ގުޅުމަށް އިޝާރާތް ކުރައްވައި ޓްރަމްޕް ވިދާޅުވީ، ދެ ބޭފުޅުންގެ ދެ މެެދުގައި އޮތީ ވަރަށް ބަދަހި ގުޅުމެއް ކަމަށެވެ. އިޒްރޭލް ސަރުކާރުގެ އިސް އޮފިޝަލަކު ވިދާޅުވީ، ނަތަންޔާހޫ އެމެެރިކާ އަށް ވަޑައިގަންނަވާނީ ޖުލައި މަހުގެ ދެ ވަނަ ހަފުތާގެ ތެރޭގައި ކަމަށެވެ. 

މީގެ ކުރިން އިޒްރޭލްގެ ބޮޑު ވަޒީރުގެ އޮފީހުން ބުނެފައި ވަނީ، ނަަތަންޔާހޫ އާއި ޓްރަމްޕް ފޯނުން ގުޅުއްވައި ގިނަ ކަންކަމާ މެދު މަޝްވަރާ ކުރައްވާ ކަމަށާއި، އެމެރިކާގައި ބައްދަލު ކުރެއްވުމަށް ދެ ބޭފުޅުން ވެސް އެއްބަސްވެ ވަޑައިގެންފައިވާ ކަމަށެވެ. 

މިއީ މިއަހަރުގެ ފެބްރުވަރީ މަހުގެ 28 ވަނަ ދުވަހު އެމެރިކާ އާއި އިޒްރޭލް އިން އީރާންއާ ދެކޮޅަށް ހަނގުރާމަ ފެށި ފަހުން، ނަތަންޔާހޫ އެމެރިކާ އަށް ވަޑައިގަންނަވާ ފުރަތަމަ ފަަހަރެވެ. އެންމެ ފަހުން ނަތަންޔާހޫ އެމެރިކާ އަށް ވަޑައިގެންނެވީ ވެސް ފެބްރުވަރީ މަހުގެ ތެރޭގައި އެވެ. އެ ދަތުރުގައި އީރާންއާ ދެކޮޅަށް ހަނގުރާމަ ފެށުމުގެ ޕްލޭނެއް ނަތަންޔާހޫ ހުށަހެޅުއްވި ކަަމށް ރިޕޯޓު ތަކުގައި ބުނެފައިވެ އެވެ.

އަނެއްކޮޅުން މިއީ، 2025 ވަަނަ އަހަރުގެ ޖަނަވަރީ މަހުގެ ތެރޭގައި ޓްރަމްޕް ދެ ވަނަ ދައުރުގެ ހުވާ ކުރެއްވި ފަހުން، ނަތަންޔާހޫ އެމެރިކާ އަށް ވަޑައިގަންނަވާ ހަތް ވަނަ ފަހަރެވެ. ޓްރަމްޕްގެ ދެ ވަނަ ދައުރުގައި އެންމެ ގިނައިން އެމެެރިކާ އަށް ވަޑައިގެންނެވި ލީޑަރަކީ ވެސް ނަތަންޔާހޫ އެވެ.