އީރާނުގެ ލީޑަރު ޚާމަނާއީ އަވަހާރަ ކޮށްލީ އިސްރާއީލުން ކަމަށް އެ ގައުމުން ބުނެފި

އިސްރާއީލު ސުންނާފަތިކޮށްލަން މަސައްކަތްކުރާ އީރާނުގެ ލީޑަރުންނަށް، އެ ގައުމުގެ ޑިފެންސް މިނިސްޓަރު އިސްރާއީލް ކަޓްޒް ހޯމަ ދުވަހު އިންޒާރު ދެއްވަމުން، އަވަހާރަކޮށްލާފައިވާ އީރާނުގެ ރޫހާނީ ލީޑަރު އަލީ ޚާމަނާއީ އަވަހާރަކޮށްލީ އިސްރާއީލުން ކަމަށް އޭނާ ވިދާޅުވެއްޖެ އެވެ.

ކަޓްޒް މިހެން ވިދާޅުވީ، އަވަހާރަކޮށްލާފައިވާ ޚާމަނާއީގެ ޖަނާޒާގެ ކަންކަން އީރާނުގައި ކުރިއަށްދާ ދަނޑިވަޅެއްގަ އެވެ. ތެހެރާންގެ ގްރޭންޑް މުސައްލާ ދީނީ ކޮމްޕްލެކްސްގައި ދެ ދުވަސް ވަންދެން ހަށިކޮޅު ބޭއްވުމަށްފަހު، ގިނަ އަދަދެއްގެ ބަޔަކާއެކު ޚާމަނާއީގެ ހަށިކޮޅު ވެރިރަށް ތެހެރާންގެ ތެރޭގައި އުފުލުމުގެ ކަންކަން މިހާރު ވަނީ ފަށާފަ އެވެ.

އިސްރާއީލު ސުންނާފަތިކުރުމުގެ ރޭވުންތައް ކުރިއަށްގެންދަން މަސައްކަތްކުރާ އީރާނުގެ ކޮންމެ ލީޑަރެއްގެ މަސައްކަތް ނާކާމިޔާބުކޮށްލާނެ ކަމަށް ކަޓްޒް ވިދާޅުވި ކަމަށް، ތަރުޖަމާނަކާ ހަވާލާދީ ސީ.އެން.އެން އިން ރިޕޯޓްކޮށްފައިވެ އެވެ.

ކަޓްޒްއާ ހަވާލާދީ ރިޕޯޓްތައް ބުނާގޮތުގައި، މިހާރު ޖަނާޒާ ކުރިއަށްދާ ޚާމަނާއީ އިސްރާއީލުން ނައްތާލީ، އީރާނާއި އެ ސަރަހައްދުގެ އެހެން ގައުމުތައް މެދުވެރިކޮށް އިސްރާއީލު ސުންނާފަތިކޮށްލުމުގެ ރޭވުންތައް އޭނާ އިސްވެ ހުންނަވާ ރާވައި ހިންގަމުންދާތީ އެވެ.

އެމެރިކާއާއި އިސްރާއީލުން ގުޅިގެން އީރާނަށް ދިން ހަމަލާތަކުގެ ސަބަބުން، އިސްރާއީލުގެ ދެމިއޮތުމަށް ކުރިމަތިވެފައިވާ ނުރައްކާތައް ނައްތާލެވި، އީރާނުގެ އަސްކަރީ ގާބިލުކަމަށް ބޮޑެތި ގެއްލުންތަކެއް ދެވިފައިވާ ކަމަށްވެސް އޭނާ އިތުރަށް ވިދާޅުވި އެވެ.

ޚާމަނާއީއާއި އޭނާގެ އާއިލާގެ ބައެއް މެންބަރުން އަވަހާރަވީ ފެބްރުއަރީ މަހުގެ 28 ވަނަ ދުވަހުއެވެ. އެއީ ހަނގުރާމަ ފެށުމާއެކު އިސްރާއީލާއި އެމެރިކާ ގުޅިގެން އީރާނުގެ އެކި އަމާޒުތަކަށް ދިން ބޮން އެޅުމުގެ ހަމަލާތަކެއްގަ އެވެ.