ތަރުކާރީގެ އަގުތައް 21 އިންސައްތަ މައްޗަށް ހިނގައްޖެ!

ދިވެހިރާއްޖޭގެ ޒަރޫރީ މުދަލުގެ އަގުތަކަށް މަހުން މަހަށް އަންނަ ބަދަލަށް ބަލާއިރު ހުސްވި ޖޫން މަހު ތަރުކާރީގެ އަގުތައް 20 އިންސައްތަ މައްޗަށް ހިނގައްޖެ އެވެ.

މޯލްޑިވްސް ބިއުރޯ އޮފް ސްޓެޓިސްޓިކްސްއިން 8 ޖުލައި 2026 ގައި އާންމުކުރި ތަފާސްހިސާބުތަކުން ދައްކާގޮތުގައި، 2026 ވަނަ އަހަރުގެ ޖޫން މަހު ރާއްޖޭގެ ޒަރޫރީ މުދަލުގެ އަގުތަކުގެ އިންޑެކްސް (އީ.ސީ.ޕީ.އައި) ވަނީ ޖުމްލަކޮށް މައްޗަށް ގޮސްފަ އެވެ.

މާލޭގެ ޖުމްލަ އީ.ސީ.ޕީ.އައި 121.92 ގައި ހުރިއިރު، 2026 ވަނަ އަހަރުގެ މޭ މަހުން ޖޫން މަހަށް އިންފްލޭޝަން ރޭޓް ވަނީ 2.17 އިންސައްތަ އިތުރުވެފަ އެވެ. އަދި 2025 ވަނަ އަހަރުގެ ޖޫން މަހާ އަޅާބަލާއިރު 2026 ވަނަ އަހަރުގެ ޖޫން މަހު އަހަރީ އިންފްލޭޝަން ރޭޓް ހުރީ 8.04 އިންސައްތަ މަތީގަ އެވެ.

ކާބޯތަކެތީގެ ބާވަތްތަކަށް ބަލާއިރު، މަހުން މަހަށް ކާބޯތަކެތީގެ އަގުތައް ވަނީ 2.85 އިންސައްތަ އުފުލިފަ އެވެ. މީގެ ތެރެއިން އެންމެ ބޮޑަށް އަގު އުފުލިފައިވަނީ ތަރުކާރީގެ ބާވަތްތަކުންނެވެ. ތަރުކާރީގެ އަގު 20.86 އިންސައްތަ މައްޗަށް ގޮސްފައިވާއިރު، ކިރާއި، ކިރުގެ އުފެއްދުންތަކުގެ އިތުރުން ބިހުގެ އަގު ވަނީ 1.75 އިންސައްތަ އުފުލިފަ އެވެ.

ކާބޯތަކެތީގެ ބައެއް ބާވަތްތަކުގެ އަގު އުފުލުނު ނަމަވެސް، އެއްގަމު މަހުގެ އަގު 0.98 އިންސައްތަ، މަހުގެ ބާވަތްތަކުގެ އަގު 0.45 އިންސައްތަ އަދި މޭވާގެ އަގު 0.07 އިންސައްތަ ވަނީ ދަށަށް ގޮސްފަ އެވެ.

އަހަރީ ނިސްބަތުން ބަލާއިރު، ކާބޯތަކެތީގެ އަގުތައް ވަނީ 8.60 އިންސައްތަ މައްޗަށް ގޮސްފަ އެވެ. މީގެ ތެރޭގައި އެންމެ ބޮޑަށް އަގު އުފުލިފައިވަނީ ތަރުކާރީ (22.44 އިންސައްތަ)، އެއްގަމު މަސް (21.13 އިންސައްތަ)، ހަކުރާއި، ޖޭމާއި، މާމުޔާއި، ޗޮކްލެޓް އަދި ފޮނިކާތަކެތި (11.36 އިންސައްތަ) އަދި ކިރާއި ބިހުގެ ބާވަތްތަކުން (9.50 އިންސައްތަ) އެވެ. ބުއިންތަކުގެ އަގު 2026 ވަނަ އަހަރުގެ މޭ މަހުން ޖޫން މަހަށް 0.64 އިންސައްތަ އުފުލިފައިވާއިރު، މީގެ ތެރޭގައި ކޮފީގެ ބާވަތްތަކުން 1.85 އިންސައްތަ އަދި ސައިގެ ބާވަތްތަކުން 0.75 އިންސައްތަ އިތުރުވެފައިވެ އެވެ. އަހަރީ ނިސްބަތުން ބަލާއިރު ބުއިންތަކުގެ އަގު 5.49 އިންސައްތަ މަތިވެފައިވާއިރު، ކޮފީގެ ބާވަތްތަކުގެ އަގު ވަނީ 19.83 އިންސައްތަ އުފުލިފަ އެވެ.

ގޭހާއި އަމިއްލަ ސާފުތާހިރުކަމަށް ބޭނުންކުރާ ތަކެތީގެ އަގުތަކަށް ބަލާއިރު، 2026 ވަނަ އަހަރުގެ މޭ މަހާ އަޅާބަލާއިރު ޖޫން މަހު ކައްކާ ގޭހާއި އެހެނިހެން ފިއުލްގެ އަގުތަކަށް ބަދަލެއް އައިސްފައެއް ނުވެ އެވެ. ނަމަވެސް، ހުސްވި އަހަރުގެ ޖޫން މަހާ އަޅާ ބަލާއިރު މި ބާވަތްތަކުގެ އަގު ވަނީ 14.54 އިންސައްތަ އުފުލިފަ އެވެ.

އަމިއްލަ ސާފުތާހިރުކަމަށް ބޭނުންކުރާ ތަކެތީގެ އަގު ޖޫން މަހު 0.17 އިންސައްތަ ދަށަށް ދިޔަ ނަމަވެސް، 2025 ވަނަ އަހަރުގެ ޖޫން މަހާ އަޅާބަލާއިރު މި ބާވަތްތަކުގެ އަގު ވަނީ 3.16 އިންސައްތަ މަތިވެފަ އެވެ.

ޒަރޫރީ މުދަލުގެ އަގުތަކުގެ އިންޑެކްސް (އީ.ސީ.ޕީ.އައި) އަކީ ކާބޯތަކެއްޗާއި، ބުއިންތަކާއި، ތެލާއި، އަމިއްލަ ސާފުތާހިރުކަމަށް ބޭނުންކުރާ ތަކެތި ހިމެނޭހެން 96 ބާވަތެއްގެ މައްޗަށް ބިނާކޮށް، ކޮންމެ މަހަކު 2،549 ބާވަތުގެ މުދަލުން އަގު ނަގައިގެން ތައްޔާރުކުރާ އިންޑެކްސްއެކެވެ. މި އިންޑެކްސްގައި ކާބޯތަކެއްޗަށް 70.94 އިންސައްތަ، ބުއިންތަކަށް 14.20 އިންސައްތަ، އަމިއްލަ ސާފުތާހިރުކަމަށް ބޭނުންކުރާ ތަކެއްޗަށް 8.43 އިންސައްތަ އަދި ގޭހާއި ތެލުގެ ބާވަތްތަކަށް 6.43 އިންސައްތަ ބަރުދަން (ވެއިޓޭޖް) ދީފައިވެ އެވެ. މިއީ ކޮންސިއުމަރ ޕްރައިސް އިންޑެކްސްގެ ބައެއްގެ ގޮތުގައި، މުދަލުގެ އަގުތައް ކޮންޓްރޯލްކުރުމަށާއި އިންފްލޭޝަންގެ ކުރީގެ އިންޒާރުތައް ދެނެގަތުމަށް ބޭނުންކުރާ މުހިންމު ނިޒާމެކެވެ.