ހުސްވި އަހަރު އިންފްލޭޝަން ރޭޓް 4 އިންސައްތަ އަށް ވުރެ މައްޗަށް ދިޔައިރު މާލެ އަށް ވުރެ ބޮޑަށް އަތޮޅުތެރޭގެ އަގުތައް އުފުލުނު
ދުންފަތުގެ ބާވަތްތަކުން ނަގާ ޑިއުޓީ ބޮޑުކުރުމާއި ކާބޯތަކެތީގެ އަގު އުފުލުމާ ގުޅިގެން، 2025 ވަނަ އަހަރު ރާއްޖޭގެ އިންފްލޭޝަން ރޭޓު ވަނީ 4.04 އިންސައްތައަށް މައްޗަށް ގޮސްފައި. އަތޮޅުތަކުގައި ތަކެތީގެ އަގު މާލެއަށްވުރެ ބޮޑަށް އުފުލިފައިވާއިރު، މަސްވެރިކަން ދަށްވުމާއި ބޭރު ފައިސާ ލިބުމުގެ ދަތިކަމަކީ ވެސް އަގުތަކަށް ބަދަލު އައި މައިގަނޑު ސަބަބުތައް.
ދިވެހިރާއްޖޭގެ ފައިސާ ފޮތިތަކެއް އެމެރިކާ ޑޮލަރުގެ ނޫޓުތަކެއްގެ މަތީގައި ބަހައްޓާފައި. | އައިސްޓޮކް
ތަކެތީގެ އަގު ބޮޑުވަމުންދާ ޝަކުވާ އާންމުންގެ ތެރޭގައި އިތުރުވަމުން ދަނިކޮށް، މޯލްޑިވްސް ބިއުރޯ އޮފް ސްޓެޓިސްޓިކްސްއިން އާންމުކުރި 2025 ވަނަ އަހަރުގެ ކޮންސިއުމަރ ޕްރައިސް އިންޑެކްސް (ސީޕީއައި) އިން ރާއްޖޭގެ އިންފްލޭޝަން 4.04 އިންސައްތައަށް އުފުލިފައިވާ ކަމަށް ހާމަ ކޮށްފި އެވެ. އަނެއްކޮޅުން ރެކޯޑުތަކުން ދައްކާގޮތުގައި، 2024 ވަނަ އަހަރު އިންފްލޭޝަން ހުރީ 1.40 އިންސައްތައިގަ އެވެ.
ހުސްވި އަހަރުގެ އިންފްލޭޝަން 4.04 އިންސައްތަ އަށް އުފުލުނުު އިރު ބައެއް ބާވަތްތަކުގެ އަގުތައް ވަރަށް ބޮޑަށް މައްޗަށް ޖެހިފައިވާކަން ވަނީ ފާހަގަ ކުރެވިފަ އެވެ.
ސީޕީއައި އިން ދައްކާ ގޮތުގައި އަގުތަކަށް އެންމެ ބޮޑު ބަދަލެއް އައީ ދުންފަތާއި ސުޕާރީގެ ބާވަތްތަކުންނެވެ. މި ބާވަތްތަކުގެ އަގު 2024 ވަނަ އަހަރާ އަޅާބަލާއިރު 80.63 އިންސައްތަ ވަނީ އުފުލިފަ އެވެ. ބިއުރޯ އޮފް ސްޓެޓިސްޓިކްސް އިން ހާމަކުރާ ގޮތުގައި މި ބޮޑު ބަދަލު އައީ ސިނގިރޭޓުން ނަގާ އިމްޕޯޓް ޑިއުޓީ ބޮޑުކުރުމާއި، 2024 ވަނަ އަހަރުގެ ޑިސެމްބަރު މަހުން ފެށިގެން ވޭޕްކުރާ ތަކެތި ބޭނުންކުރުމާއި، ވިއްކުމާއި އަދި އިޝްތިހާރުކުރުން މަނާކުރުމާ ގުޅިގެން ދުންފަތުގެ ބާވަތްތަކަށް އޮތް ޑިމާންޑަށް އައި ބަދަލުގެ ސަބަބުންނެވެ.
ކާބޯތަކެއްޗާއި ބުއިންތަކުގެ އަގު 2025 ވަނަ އަހަރު ވަނީ 4.70 އިންސައްތަ އުފުލިފަ އެވެ. މީގެ މައިގަނޑު ސަބަބުތަކުގެ ގޮތުގައި ސްޓެޓިސްޓިކްސް ބިއުރޯ އިން ފާހަގަކުރަނީ މުދާ އެތެރެކުރާ ފަރާތްތަކަށް ބޭރު ފައިސާ ލިބުމުގައި ހުރި ދަތިތަކާއި، ބާޒާރުގައި ޑޮލަރުގެ އަގު ހުރި މިންވަރާއި، ރަމަޟާން މަހާ ދިމާކޮށް ތަކެތީގެ ޑިމާންޑް އިތުރުވުމެވެ. ބައެއް ބާވަތްތަކުން، މިސާލަކަށް ފިޔާ ފަދަ ތަކެތިން އަގު ހެޔޮވި ނަމަވެސް، ތަރުކާރީ އާއި ކާޑުގެ ބާވަތްތައް ހިމެނޭހެން ގިނަ ޒަރޫރީ ތަކެތީގެ އަގު ވަނީ އުފުލިފަ އެވެ.
މަހުގެ ބާވަތްތަކުގެ އަގު 2025 ވަނަ އަހަރު 7.56 އިންސައްތަ އުފުލިފައިވާއިރު، އަގު އުފުލުނު ބާވަތްތަކުގެ ތެރޭގައި ކަނޑުމަހުގެ އުފެއްދުންތަކާއި ރިހާކުރު ފަދަ ތަކެތި ހިމެނެއެވެ.
ރާއްޖޭގެ އެކި ސަރަހައްދުތަކުގައި އިންފްލޭޝަން ހުރި މިންވަރު ތަފާތެވެ. މާލޭގައި އިންފްލޭޝަން ރޭޓު 3.49 އިންސައްތައިގައި ހުރިއިރު، އަތޮޅުތަކުގައި މި އަދަދު ހުރީ 4.89 އިންސައްތައިގައެވެ. އަތޮޅުތަކުގައި އިންފްލޭޝަން މަތިވުމުގެ މައިގަނޑު އެއް ސަބަބަކީ ވެސް ދުންފަތުގެ އަގަށް އައި ބަދަލުތަކެވެ.
