ޖެނުއަރީ މަހު މާލޭގައި އަސާސީ މުދަލުގެ އަގު މައްޗަށް ޖެހިއްޖެ
އީސީޕީއައި އިން ހާމަވާ ގޮތުގައި 2025 ވަނަ އަހަރުގެ ޑިސެމްބަރު މަހާ އަޅާބަލާއިރު، މި ނިމުނު ޖެނުއަރީ މަހު އަސާސީ މުދަލުގެ އަގުތައް ވަނީ 0.45 އިންސައްތަ މައްޗަށް ގޮސްފަ.
ފިހާރައެއްގެ ތެރޭގައި ލަކުޑި ފޮށިތަކެއްގައި ތާޒާ މޭވާއާއި ތަރުކާރީ އަތުރާފައި ހުރި މަންޒަރު. | އައިސްޓޮކް
މޯލްޑިވްސް ބިއުރޯ އޮފް ސްޓެޓިސްޓިކްސްއިން އެންމެ ފަހުން އާންމުކުރި "އެސެންޝަލް ކޮމޮޑިޓީސް ޕްރައިސް އިންޑެކްސް" (އީ.ސީ.ޕީ.އައި) އިން ދައްކާގޮތުގައި، ހުސްވި ޖެނުއަރީ މަހު މާލޭގައި ކާބޯތަކެއްޗާއި އަސާސީ މުދަލުގެ އަގުތައް މައްޗަށް ޖެހިއްޖެ އެވެ.
އީސީޕީއައި އިން ހާމަވާ ގޮތުގައި 2025 ވަނަ އަހަރުގެ ޑިސެމްބަރު މަހާ އަޅާބަލާއިރު، މި ނިމުނު ޖެނުއަރީ މަހު އަސާސީ މުދަލުގެ އަގުތައް ވަނީ 0.45 އިންސައްތަ މައްޗަށް ގޮސްފަ އެވެ. ނަމަވެސް، 2025 ވަނަ އަހަރުގެ ޖެނުއަރީ މަހާ އަޅާބަލާއިރު، މިއަހަރުގެ ޖެނުއަރީ މަހު އަގުތައް ވަނީ 0.08 އިންސައްތަ ދަށްވެފަ އެވެ.
ކާބޯތަކެތީގެ އަގުތަކަަށް ބަލާއިރު ޑިސެމްބަރު މަހުން ޖެނުއަރީ މަހަށް ވަނީ 0.49 އިންސައްތަ މައްޗަށް ގޮސްފަ އެވެ. އާންމުކޮށް ގަނެއުޅޭ ބައެއް ތަކެތީގެ އަގު ބޮޑުވެފައިވާއިރު، އޭގެ ތެރޭގައި މޭވާގެ އަގު 2.65 އިންސައްތަ އަދި ކިރާއި ކިރުގެ ބާވަތްތަކުގެ އިތުރުން ބިހުގެ އަގު 1.38 އިންސައްތަ މައްޗަށް ދިޔަކަން ފާހަގަ ކުރެވެ އެވެ. މީގެ އިތުރުން ހަކުރާއި، ފޮނިކާތަކެއްޗާއި، ކައްކާ ތެލުގެ އަގުތައް ވެސް ވަނީ މައްޗަށް ގޮސްފަ އެވެ. ނަމަވެސް، ތަރުކާރީގެ އަގު 3.90 އިންސައްތަ ދަށްވެފައިވެ އެވެ.
ހުސްވި 2025 ވަނަ އަހަރުގެ ޖެނުއަރީ މަހާ އަޅާބަލާއިރު، މިއަހަރުގެ ޖެނުއަރީ މަހު ކާބޯތަކެތީގެ އަގުތައް ވަނީ 0.96 އިންސައްތަ ދަށްވެފަ އެވެ. މިއީ މައިގަނޑު ގޮތެއްގައި ތަރުކާރީގެ އަގު އަހަރު ދުވަހުގެ ތެރޭގައި 14.01 އިންސައްތަ ދަށްވުމުގެ ސަބަބުން އައި ބަދަލެއް ކަމަށް ބެލެ އެވެ. އަދި މޭވާގެ އަގުތައް ވެސް މިދިޔަ އަހަރާ އަޅާބަލާއިރު ވަނީ ކުޑަކޮށް ދަށްވެފަ އެވެ. އަނެއްކޮޅުން ހަކުރާއި ފޮނިކާތަކެތީގެ އަގު އަހަރު ދުވަހުގެ ތެރޭގައި ހަ އިންސައްތައަށްވުރެ ބޮޑުވެފައިވާކަން ފާހަގަ ކުރެވެ އެވެ.
ބުއިންތަކުގެ އަގުތައް ޑިސެމްބަރު މަހާ އަޅާބަލާއިރު ޖެނުއަރީ މަހު ވަނީ 0.44 އިންސައްތަ މައްޗަށް ގޮސްފަ އެވެ. މި ގޮތުން ސައިފަތާއި ކޮފީގެ އަގު ބޮޑުވެފައިވާކަން ފާހަގަ ކުރެވެ އެވެ. އަހަރީ ގޮތުން ބަލާއިރު، ބުއިންތަކުގެ އަގު ވަނީ މިދިޔަ އަހަރުގެ ޖެނުއަރީ މަހާ އަޅާބަލާއިރު 2.44 އިންސައްތަ މައްޗަށް ގޮސްފަ އެވެ.
ކައްކާ ގޭހާއި އެހެނިހެން ތެލުގެ ބާވަތްތަކުގެ އަގު ޑިސެމްބަރު މަހާ އަޅާބަލާއިރު ޖެނުއަރީ މަހު ބަދަލެއް ނައިސް ވަނީ ހިފެހެއްޓިފަ އެވެ. ނަމަވެސް، މުޅި އަހަރަށް ބަލާއިރު ތެލުގެ އަގުތައް ވަނީ އެކެއް އިންސައްތައަށް ވުރެ ބޮޑަށް ދަށްވެފަ އެވެ.
އަމިއްލަ ސާފުތާހިރުކަމަށް ބޭނުންކުރާ ތަކެތީގެ އަގުތައް ވެސް ޖެނުއަރީ މަހު ވަނީ 0.44 އިންސައްތަ މައްޗަށް ގޮސްފަ އެވެ. ކާބޯތަކެއްޗާ ޚިލާފަށް، މި ބާވަތްތަކުގެ އަގުތައް ހުސްވި އަހަރަށް ވުރެ ވަނީ 4.35 އިންސައްތައަށް ބޮޑު ވެފައެވެ.
