ފެބްރުއަރީ މަހު މާލޭގައި ކާބޯތަކެތީގެ އަގުތައް މައްޗަށް ހިނގައްޖެ
މާލޭގެ އަސާސީ މުދަލުގެ އަގުތައް ފެބްރުއަރީ މަހު 1.54 އިންސައްތަ މައްޗަށް ގޮސްފައިވާއިރު، މީގެ މައިގަނޑު ސަބަބަކީ މޭވާ އާއި ތަރުކާރީގެ އަގުތައް އުފުލުމެވެ. ކާބޯތަކެތީގެ އިތުރުން ކައްކާ ގޭހާއި ބުއިންތަކުގެ އަގު ވެސް ވަނީ މި މުއްދަތުގައި އުފުލިފައެވެ. ނަމަވެސް މަހުގެ ބާވަތްތަކާއި އަމިއްލަ ސާފުތާހިރުކަމަށް ބޭނުންކުރާ ތަކެތީގެ އަގުތައް ވަނީ ކޮންމެވެސް މިންވަރަކަށް ދަށަށް ގޮސްފައެވެ.
ޖެނުއަރީ މަހާއި އަޅާބަލާއިރު އެންމެ ބޮޑަށް އަގު އުފުލިފައިވަނީ މޭވާގެ ބާވަތްތަކުން. | ރާއްޖެ އެމްވީ
މޯލްޑިވްސް ބިއުރޯ އޮފް ސްޓެޓިސްޓިކްސްއިން އެންމެ ފަހުން އާންމުކުރި "އެސެންޝަލް ކޮމޮޑިޓީސް ޕްރައިސް އިންޑެކްސް" (އީ.ސީ.ޕީ.އައި) އިން ދައްކާގޮތުގައި، މޭވާ އާއި ތަރުކާރީގެ އަގުތައް އުފުލުމާ ގުޅިގެން ފެބްރުއަރީ މަހު މާލޭގައި ކާބޯތަކެތީގެ އަގުތައް ވަނީ މައްޗަށް ގޮސްފައެވެ.
މާލޭގެ އީ.ސީ.ޕީ.އައި ފެބްރުއަރީ މަހު ހުރީ 116.08 ގައެވެ. މިއީ ޖެނުއަރީ މަހާ އަޅާބަލާއިރު 1.54 އިންސައްތައިގެ އިތުރުވުމެކެވެ. އަދި މިދިޔަ އަހަރުގެ ފެބްރުއަރީ މަހާ އަޅާބަލާއިރު ވެސް މިއަހަރުގެ ފެބްރުއަރީ މަހު އަގުތައް ވަނީ 1.04 އިންސައްތަ މައްޗަށް ގޮސްފައެވެ.
އަގުތައް އުފުލުމުގައި އެންމެ ބޮޑު ދައުރެއް އަދާކުރީ ކާބޯތަކެތީގެ އަގުތަކެވެ. އާންމުކޮށް ބޭނުންކުރާ ގިނަ ބާވަތްތަކެއްގެ އަގު އުފުލުމާ ގުޅިގެން، ކާބޯތަކެތީގެ ކެޓަގަރީން ވަނީ ޖެނުއަރީ މަހާ އަޅާބަލާއިރު 2.06 އިންސައްތައިގެ މަތިވުމެއް ރެކޯޑުކޮށްފައެވެ. މީގެ ތެރެއިން އެންމެ ބޮޑަށް އަގު އުފުލިފައިވަނީ މޭވާގެ ބާވަތްތަކުންނެވެ. އެގޮތުން މޭވާގެ އަގު 9.57 އިންސައްތަ މައްޗަށް ގޮސްފައިވާއިރު، ތަރުކާރީގެ އަގު ވަނީ 3.46 އިންސައްތަ އުފުލިފައެވެ.
ބުއިންތަކުގެ އަގުތަކަށް ބަލާއިރު، ޖެނުއަރީ މަހާ އަޅާބަލާއިރު ފެބްރުއަރީ މަހު ވަނީ 0.15 އިންސައްތަ މައްޗަށް ޖެހިފަ އެވެ. މިއީ މައިގަނޑު ގޮތެއްގައި ކޮފީ އާއި ކޮފީގެ ބަދަލުގައި ބޭނުންކުރާ ބާވަތްތަކުގެ އަގު 0.84 އިންސައްތަ، އަދި މޭވާ އާއި ތަރުކާރީގެ ޖޫހުގެ އަގު 0.56 އިންސައްތަ މައްޗަށް ދިއުމާ ގުޅިގެން އައި ބަދަލެކެވެ.
ކައްކާ ގޭހާއި އެހެނިހެން ފިއުލް ނުވަތަ އިންދަނަުގެ ބާވަތްތަކުގެ އަގު ވެސް ފެބްރުއަރީ މަހު ވަނީ 0.85 އިންސައްތަ މައްޗަށް ގޮސްފައެވެ.
ސާފުތާހިރުކަމަށް ބޭނުންކުރާ ތަކެތި ނުވަތަ ޕާސަނަލް ކެއާ އުފެއްދުންތަކަކީ ފެބްރުއަރީ މަހު އަގު ދަށަށްދިޔަ ހަމައެކަނި މައިގަނޑު ކެޓަގަރީއެވެ. މި ބާވަތްތަކުގެ އަގު ވަނީ ޖެނުއަރީ މަހާ އަޅާބަލާއިރު 0.33 އިންސައްތަ ދަށަށް ގޮސްފައެވެ.
އަހަރުން އަހަރަށް ބަލާއިރު، އަސާސީ މުދަލުގެ އަގުތަކަށް އަންނަ ބަދަލުތައް ހުރީ މެދުމިނެއްގައެވެ. މިދިޔަ އަހަރުގެ ފެބްރުއަރީ މަހާ އަޅާބަލާއިރު ކާބޯތަކެތީގެ އަގު 0.64 އިންސައްތަ މައްޗަށް ގޮސްފައިވާއިރު، ބުއިންތަކުގެ އަގު ވަނީ 2.40 އިންސައްތަ އުފުލިފައެވެ. އަދި ޕާސަނަލް ކެއާ އުފެއްދުންތަކުގެ އަގު ވަނީ އަހަރުން އަހަރަށް ބަލާއިރު 3.28 އިންސައްތަ އިތުރުވެފައެވެ.
ކާބޯތަކެތީގެ ބާވަތްތަކުގެ ތެރެއިން ބައެއް ތަކެތީގެ އަގު މިދިޔަ އަހަރާ އަޅާބަލާއިރު ވަނީ ފާހަގަކޮށްލެވޭ މިންވަރަކަށް އުފުލިފައެވެ. އެގޮތުން ހަކުރު، ޖޭމް، މާމުއި، ޗޮކްލެޓް އަދި ފޮނިކާތަކެތީގެ އަގު 6.94 އިންސައްތަ މައްޗަށް ގޮސްފައިވާއިރު، މޭވާގެ އަގު 4.94 އިންސައްތަ އަދި ތެލުގެ ބާވަތްތަކުގެ އަގު ވަނީ 3.90 އިންސައްތަ އުފުލިފައެވެ.
އީ.ސީ.ޕީ.އައި އިންޑެކްސްއަކީ ކޮންމެ މަހަކު 2،500 އަށްވުރެ ގިނަ ތަންތަނުން 96 ބާވަތެއްގެ މުދަލުގެ އަގު ހޯދައިގެން އެކުލަވާލާ އިންޑެކްސްއެކެވެ. މި އިންޑެކްސްގައި އެންމެ ބޮޑު ބައެއް ހިއްސާކުރަނީ ކާބޯތަކެތީގެ ބާވަތްތަކެވެ. އެއީ މުޅި އިންޑެކްސްގެ 70 އިންސައްތައަށްވުރެ ބޮޑު ބައެކެވެ. އެހެންކަމުން، ކާބޯތަކެތީގެ އަގަށް އަންނަ ކޮންމެ ބަދަލަކީ އަސާސީ މުދަލުގެ އަގުތަކަށް އަންނަ އިންފްލޭޝަނަށް ބޮޑު އަސަރެއް ކުރާނެ ކަމެކެވެ.
