ތަކެތީގެ އަގު ޑިސެމްބަރު މަހު ވެސް ދިޔައީ މައްޗަށް

ހުސްވި އަހަރުގެ ނޮވެމްބަރު މަހާ އަޅާބަލާއިރު ޑިސެމްބަރު މަހު މުދަލާއި ހިދުމަތުގެ އަގުތައް އުފުލިއްޖެ ކަމަށް މޯލްޑިވްސް ބިއުރޯ އޮފް ސްޓެޓިސްޓިކްސް އިން އެންމެ ފަހުން އާންމުކޮށްފައިވާ ކޮންސިއުމަރ ޕްރައިސް އިންޑެކްސް (ސީ.ޕީ.އައި) އިން ހާމަ ވެއްޖެ އެވެ.

ބިއުރޯ އޮފް ސްޓެޓިސްޓިކްސް އިން ބުނީ ޑިސެމްބަރު މަހުގެ އަގުތައް 0.16 އިންސައްތަ އުފުލިފައިވާ ކަމަށެވެ. އަދި 2024 ވަނަ އަހަރުގެ ޑިސެމްބަރު މަހާ އަޅާބަލާއިރު، އަގުތައް 0.41 އިންސައްތަ މައްޗަށް ގޮސްފައިވާ ކަމަށެވެ.

މިދިޔަ މަހު އަގުތައް އެންމެ ބޮޑަށް އުފުލިފައި ވަނީ ކާބޯތަކެއްޗާއި މަހުގެ ބާވަތްތަކުންނެވެ. މި ބާވަތްތަކުގެ އަގުތައް 1.21 އިންސައްތަ ވަނީ މަތިވެފަ އެވެ. މީގެ ތެރެއިން ވެސް ތަރުކާރީ، ކިރުގެ ބާވަތްތައް، ބިސް އަދި ބައެއް ބާވަތްތަކުގެ މަހުގެ ބާވަތްތަކުގެ އަގުތައް އުފުލިފައިވާކަން ފާހަގަ ކޮށްފައިވެއެވެ. ޚާއްޞަކޮށް، މަހުގެ އަގު އެކަނިވެސް މަހުން މަހަށް އައި ބަދަލަށް ބަލާއިރު 1.01 އިންސައްތަ މަތިވެފައިވާއިރު، މިދިޔަ އަހަރުގެ މި މުއްދަތާ އަޅާބަލާއިރު މިއީ ގާތްގަނޑަކަށް 9 އިންސައްތައި ގެ ބޮޑު އިތުރުވުމެކެވެ.

މީގެ އިތުރުން، މުއާސަލާތީ ޚިދުމަތްތަކުގެ އަގުތަކަށް ވެސް ވަނީ 0.95 އިންސައްތައަށް އަގު މައްޗަށް ގޮސްފަ އެވެ. މިއީ މައިގަނޑު ގޮތެއްގައި މޮބައިލް ފޯނުގެ ޚިދުމަތްތަކުގެ އަގަށް އައި ބަދަލެއްކަން ފާހަގަ ކޮށްފައިވެ އެވެ. ނަމަވެސް، މިދިޔަ އަހަރުގެ މި މުއްދަތާ އަޅާބަލާއިރު މި ދާއިރާގެ އަގުތައް ހުރީ ދަށުގައިކަން ފާހަގަ ކުރެވެ އެވެ.