ރިކޯޑު މިންވަރަކަށް މުދަލާއި ޚިދުމަތުގެ އަގުބޮޑުވުން، އެންމެ އަސާސީ ކަންކަމަށް ވެސް ރައްޔިތުން ދަނީ ސަލާންޖަހަމުން

މޯލްޑިވްސް ބިއުރޯ އޮފް ސްޓެޓިސްޓިކްސްއިން އެންމެ ފަހުން އާންމުކުރި ތަފާސްހިސާބުތަކުން ދައްކާ ގޮތުގައި، ދިވެހިރާއްޖޭގެ އިގުތިސޯދީ ހާލަތު މިވަނީ ފަހުގެ ތާރީހެއްގައި ރައްޔިތުންނަށް އުފުލަންޖެހުނު އެންމެ ބޮޑު ތަކްލީފަށް ބަދަލުވެފަ އެވެ. މި ސަރުކާރުން ހުރިހާ ކަމެއް "އޯކޭ" ކަމަށް ދައްކަމުން ދިޔަ ނަމަވެސް ކޮންސިއުމާ ޕްރައިސް އިންޑެކްސްގެ ރިޕޯޓުތަކުން މި ގައުމުގެ ހާލަތު ރަނގަޅަށް ހާމަވެ އެވެ. ރައްޔިތުން ދިރިއުޅެމުންދާ ހަގީގީ ހާލަތު ސާފުވެ، ހާމަވެގެން ދެ އެވެ. އާންމު ރައްޔިތުން ދިރިއުޅުމުގެ އަސާސީ ބޭނުންތައް ފުއްދުމަށް ކުރަންޖެހޭ ހޭދަ އިންތިހާއަށް ބޮޑުވެފައިވާކަން ސާފުވެ އެވެ.

ތަފާސްހިސާބުތަކަށް ބަލާއިރު، މިއަހަރުގެ މާޗު މަހާ އަޅާބަލާއިރު އެޕްރީލް މަހު އެކަނިވެސް މުދަލާއި ހިދުމަތުގެ އަގުތައް ވަނީ 4.18 އިންސައްތަ އުފުލިފަ އެވެ. އަދި ވޭތުވެދިޔަ އަހަރުގެ އެޕްރީލް މަހާ އަޅާބަލާއިރު، އާންމު އިންފްލޭޝަން ރޭޓް ވަނީ 2.9 ޕަސެންޓު މައްޗަށް ގޮސްފަ އެވެ. މިއީ ދިވެހި އާއިލާތަކުން ކޮންމެ ދުވަހަކު ކުރަންޖެހޭ ހަރަދުތަކަށް އައި ބޮޑު ލޮޅުމެކެވެ. މިއީ ފަހުގެ ތާރީހެއްގައި ރާއްޖޭގައި މުދަލާއި ހިދުމަތުގެ އަގު މިހާ ބޮޑުވެގެންދިޔަ ފުރަތަމަ ފަހަރެވެ.

އެޕްރީލް މަހުގެ ތެރޭގައި އެންމެ ބޮޑަށް އަގުތައް އުފުލިފައިވަނީ އިންސާނަކަށް ދިރިއުޅުމަށްޓަކައި ކޮންމެހެން ބޭނުންވާ އަސާސީ ދާއިރާތަކުންނެވެ. އެގޮތުން ބޯހިޔާވަހިކަމާއި، ކަރަންޓާއި، ފެނާއި، ގޭސް ހިމެނޭ ޔުޓިލިޓީސްގެ ދާއިރާއިން އަގުތައް ވަނީ 17.29 ޕަސެންޓު މައްޗަށް ގޮސްފަ އެވެ. މީގެ ތެރެއިން ވެސް ގޭހުގެ އަގު މިދިޔަ އަހަރާ އަޅާބަލާއިރު 22 ޕަސެންޓު ބޮޑުވެފައިވެ އެވެ.

ކާބޯތަކެތީގެ ބާވަތްތަކަށް ބަލާއިރު، އާންމުކޮށް ބޭނުންކުރާ މަހުގެ އަގު 10 ޕަސެންޓު ބޮޑުވެފައިވާއިރު، ކޮފީ ފަދަ ތަކެތީގެ އަގު ވަނީ 18 ޕަސެންޓު މައްޗަށް ގޮސްފަ އެވެ. އެސެންޝަލް ކޮމޯޑިޓީ ޕްރައިސް އިންޑެކްސްއިން ދައްކާ ގޮތުގައި އަސާސީ ބާވަތްތަކުގެ އަގުތައް އެކަނިވެސް ވަނީ 5.77 ޕަސެންޓު ބޮޑުވެފަ އެވެ. މީގެ އިތުރުން، ރާއްޖޭގެ ބާޒާރުގައި ސިމެންތި ބަސްތާއެއްގެ އަގު 300 ރުފިޔާއަށްވުރެ މައްޗަށް ގޮސްފައިވާއިރު، އެޕްރީލް މަހު އެކަނިވެސް ސިމެންތީގެ އަގު ވަނީ 17 ޕަސެންޓު އުފުލިފައެވެ. މިއީ އަމިއްލަ ބޯހިޔާވަހިކަމެއް ބިނާކުރަން މަސައްކަތްކުރާ ރައްޔިތުންނަށް ކުރިމަތިވި ބޮޑު ހުރަހެކެވެ.

އިގުތިސޯދީ މި ތާށިކަމުގެ އެންމެ ބޮޑު ހިތްދަތިކަމެއް ތަހައްމަލުކުރަން ޖެހިފައިވަނީ އަތޮޅުތެރޭގެ ރަށްރަށުގެ ރައްޔިތުންނަށެވެ. މާލެ ސަރަހައްދުގައި އަގުތައް އުފުލުނީ 3.24 ޕަސެންޓުން ކަމަށްވާއިރު، އަތޮޅުތެރޭގެ ރަށްރަށުގައި މުދަލާއި ހިދުމަތުގެ އަގު ވަނީ 5.56 ޕަސެންޓު އުފުލިފަ އެވެ. މީގެ މައިގަނޑު އެއް ސަބަބަކީ ދުނިޔޭގެ ބާޒާރުގައި ތެލުގެ އަގު އުފުލުމާ ގުޅިގެން ރާއްޖޭގެ ދަތުރުފަތުރުގެ ހަރަދު 8 ޕަސެންޓު ބޮޑުވުމެވެ.

ރަށްރަށަށް ބޭނުންވާ ކާބޯތަކެއްޗާއި ސިމެންތި ފަދަ ތަކެތި އުފުލުމުގެ ހަރަދު ބޮޑުވުމުން، ހުރިހާ ރަށެއްގެ ރައްޔިތުން ވެސް ތިބީ އަސާސީ ބޭނުންތަކަށް ސަލާންޖަހަންޖެހޭ ފަދަ ހާލަތެއްގަ އެވެ. ހަމައެއާއެކު، ރާއްޖޭގެ އިގުތިސޯދުގެ މައިބަދަ ކަމަށްވާ ފަތުރުވެރިކަމުގެ ދާއިރާއަށް ވެސް މިކަމުގެ އަސަރު ދަނީ ކުރަމުންނެވެ. ބާޒާރުގައި ޑޮލަރު ތާށިވުމާއި، ތަކެތީގެ އަގު އުފުލުމުގެ ސަބަބުން ވިޔަފާރިތައް ހިންގުމުގެ ހަރަދު ބޮޑުވެ، ސިނާއަތަށް ވަނީ ނުތަނަވަސްކަން ވެރިވެފަ އެވެ.

ސަރުކާރުގެ އިދާރާތަކުން އިގުތިސޯދު ހަމައަކަށް އެޅެމުންދާ ކަމަށް ބުނަމުންދިޔަ ނަމަވެސް، ރަސްމީ ތަފާސްހިސާބުތަކުން ފެންނަން އޮތް ހަގީގަތަކީ ރައްޔިތުންގެ ޖީބަށް ނުކަތާ ވަރަށް ދިރިއުޅުމުގެ ހަރަދުތައް އުފުލި، ކިރިޔާ ފުރާނަ ހިފަހައްޓާލެވޭ ފަދަ ހާލަތަކަށް ކަންކަން ގޮސްފައިވާ ކަމެވެ. އަސާސީ މުދަލާއި ޔުޓިލިޓީސްގެ އަގުތައް ކޮންމެހެން ކޮންޓްރޯލްކުރަން ޖެހިފައިވާއިރު، ރަށްރަށަށް ބޭނުންވާ އަސާސީ ހިދުމަތްތައް ފަސޭހައިން ލިބޭނެ މަގު ފަހިކޮށްދިނުމަށް ސަރުކާރުން ހަރުދަނާ ފިޔަވަޅުތަކެއް އަޅަންޖެހޭކަން މި ސީޕީއައި އިންޑެކްސް އިން އެކަނިވެސް ސާފުކޮށް ހާމަވެއެވެ.

އެންމެ ކުދިކުދި، އެންމެ އަސާސީ ކަންކަމަށް ވެސް ރައްޔިތުން ދަނީ ސަލާންޖަހަމުންނެވެ. ކިތަންމެ ވަރަކަށް ވެސް ރައްޔިތުންގެ އަޑު ކަނޑުވާލުމަށް މަސައްކަތް ކުރެވިދާނެ އެވެ. ރައްޔިތުންގެ ލޮލުގައި އަނދުން އަޅުވައި، އިގްތިސާދު ކުރިއަރައި، ވިޔަފާރިތައް ވެސް ކުރިއަރަމުންދާ ކަމަށް ބުނެވި ދާނެ އެވެ. ނަމަވެސް ހަގީގަތް އޮޅުވާލުމަށް ކިތަންމެ މަސައްކަތެއް ކުރިއަސް، ރައްޔިތުން އުފުލަމުންދާ ތަކުލީފު، އެ ރައްޔިތުންނަކަށް އޮޅުވައެއް ނުލެވޭނެ އެވެ. ރައްޔިތުންގެ ހާލަތު "އޯކޭ" ކަމަށް ބުނެ މޮޅެތި ވާހަކަ ދެއްކުމަކީ ރައްޔިތުން އުޅެމުންދާ ހާލަތަށް މި ސަރުކާރުން ކުރާ މަލާމާތެކެވެ.