މެއި މަހު ރާއްޖޭގެ ޒަރޫރީ މުދަލުގެ އަގުތައް ވަނީ އުފުލިފައި

ދިވެހިރާއްޖޭގެ ތަފާސްހިސާބުތަކާ ބެހޭ ގައުމީ އިދާރާ، މޯލްޑިވްސް ބިއުރޯ އޮފް ސްޓެޓިސްޓިކްސްއިން 2026 ޖޫން 4 ވަނަ ދުވަހު އާންމުކުރި ރަސްމީ ތަފާސްހިސާބުތަކަށް ބަލާއިރު، 2026 ވަނަ އަހަރުގެ މެއި މަހު ރާއްޖޭގެ ޒަރޫރީ މުދަލުގެ އަގުތައް ވަނީ އުފުލިފައެވެ.

މިއާއެކު 2026 ވަނަ އަހަރުގެ އޭޕްރީލް މަހާ އަޅާބަލާއިރު މެއި މަހު މުދަލުގެ އަގުތައް ނުވަތަ އިންފްލޭޝަން ރޭޓް ވަނީ 1.14 އިންސައްތަ އިތުރުވެފައެވެ. އަދި 2025 ވަނަ އަހަރުގެ މެއި މަހާ އަޅާބަލާއިރު 2026 ވަނަ އަހަރުގެ މެއި މަހު އަހަރީ އިންފްލޭޝަން ރޭޓް ވަނީ 6.35 އިންސައްތަ މައްޗަށް ގޮސްފައެވެ.

ކާބޯތަކެތީގެ ބާވަތްތަކުގެ އަގުތަކަށް ބަލާއިރު، ކާބޯތަކެތީގެ އަގު ވަނީ 1.59 އިންސައްތަ އުފުލިފައެވެ. މިއީ މައިގަނޑު ގޮތެއްގައި އެއްގަމު މަހުގެ އަގު 6.68 އިންސައްތަ އަދި ތަރުކާރީގެ އަގު 3.09 އިންސައްތަ މައްޗަށް ދިއުމާ ގުޅިގެން އައި ބަދަލެކެވެ. ނަމަވެސް ކައްކާ ތެލާއި ސަރުބީގެ ބާވަތްތަކުގެ އަގު 0.40 އިންސައްތަ އަދި ހަކުރާއި، ޖޭމާއި، މާމުޔާއި، ޗޮކްލެޓް ފަދަ ފޮނިކާތަކެތީގެ އަގު ވަނީ 0.35 އިންސައްތަ ދަށަށް ގޮސްފައެވެ.

އަހަރީ ނިސްބަތުން ބަލާއިރު ކާބޯތަކެތީގެ އަގު ވަނީ 6.37 އިންސައްތަ އުފުލިފައެވެ. މީގެ ތެރެއިން އެންމެ ބޮޑަށް އަގު އުފުލިފައިވަނީ އެއްގަމު މަހުން (22.61 އިންސައްތަ)، ހަކުރާއި ފޮނިކާތަކެތިން (10.41 އިންސައްތަ)، ކިރާއި ކިރުގެ ބާވަތްތަކުން (8.48 އިންސައްތަ) އަދި ކައްކާ ތެލާއި ސަރުބީގެ ބާވަތްތަކުން (8.10 އިންސައްތަ) އެވެ. ބުއިންތަކުގެ އަގު މަހުން މަހަށް 0.06 އިންސައްތަ މައްޗަށް ގޮސްފައިވާއިރު، މީގެ ތެރޭގައި ކޮފީގެ ބާވަތްތަކުގެ އަގު 0.92 އިންސައްތަ އުފުލި، މޭވާ އާއި ތަރުކާރީ ޖޫހުގެ އަގު ވަނީ 0.86 އިންސައްތަ ދަށަށް ގޮސްފައެވެ. އަހަރީ ގޮތުން ބަލާއިރު ބުއިންތަކުގެ އަގު 5.08 އިންސައްތަ މައްޗަށް ގޮސްފައިވަނީ ކޮފީގެ ބާވަތްތަކުގެ އަގު 18.58 އިންސައްތަ އަދި ސައިގެ ބާވަތްތަކުގެ އަގު 4.59 އިންސައްތަ އުފުލުމާ ގުޅިގެންނެވެ.

ކައްކާ ގޭހާއި އެހެނިހެން ފިއުލް ނުވަތަ އިންދަނަުގެ ބާވަތްތަކުގެ އަގަށް 2026 ވަނަ އަހަރުގެ އޭޕްރީލް މަހާ އަޅާބަލާއިރު މެއި މަހު އެއްވެސް ބަދަލެއް އައިސްފައެއް ނުވެއެވެ. ނަމަވެސް ވޭތުވެދިޔަ އަހަރާ އަޅާބަލާއިރު މި ބާވަތްތަކުގެ އަގު ވަނީ 14.54 އިންސައްތަ އުފުލިފައެވެ. މީގެ އިތުރުން، އަމިއްލަ ސާފުތާހިރުކަމަށް ބޭނުންކުރާ ތަކެތީގެ އަގު މަހުން މަހަށް 0.17 އިންސައްތަ ދަށަށް ދިޔަ ނަމަވެސް، އަހަރީ ނިސްބަތުން ބަލާއިރު މިފަދަ ތަކެތީގެ އަގު ވަނީ 3.10 އިންސައްތަ މައްޗަށް ގޮސްފައެވެ.