އަސާސީ ތަކެތީގެ އަގުތައް ޑިސެމްބަރު މަހު ވެސް މައްޗަށް ޖެހިއްޖެ

2025 ވަނަ އަހަރުގެ ނޮވެމްބަރު މަހާ އަޅާބަލާއިރު ޑިސެމްބަރު މަހު މާލޭގައި އާންމުކޮށް ބޭނުންކުރާ އަސާސީ މުދަލުގެ އަގުތައް އުފުލިއްޖެ އެވެ.

އެގޮތުން، އަސާސީ މުދަލުގެ އަގުތައް ހުންނަ ނިސްބަތް ދައްކައިދޭ "އެސެންޝަލް ކޮމޯޑިޓީސް ޕްރައިސް އިންޑެކްސް" (އީ.ސީ.ޕީ.އައި) ވަނީ 0.51 އިންސައްތަ އަށް މައްޗަށް ގޮސްފަ އެވެ.

މޯލްޑިވްސް ބިއުރޯ އޮފް ސްޓެޓިސްޓިކްސްއިން އެންމެ ފަހުން އާންމުކުރި ތަފާސްހިސާބުތަކަށް ބަލާއިރު، 2024 ވަނަ އަހަރުގެ ޑިސެމްބަރު މަހާ އަޅާބަލާއިރު ހުސްވި ޑިސެމްބަރު މަހު މުދަލުގެ އަގުތައް ވަނީ 0.95 އިންސައްތަ މައްޗަށް ގޮސްފަ އެވެ. 

ވަކިވަކި ދާއިރާތަކަށް ބަލާއިރު ފާހަގަ ކުރެވޭ ގޮތުގައި ކާބޯތަކެތީގެ އަގުތައް 0.68 އިންސައްތަ އަށް ވަނީ މައްޗަށް ގޮސްފަ އެވެ. ކާބޯތަކެތީގެ ބާވަތްތަކުގެ ތެރެއިން ތަރުކާރީގެ އަގުތައް 5.05 އިންސައްތަ އުފުލިފައިވާއިރު، ކިރާއި، ބިހާއި، ކިރުގެ އުފެއްދުންތަކުގެ އަގު ވަނީ 1.12 އިންސައްތަ މައްޗަށް ގޮސްފައެވެ. މީގެ އިތުރުން ހަކުރާއި، ޖޭމާއި މާމުއި އަދި ޗޮކްލެޓް ފަދަ ބާވަތްތަކުގެ އަގު 1.07 އިންސައްތަ ވަނީ އުފުލިފަ އެވެ. 

އަހަރީ ގޮތުން ބަލާއިރު، ޑިސެމްބަރު މަހު ކާބޯތަކެތީގެ އަގު ވަނީ ކުރީ އަހަރާ އަޅާބަލާއިރު 0.43 އިންސައްތަ އިތުރުވެފަ އެވެ. އަހަރުން އަހަރަށް ބަލާއިރު އެންމެ ބޮޑަށް މައްޗަށް ޖެހިފައިވަނީ ހަކުރާއި ފޮނިކާތަކެތީގެ ބާވަތްތަކާއި، ތެލާއި ފެޓްސްގެ ބާވަތްތަކުންނެވެ. 

ސާފުތާހިރުވުމަށް ބޭނުންކުރާ ތަކެތީގެ އަގު މަހުން މަހަށް ބަލާއިރު 0.39 އިންސައްތަ އުފުލިފައިވާއިރު، އަހަރުން އަހަރަށް ބަލާއިރު މި ބާވަތްތަކުގެ އަގު ވަނީ 4.48 އިންސައްތަ މައްޗަށް ގޮސްފަ އެވެ. މިއީ އަހަރުން އަހަރަށް ބަލާއިރު އަގު އެންމެ ބޮޑަށް އުފުލުނު ބާވަތެވެ. ކޮފީ އާއި ސައިގެ ބާވަތްތަކުގެ އަގުތައް ވެސް ކުރީ އަހަރުގެ މި މުއްދަތާ އަޅާބަލާއިރު މައްޗަށް ގޮސްފައިވާ އިރު ލުއި ބުއިންތަކުގެ އަގު ހުސްވި އަހަރާ އަޅާ ބަލާއިރު މިއަހަރުގެ ޑިސެމްބަރު މަހު 2.45 އިންސައްތަ މައްޗަށް ގޮސްފައެވެ.