ތެލުގެ އަގު ހަ އިންސައްތަ އަށް އުފުލިއްޖެ

އީރާނާއެކު ގާއިމުކޮށްފައިވާ ހަމަލާބަދަލުކުރުން ހުއްޓާލުމުގެ އެއްބަސްވުން "ނިމުމަކަށް އަތުވެއްޖެ" ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެން، ތެލުގެ އަގު ހަ އިންސައްތައަށް އުފުލިއްޖެ އެވެ.

އެމެރިކާ އާއި އީރާނާ ދެމެދު ރޭގެ ވަގުތެއްގައި ހަމަލާތަކެއް ބަދަލުކުރުމާ ގުޅިގެން، ދެ ގައުމުގެ ދެމެދުގައި އޮތް ހަމަލާބަދަލުކުރުން ހުއްޓާލުމުގެ އެއްބަސްވުމުގެ ބިންގާ ކަމަށްވާ ފަހުމުނާމާ މިހާރު ބާތިލުވެފައިވާ ކަމަށް ރައީސް ޓްރަމްޕް ވިދާޅުވުމާއެކު، ދުނިޔޭގެ ބާޒާރުގައި ތެލުގެ އަގު އުފުލި، ހިއްސާގެ ބާޒާރު ވަނީ ދަށަށް ގޮސްފަ އެވެ.

ރައީސް ޓްރަމްޕް މި މޭރުމުން ވާހަކަފުޅު ދެއްކެވީ ތުރުކީގެ އަންކާރާގައި މިހާރު ކުރިއަށްދާ ނޭޓޯގެ ސަމިޓުގައި ވާހަކަފުޅު ދައްކަވަމުންނެވެ.

މި ކުރިއެރުންތަކާއެކު ބްރެންޓް ކްރޫޑް ތެޔޮ ފީފާއެއްގެ އަގު ހަ އިންސައްތަ އުފުލި 78 ޑޮލަރަށް އަރާފައިވާއިރު، ޔޫރަޕްގެ ހިއްސާގެ ބާޒާރު ވަނީ އެއް ދުވަސް ތެރޭގައި 1.6 އިންސައްތަ ދަށަށް ގޮސްފަ އެވެ. މީގެ އިތުރުން، އިންފްލޭޝަން ނުވަތަ ތަކެތީގެ އަގު އުފުލުމުގެ ބިރު ބޮޑުވުމާ ގުޅިގެން އިންވެސްޓަރުން ސަމާލުވެފައިވާ ދަނޑިވަޅެއްގައި، އެމެރިކާ ޑޮލަރުގެ އަގު މައްޗަށް ގޮސް، ސަރުކާރުގެ ބޮންޑުތަކުން ލިބޭ މަންފާ ވަނީ މަތިވެފަ އެވެ.

އީރާނާއެކު ވެފައިވާ ހަމަލާބަދަލުކުރުން ހުއްޓާލުމުގެ އެއްބަސްވުން "ނިމިއްޖެ" ކަމަށް ވިދާޅުވަމުން ރައީސް ޑޮނަލްޑް ޓްރަމްޕް އިތުރަށް ވިދާޅުވީ، ތެހެރާނާއެކު މުއާމަލާތް ކުރުމަކީ "ވަގުތު ބޭކާރުކުރުން" ކަމަށެވެ.

ރައީސް ޓްރަމްޕް މިހެން ވިދާޅުވެފައި މިވަނީ، ހުރްމުޒް ކަނޑުއޮޅިން ދަތުރުކުރި ގަތަރާއި ސައުދީ އަރަބިއްޔާގެ ތެޔޮ ޓޭންކަރުތައް ހިމެނޭހެން ތިން އުޅަނދަކަށް ދިން ހަމަލާތަކާ ގުޅިގެން، އީރާނަށް އަމާޒުކޮށް "ބާރުގަދަ ހަމަލާތަކެއް" ދީފައިވާނެ ކަމަށް އެމެރިކާއިން ބުނެފައިވާ ދަނޑިވަޅެއްގަ އެވެ.

މީގެ އިތުރުން، ޖޫން 17 ވަނަ ދުވަހު ވޮޝިންގޓަނާއި ތެހެރާނާ ދެމެދު ސޮއިކުރި ވަގުތީ ސުލްހައިގެ އެއްބަސްވުމުގެ ދަށުން، އީރާނަށް ތެޔޮ ވިއްކުމުގެ ހުއްދަ ދިނުމަށް އެމެރިކާއިން ދޫކޮށްފައިވާ ލުއިތައް (ވޭވަރ) ވެސް މިހާރު ވަނީ ބާތިލުކޮށްފަ އެވެ.