ސަރަހައްދުގެ ކުދި ގައުމަތަކުން ސިޔާސީ ގޭމްބްލް ނުކުރުމަށް އީރާނުގެ ލީޑަރުގެ އިސް މުޝީރު އިންޒާރު ދީފި

ހުޅަނގު އޭޝިއާއަކީ ސަރަހައްދުގެ ކުދި ގައުމުތަކުން ސިޔާސީ ގޮތުން "ގޭމްބްލް" ކުރަން އޮތް ތަނެއް ނޫން ކަމަށް ވިދާޅުވެ އީރާނުގެ އެންމެ މަތީވެރިޔާގެ ބައިނަލްއަގުވާމީ ކަންކަމާބެހޭ އިސް މުޝީރު އަލީ އަކްބަރު ވަލާޔަތީ އިންޒާރު ދެއްވައިފި އެވެ.

ބުދަ ދުވަހު އެކްސްގައި ކުރެއްވި ޕޯސްޓެއްގައި ވަލާޔަތީ ވިދާޅުވީ، ސަރަހައްދުގެ ކުދި ގައުމުތަކުން ކުރާ ސިޔާސީ ގޭމްބްލިން އަށް މީގެ ކުރިން ވެސް އީރާނުން އިންޒާރު ދީފައިވާނެ ކަމަށެވެ. އަދި އެފަދަ ކޮންމެ ނުރައްކާތެރި އަމަލަކަށް ވަގުތުން ރައްދު ދޭނެކަން އީރާނުން ތަކުރާރުކޮށް ސާބިތުކޮށްދީފައިވާނެ ކަމަށް ވެސް އޭނާ ވިދާޅުވި އެވެ.

މީގެ އިތުރުން، މަސްރަހު މިހާރު ހޫނުވަމުންދާ މައްސަލައިގައި ވަލާޔަތީ ވަނީ އެމެރިކާ ކުށްވެރިކުރައްވާފަ އެވެ. އޭނާ މިހެން ވިދާޅުވީ، އީރާނާއެކު ވެފައިވާ ހަނގުރާމަ ހުއްޓާލުމުގެ އެއްބަސްވުން މިހާރު "ނިމިފައިވާ" ކަމަށާއި، ތެހެރާނާއެކު މަޝްވަރާ ކުރުމަކީ "ވަގުތު ބޭކާރު ކުރުމެއް" ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވުމާ ގުޅިގެންނެވެ.

އަލަށް ކުރިމަތިވަމުންދާ މިފަދަ އުދުވާނީ އަމަލުތަކާއި، އެއްބަސްވުން ބާތިލުކުރިކަމަށް ދެއްކި ވާހަކަތަކުގެ ފުރިހަމަ ޒިންމާ އުފުލަންޖެހޭނީ، "ބޭންޑިޓެއް" ނުވަތަ ފޭރޭ މީހެއްގެ ގޮތުގައި މަޝްހޫރުވެފައިވާ މީހާ (ޓްރަމްޕް) އާއި، އެޕްސްޓީންއާ ގުޅުންބެހެއްޓީ އެމީހާގެ ސިޔާސަތުތަކުން ކަމަށް ވަލާޔަތީ ވިދާޅުވި އެވެ. އަދި މި ސިޔާސަތުތަކުގެ ސަބަބުން ސަރަހައްދު އަނެއްކާވެސް ހަނގުރާމައިގެ އަލިފާންގަނޑެއްގެ ތެރެއަށް ކޮއްޕާލަމުންދާ ކަމަށް އޭނާ ފާހަގަކުރެއްވި އެވެ.

އިސް މުޝީރު އިތުރަށް ވިދާޅުވީ، ކުރިމަތިވަމުންދާ އިހާނެތިކަމާއި ނުރައްކާތެރި އަމަލުތަކުގެ ކުރިމަތީގައި "އެކްސިސް އޮފް ރެސިސްޓެންސް" އިން ހިމޭނުން ނޯންނާނެ ކަމަށެވެ. އަދި އެ ފަރާތްތަކުން ތިބީ ކޮންމެ ވަގުތަކުވެސް ރައްދު ދިނުމަށް ތައްޔާރަށް ކަމަށް އޭނާ ވިދާޅުވި އެވެ.

ވަލާޔަތީ މިފަދަ މޭރުމަކުން ވާހަކަދައްކަވާފައި މިވަނީ، އީރާނުގެ އައްސޭރިފަށުގެ ސަރަހައްދުތަކަށް އެމެރިކާއިން ދިން އާ ހަމަލާތަކަކާ ގުޅިގެން، އީރާނުގެ އަސްކަރިއްޔާއިން ރައްދުގައި ޕާޝިއަން ގަލްފް ސަރަހައްދުގައި ހުރި އެމެރިކާގެ 85 އަސްކަރީ މަރުކަޒަކަށް ހަމަލާދީފައިވާ ދަނޑިވަޅެއްގަ އެވެ.