ޓްރަމްޕް ގެ އިންޒާރުތަކާ އެކު ނޭޓޯ ސަމިޓް ފަށައިފި

ނޭޓޯގެ އަހަރީ ސަމިޓުގައި ބައިވެރިވެވަޑައިގަތުމަށް އެމެރިކާގެ ރައީސް ޑޮނަލްޑް ޓްރަމްޕް ތުރުކީވިލާތުގެ އަންކާރާއަށް ވަޑައިގެންފި އެވެ. މި ދަތުރުފުޅު ޓްރަމްޕް ފެއްޓެވީ ތުރުކީގެ ރައީސް ރަޖަބް ތައްޔިބް އުރުދުޣާނާއެކު އޮތް ގާތް ގުޅުން ހާމަކުރައްވަމުންނެވެ. ނަމަވެސް، ހަމައެއާއެކު ނޭޓޯގައި ހިމެނޭ ވިލާތުގެ ގައުމުތަކުން އެކަށީގެންވާ މިންވަރަށް ޚަރަދު ނުކުރާނަމަ، އެ ސަރަހައްދުގައި ތިބި އެމެރިކާގެ ސިފައިން ބާލާނެކަމުގެ އިންޒާރު ވެސް ޓްރަމްޕް ވަނީ ދެއްވާފަ އެވެ.

ވޮޝިންޓަނާއި ވިލާތުގެ ގައުމުތަކާ ދެމެދު ނުތަނަވަސްކަން ބޮޑުވެފައިވާ ދަނޑިވަޅެއްގައި، ޓްރަމްޕް ތުރުކީވިލާތަށް ވަޑައިގަތީ އަންގާރަ ދުވަހު އެވެ. ނޭޓޯގެ އިއްތިހާދުގެ ގައުމުތަކުގެ ދިފާއީ ޚަރަދުތައް ޖީޑީޕީގެ 5 އިންސައްތައަށް އިތުރުކުރުމަށް ޓްރަމްޕް ދަނީ ބާރުއަޅުއްވަމުންނެވެ. މިއީ މިދިޔަ އަހަރުގެ ސަމިޓުގައި އެއްބަސްވި އަދަދެއް ނަމަވެސް، ވިލާތުގެ ގައުމުތަކުގެ އިގްތިސާދު ހީނަރުވަމުންދާތީ މި އަމާޒަށް ވާސިލްވުމަށް ވަނީ ބޮޑެތި ގޮންޖެހުންތަކެއް ކުރިމަތިވެފަ އެވެ.

ނޫސްވެރިންނާ ވާހަކަދައްކަވަމުން ރައީސް ޓްރަމްޕް ވިދާޅުވީ، ކަނޑައެޅިފައިވާ އަމާޒަށް ޚަރަދު ނުކުރުމާއި، އީރާނާ ދެކޮޅަށް އެމެރިކާ އާއި އިސްރާއީލުން ކުރަމުންދާ ހަނގުރާމައަށް ތާއީދު ނުކުރާތީ "ނޭޓޯއާ މެދު ވަރަށް ބޮޑަށް މާޔޫސްވެފައިވާ" ކަމަށެވެ. އަދި މީގެ ރައްދުގައި ވިލާތުގައި ތިބި އެމެރިކާގެ ސިފައިންގެ އަދަދު އިތުރަށް މަދުކުރާނެކަމުގެ އިޝާރާތެއް ވެސް ޓްރަމްޕް ވަނީ ދެއްވާފައެވެ.

ޓްރަމްޕް ވިދާޅުވި ގޮތުގައި އޭނާ މި ސަމިޓަށް ވަޑައިގަތުމަށް ނިންމެވީ "ވަރުގަދަ ލީޑަރެއްގެ" ގޮތުގައި ސިފަކުރެއްވި އުރުދުޣާނަށް ކުރައްވާ އިހުތިރާމެއްގެ ބޮޑުކަމުންނެވެ. އީރާނާ ދެކޮޅަށް ކުރާ ހަނގުރާމަ އުރުދުޣާން ކުށްވެރިކުރައްވާފައިވީ ނަމަވެސް، އަދި ތުރުކީ އާއި އިސްރާއީލާ ދެމެދު ނުތަނަވަސްކަން އޮތް ނަމަވެސް، ރަޝިޔާގެ އެސް-400 ވައިގެ ދިފާއީ ނިޒާމު ގަތުމާ ގުޅިގެން އަންކާރާއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލައްވާނެ ކަމަށް ޓްރަމްޕް އިއުލާން ކުރެއްވި އެވެ. މީގެ އިތުރުން، ތުރުކީއަށް އެފް-35 މަރުކާގެ ހަނގުރާމަމަތީ ބޯޓުތައް ވިއްކުން މަނާކޮށްފައި އޮތް އޮތުން ނިމުމަކަށް ގެނައުމަށް ވިސްނަވާނެ ކަމަށް ވެސް ވިދާޅުވިއެވެ. މިއީ އިސްރާއީލުގެ ނުރުހުން އަމާޒުވާނެ ނިންމުމެއް ކަމަށް ބެލެވެ އެވެ.

ޔޫކްރޭނުގެ ލީޑަރު ވުލަޑިމިއަރ ޒެލެންސްކީ ވަނީ މި ސަމިޓުގެ ބޭނުން ހިއްޕަވައި، ވިލާތުގެ ގައުމުތަކުގެ ކިބައިން އިތުރު ހަތިޔާރު ހޯދުމަށް އެދިވަޑައިގެންފަ އެވެ. މިފަހަރު އޭނާ އެދިވަޑައިގަތީ ރަޝިޔާގެ ބެލިސްޓިކް މިސައިލްތައް ހުއްޓުވުމުގެ ގާބިލްކަން ހުރި ވައިގެ ދިފާއީ ނިޒާމުތައް ހޯދުމަށެވެ. ޒެލެންސްކީ މިކަމަށް އެދިވަޑައިގަތީ، ރަޝިޔާ ސިފައިން ކީވްއަށް މިސައިލާއި ޑްރޯން ބޭނުންކޮށްގެން ވަރުގަދަ ހަމަލާތަކެއްދީ، ހަތިޔާރު އުފައްދާ ކާރުޚާނާތަކާއި އަސްކަރީ އުމްރާނީ ވަސީލަތްތައް ހަލާކުކޮށްލިތާ އެއްދުވަސް ފަހުންނެވެ.

މިދިޔަ އަހަރު ދަ ހޭގްގައި ބޭއްވި ބައްދަލުވުމުގައި ޓްރަމްޕަށް "ޑެޑީ" ގެ ނަމުން މުޚާތަބުކުރި ނޭޓޯގެ ސެކްރެޓަރީ ޖެނެރަލް މާކް ރޫޓާ، މިފަހަރުގެ އަންކާރާ ސަމިޓް ބޭނުންކުރައްވަނީ ޓްރަމްޕްގެ ކުރިމަތީގައި އޭނާގެ އަގު އެރުއްވުމަށް ހޯއްދަވާ ފުރުސަތެއްގެ ގޮތުގަ އެވެ.

ހޯމަ ދުވަހު ނޫސްވެރިންނާ ވާހަކަދައްކަވަމުން ރޫޓާ ވިދާޅުވީ، ހުރިހާ އިއްތިހާދީ ގައުމުތަކުން ވެސް ވަގުތުން ފިޔަވަޅު އަޅައި، ޖީޑީޕީގެ 5 އިންސައްތަ ދިފާއީ ކަންކަމަށް ޚަރަދުކުރުމުގެ އަމާޒަށް ވާސިލްވުމަށް ރައީސް ޓްރަމްޕް ފުރިހަމައަށް އުންމީދުކުރައްވާ ކަމަށެވެ. އަދި 2017 ވަނަ އަހަރު ޓްރަމްޕްގެ ފުރަތަމަ ދައުރު ފެށުނީއްސުރެ، ކެނެޑާ އާއި ވިލާތުގެ ގައުމުތަކުން ދިފާއީ ކަންކަމަށް ޖުމްލަ އެއް ޓްރިލިއަން ޑޮލަރު ޚަރަދުކޮށްފައިވާކަން ފާހަގަކުރައްވައި، "ޓްރަމްޕް ޓްރިލިއަން" ގެ ނަމުން އެކަން ސިފަކުރައްވައި ޓްރަމްޕަށް ތައުރީފު ކުރައްވާނެ ކަމަށް ވެސް ރޫޓާ ވިދާޅުވި އެވެ.

ރޫޓާ ވަނީ އަންގާރަ ދުވަހުގެ ރޭ އެމެރިކާ އިން އީރާނަށް ދިން ވަރުގަދަ ހަމަލާތަކަކީ ހަމަ ކޮންމެހެން ދިނުން މުހިންމު ހަމަލާތަކެއް ކަމަށް ވެސް ވިދާޅުވެފަ އެވެ.