ސްޕެއިނާއެކު ކުރާ ހުރިހާ ވިޔަފާރީގެ މުއާމަލާތްތަކެއް ހުއްޓާލުމަށް ޑޮނަލްޑް ޓްރަމްޕް އަމުރުކުރައްވައިފި
ސްޕެއިނަކީ ނޭޓޯގެ ގޯސް ބައިވެރިއެއްގެ ގޮތުގައި ސިފަކުރައްވައި، އެ ގައުމާއެކު ކުރާ ހުރިހާ ވިޔަފާރީގެ މުއާމަލާތްތަކެއް ވަގުތުން ހުއްޓާލުމަށް އެމެރިކާގެ ރައީސް ޑޮނަލްޑް ޓްރަމްޕް އަމުރުކުރައްވައިފި. މި ފިޔަވަޅު އަޅާފައިވަނީ އީރާނާ ދެކޮޅަށް އެމެރިކާއިން ހިންގާ އަސްކަރީ އޮޕަރޭޝަންތަކުގައި ސްޕެއިންގެ ވައިގެ ސަރަހައްދާއި އަސްކަރީ މަރުކަޒުތައް ބޭނުންކުރުން އެ ގައުމުން މަނާކުރުމާ ގުޅިގެން ކަމަށް ބެލެވޭ.
އެމެރިކާގެ ރައީސް ޑޮނަލްޑް ޓްރަމްޕް | ގެޓީ އިމޭޖަސް
ސްޕެއިނާއެކު ކުރާ ހުރިހާ ވިޔަފާރީގެ މުއާމަލާތްތަކެއް ހުއްޓާލުމަށް ޑޮނަލްޑް ޓްރަމްޕް އަމުރުކުރައްވައިފި އެވެ.
އެމެރިކާގެ ރައީސް ޑޮނަލްޑް ޓްރަމްޕް ވިދާޅުވީ، ސްޕެއިނަކީ ނޭޓޯގައި އޮތް "ވަރަށް ގޯސް ބައިވެރިއެއް" ކަމަށާއި، އެހެންކަމުން އެ ގައުމާއެކު ކުރާ ހުރިހާ ވިޔަފާރީގެ މުއާމަލާތްތަކެއް ވަގުތުން ހުއްޓާލުމަށް އެމެރިކާގެ ޓްރެޜަރީ ސެކްރެޓަރީ ސްކޮޓް ބެސެންޓަށް މިހާރު އަމުރުކުރައްވާފައިވާ ކަމަށެވެ.
މިދިޔަ މާރިޗު މަހުގެ ތެރޭގައި ސްޕެއިނުން ވަނީ، އީރާނާ ދެކޮޅަށް އެމެރިކާއިން ހިންގާ އަސްކަރީ އޮޕަރޭޝަންތަކުގައި ސްޕެއިންގެ ސަރަހައްދުގައި ހުންނަ ގުޅިފައިވާ އަސްކަރީ މަރުކަޒުތައް ބޭނުން ނުކުރެވޭނެ ކަމަށް ބުނެފަ އެވެ. މީގެ އިތުރުން، ހަނގުރާމައިގައި ބައިވެރިވާ އެމެރިކާގެ މަތިންދާބޯޓުތަކަށް ސްޕެއިންގެ ވައިގެ ސަރަހައްދު ބޭނުންކުރުންވެސް އެ ގައުމުން ވަނީ މަނާކޮށްފަ އެވެ.
މަސްދަރު: ބީބީސީ
