އީރާނުގެ އެކި ސަރަހައްދުތަކަށް އަމާޒުކޮށް އެމެރިކާއިން ވަރުގަދަ ހަމަލާތަކެއް ދޭން ފަށައިފި

އީރާނާއެކު ކުރަމުންދާ ހަނގުރާމަ ހުއްޓާލުމަށް ވެފައިވާ ވަގުތީ އެއްބަސްވުން މިހާރު "ނިމުމަކަށް އައިސްފައިވާ" ކަމަށް އެމެރިކާގެ ރައީސް ޑޮނަލްޑް ޓްރަމްޕް އިޢުލާނު ކުރެއްވިތާ މަދު ގަޑިއިރުތަކެއްގެ ތެރޭގައި، އެމެރިކާގެ އަސްކަރިއްޔާއިން އީރާނަށް އާ ހަމަލާތަކެއް ދެމުންދާ ކަމަށް އެމެރިކާގެ ސެންޓްރަލް ކޮމާންޑުން ބުދަ ދުވަހު ބުނެފިއެވެ.

އެމެރިކާގެ ސެންޓްރަލް ކޮމާންޑުން ހާމަކޮށްފައިވާ ގޮތުގައި، މި ހަމަލާތަކުގެ މަގްސަދަކީ ހުރްމުޒް ކަނޑުއޮޅީގައި ދަތުރުފަތުރު ކުރުމުގެ މިނިވަންކަމަށް އީރާނުން ކުރިމަތިކުރާ ނުރައްކާތައް ކުޑަކޮށް، އެ ގައުމުގެ އަސްކަރީ ގާބިލުކަން ދަށްކޮށްލުމެވެ.

"ބައިނަލްއަގުވާމީ މުހިންމު ކަނޑުގެ ސަރަހައްދެއްގައި މިނިވަންކަމާއެކު ދަތުރުކުރާ މުދާ އުފުލާ ބޯޓުފަހަރަށާއި އާންމު ފަޅުވެރިންނަށް އަމާޒުކޮށް، އެއްވެސް އުސޫލެއް ނެތި އީރާނުން ދާދިފަހުން ދީފައިވާ ހަމަލާތަކުގެ ޒިންމާ އެމެރިކާއިން އެ ގައުމު ލައްވައި އުފުލުވާނެ،" އެކްސްގައި ކުރި ޕޯސްޓެއްގައި އެމެރިކާގެ ސެންޓްރަލް ކޮމާންޑުން ބުނެފައިވެ އެވެ.

އީރާނުގެ ދައުލަތުގެ ޓީވީން ރިޕޯޓްކޮށްފައިވާ ގޮތުގައި، އީރާނުގެ އަބޫ މޫސާ ޖަޒީރާއިން މިހާރު ވަނީ ގޮވުންތަކުގެ އަޑު އިވިފައެވެ. މީގެ އިތުރުން އީރާނުގެ ދެކުނުގެ ސިޓީއެއް ކަމަށްވާ ސިރިކްގެ ތަހްރޫޔީ އަވަށާ ކައިރިންވެސް އިތުރު ތިން ގޮވުމެއްގެ އަޑު އިވިފައިވާ ކަމަށް އެ ގައުމުގެ މީޑިއާތަކުން ބުނެ އެވެ.

އީރާނުގެ ދައުލަތުގެ ބްރޯޑްކާސްޓަރު އައި.އާރް.އައި.ބީ އިން ބުނި ގޮތުގައި، އެ ގައުމުގެ ދެކުނުގެ ބަނދަރުމަތީ ސިޓީއަކުން އަށް ގޮވުމެއްގެ އަޑު އިވިފައިވާއިރު، މި ހަމަލާތަކާ ގުޅިގެން އެ ސަރަހައްދުގެ އެއާ ޑިފެންސް ސިސްޓަމްތައް ވަނީ ހަރަކާތްތެރިވާން ފަށާފަ އެވެ.

ޓްރަމްޕްގެ ވާހަކަފުޅުތަކަށް ރައްދު ދެއްވަމުން އީރާނުގެ ޚާރިޖީ ވަޒީރު ވިދާޅުވީ، ބޭ އަދަބީ ބަސްތަކަށް ބޭ އަދަބީ ބަސްތަކުން ރައްދު ނުދެއްވާނެ ކަމަށާއި، ނަމަވެސް އީރާނުން ރައްދު ދޭނީ އެއްވެސް ބިރުވެރިކަމެއް ނެތި، ނުހަނު ކެރިގެން އަމަލީ ގޮތުން ކަމަށެވެ.