އީރާނަށް މިރޭވެސް ވަރުގަދަ ހަމަލާތަކެއް ދޭނެ ކަމުގެ އިންޒާރު ޓްރަމްޕް ދެއްވައިފި
8 ޖުލައި 2026 | ބުދަ 13:36އެމެރިކާއިން އިރާނަށް ވަރުގަދަ ހަމަލާތަކެއް ދީފައިވާ ކަމަށާއި، މިރޭވެސް އިތުރު ހަމަލާތަކެއް ދޭނެ ކަމުގެ އިންޒާރު ރައީސް ޑޮނަލްޑް ޓްރަމްޕް ދެއްވައިފި. އިރާނުން އެއްބަސްވުންތަކާ ޚިލާފުވަމުންދާ ކަމަށް ތުހުމަތުކުރައްވައި، އެ ގައުމުގެ ލީޑަޝިޕަށް ޓްރަމްޕް ވަނީ ވަރަށް ބޮޑަށް ފާޑުވިދާޅުވެފައި. ދެ ގައުމުގެ މެދުގައި ހަމަލާތައް ބަދަލުކުރަމުންދާ މި ދަނޑިވަޅުގައި، އިރާނުންވެސް ދަނީ އެމެރިކާގެ އަސްކަރީ މަރުކަޒުތަކަށް އަމާޒުކޮށް ހަމަލާދެމުން.
އީރާނުގެ އެކި ސަރަހައްދުތަކަށް އަމާޒުކޮށް އެމެރިކާގެ އަސްކަރިއްޔާއިން ވައިގެ ހަމަލާތަކެއް ވަނީ ދީފައި. | ގެޓީ އިމޭޖަސް
މިރޭގެ ވަގުތެއްގައި ވެސް އެމެރިކާއިން އިރާނަށް ވަރުގަދަ ހަމަލާތަކެއް ދިނުމަކީ ވަރަށް އެކަށީގެންވާ ކަމެއް ކަމަށް ޓްރަމްޕް ވިދާޅުވެއްޖެ އެވެ.
އިރާނާ ބެހޭގޮތުން ނޫސްވެރިއަކު ކުރި ސުވާލަކަށް ޖަވާބު ދެއްވަމުން ޓްރަމްޕް ވިދާޅުވީ، ރޭގެ ވަގުތެއްގައި އެމެރިކާއިން އިރާނަށް ވަރަށް ވަރުގަދަ ހަމަލާތަކެއް ދީފައިވާ ކަމަށެވެ.
ނޭޓޯ ސަމިޓުގެ ހަވާސާގައި ޔޫކްރެއިންގެ ރައީސް ވުލަޑިމިއަރ ޒެލެންސްކީއާ އެކު ނޫސްވެރިންނާ ބައްދަލުކުރައްވައި ވާހަކަދައްކަވަމުން، އެމެރިކާގެ ރައީސް ޑޮނަލްޑް ޓްރަމްޕް ވަނީ އިރާނާ ގުޅޭގޮތުން ވާހަކަދައްކަވާފަ އެވެ.
ޓްރަމްޕް އިތުރަށް ވިދާޅުވީ، އިރާނަށް ކުޑަ އިންޒާރެއް ދެއްވާފައިވާނެ ކަމަށާއި، މިރޭވެސް އެ ގައުމަށް ވަރުގަދަ ހަމަލާތަކެއް ދޭނެ ކަމަށެވެ.
ތުރުކީގައި ބާއްވަމުންދާ ނޭޓޯ ސަމިޓުގައި ހުންނަވައި ޓްރަމްޕް ވަނީ އިރާނުގެ ލީޑަޝިޕަށް ވަރަށް ބޮޑަށް ފާޑުވިދާޅުވެފަ އެވެ. އެގޮތުން އިރާނުގެ ވެރިންނަކީ "ނުލަފާ" އަދި "ބަލިމަޑުކަމެއްގެ ތެރޭގައި ތިބި ބައެއް" ކަމަށް ސިފަކުރައްވައި، އެމީހުންނާ އެއްވެސް މުއާމަލާތެއް ކުރަން ބޭނުންފުޅު ނުވާ ކަމަށް ޓްރަމްޕް ވިދާޅުވި އެވެ. އަދި ދެ ގައުމުގެ މެދުގައި މަޝްވަރާ ކުރާ ފަރާތްތަކުން ވާހަކަތައް ކުރިއަށް ގެންދިޔަ ނަމަވެސް، އެއީ ވަގުތު ބޭކާރު ކުރުން ކަމަށް ދެކޭ ކަމަށް ވެސް ޓްރަމްޕް ވިދާޅުވި އެވެ.
ޓްރަމްޕް މިފަދައިން ވިދާޅުވެފައި މިވަނީ ދެ ގައުމުގެ މެދުގައި ހަމަލާތައް ބަދަލުކުރަމުންދާ ދަނޑިވަޅެއްގަ އެވެ. އެގޮތުން، އަންގާރަ ދުވަހުގެ ރޭ އެމެރިކާއިން ވަނީ އިރާނުގެ 80 އަށް ވުރެ ގިނަ އަމާޒުތަކަށް ހަމަލާދީފައިވާ ކަމަށް ބުނެފަ އެވެ.
މީގެ ރައްދުގައި އިރާނުން ބުނެފައިވަނީ، ބަހްރޭން އަދި ކުވެއިތުގައި ހުރި އެމެރިކާގެ އަސްކަރީ މަރުކަޒުތަކަށް އަމާޒުކޮށް ހަމަލާދެމުންދާ ކަމަށެވެ.
އަންގާރަ ދުވަހު އެމެރިކާއިން ހަމަލާދީފައިވަނީ ހުރްމުޒް ކަނޑުއޮޅިން ދަތުރުކުރި ތެޔޮ އުފުލާ ތިން ބޯޓަކަށް ދިން ހަމަލާތަކާ ގުޅިގެންނެވެ. ނަމަވެސް، އެ ބޯޓުތަކަށް ހަމަލާދިން ކަމުގެ ޒިންމާ އިރާނުން ސީދާ ގޮތެއްގައި އުފުލާފައެއް ނުވެ އެވެ.
މިދިޔަ މަހު ތެހެރާނާއި ވޮޝިންގޓަނުން ވަނީ 14 ސަފުހާގެ މައްޗަށް އެކުލެވޭ ފަހުމުނާމާއެއްގައި ސޮއިކޮށްފައެވެ. މި އެއްބަސްވުމުގެ މަގްސަދަކީ ހަމަލާބަދަލުކުރުން ހުއްޓާލުމުގެ މުއްދަތު އިތުރުކޮށް، ހުރިހާ ދާއިރާއަކުން ކުރިމަތިލުންތައް ނިމުމަކަށް ގެނައުމެވެ.
ހަމަލާބަދަލުކުރުން ހުއްޓާލުމުގެ އެއްބަސްވުން "ނިމުމަކަށް އައިސްފައިވާ" ކަމަށް ޓްރަމްޕް ވިދާޅުވުމާ ގުޅިގެން، މިއީ އެމެރިކާ އާއި އިރާނާ ދެމެދު ފުރިހަމަ ހަނގުރާމައެއް ފެށުނީތޯ ނޫސްވެރިން ވަނީ ސުވާލުކޮށްފަ އެވެ.
މި ސުވާލަށް ސީދާ ޖަވާބެއް ނުދެއްވި ނަމަވެސް، ޓްރަމްޕް ވަނީ އިރާނުން ކޮންމެ ދުވަހަކުވެސް އެއްބަސްވުމާ ޚިލާފުވަމުންދާ ކަމަށް ތުހުމަތުކުރައްވާފަ އެވެ. އަދި އިރާނަކީ "ދޮގު ހަދާ" އަދި "އޮޅުވާލާ" ބައެއް ކަމަށް ވެސް ޓްރަމްޕް ވިދާޅުވި އެވެ.
"އަހަރެމެންގެ އެއްބަސްވުމުގެ ދަށުން އެމީހުންނަށް ދުވަހަކުވެސް ނިއުކްލިއާ ހަތިޔާރެއް ނުއުފެއްދޭނެ. އެކަމަކު ދެން އެއްބަސްވުމެއް އޮންނާނެ ކަމެއް ނޭނގެ. އެއްބަސްވުމަކާ ނުލައިވެސް އަހަރެމެން އެކަން ކޮށްފާނަން، އެއީ އެގޮތް މާ ފަސޭހަވީމަ،" ޓްރަމްޕް އިތުރަށް ވިދާޅުވި އެވެ.
