ޑެންމާކުގެ ރައްދު އެމެރިކާ އަށް - ގައުމުގެ ސަރަހައްދުގެ ކޮންމެ އިންޗެއް ދިފާއުކުރަން ތައްޔާރު

ނޭޓޯގެ މެންބަރު ގައުމުތަކުގެ ސަރަހައްދުން ކޮންމެ އިންޗިއެއް ދިފާއުކުރުމަށް ޑެންމާކް އޮތީ ތައްޔާރަށް ކަމަށާއި، އޭގެ ތެރޭގައި ޑެންމާކްގެ ރަސްކަމުގެ ދަށުގައިވާ ސަރަހައްދުތައް ވެސް ހިމެނޭނެ ކަމަށް އެ ގައުމުގެ ބޮޑުވަޒީރު މެޓޭ ފްރެޑްރިކްސަން ވިދާޅުވެއްޖެ އެވެ. ތުރުކީވިލާތުގެ އަންކާރާގައި ބުދަ ދުވަހު ވާހަކަދައްކަވަމުން ބޮޑުވަޒީރު މިހެން ވިދާޅުވީ، ގްރީންލޭންޑަކީ އެމެރިކާގެ ބާރުގެ ދަށުގައި އޮންނަންޖެހޭ ތަނެއް ކަމަށް އެމެރިކާގެ ރައީސް ޑޮނަލްޑް ޓްރަމްޕް އަލުން ވިދާޅުވިތާ އެއްދުވަސް ފަހުންނެވެ.

ޑެންމާކްގެ ބާރުގެ ދަށުގައި އޮންނަ، އަމިއްލަ އިދާރީ ހިންގުމެއް އޮންނަ ގްރީންލޭންޑް އެމެރިކާގެ ދަށަށް ގެންދަންޖެހޭ ނުވަތަ އެތަން ކޮންޓްރޯލް ކުރަންޖެހޭ ކަމަށް ބުނެ ޓްރަމްޕް ދައްކަވާ ވާހަކަތަކުގެ ސަބަބުން، ވޮޝިންޓަނާއި ކޯޕަންހޭގަންގެ ގުޅުމަށް ވަނީ ވަރަށް ބޮޑަށް ބުރޫއަރާފަ އެވެ. ނޭޓޯ އުފެއްދުމުގައި އިސްކޮށް އުޅުނު މި ދެ ގައުމުގެ އިތުރުން، މި މައްސަލައިގެ ސަބަބުން އެމެރިކާއާއި ޔޫރަޕްގެ ގުޅުމަށް ވެސް ވަނީ ނޭދެވޭ އަސަރުތަކެއް ކޮށްފައެވެ. މި މައްސަލަ މިހާރު ވަނީ ޑިޕްލޮމެޓިކް އަރާރުމަކަށް ބަދަލުވެފަ އެވެ.

ގްރީންލޭންޑަކީ ވިއްކާލަން އޮތް ތަނެއް ނޫންކަން ތަކުރާރު ކުރައްވަމުން ފްރެޑްރިކްސަން ވިދާޅުވީ، ނޭޓޯގެ ކޮންމެ އިންޗިއެއް ދިފާއުކުރުމަށް އެ ގައުމު އޮތީ ތައްޔާރަށް ކަމަށާއި، އޭގެ ތެރޭގައި ޑެންމާކްގެ އަމިއްލަ ސަރަހައްދުތައް ވެސް ހިމެނޭ ކަމަށެވެ. އަދި ޝައްކެއްވެސް ނެތް ގޮތުގައި ޑެންމާކްގެ ރަސްކަމުގެ ދަށުގައިވާ ހުރިހާ ސަރަހައްދެއް އެ ގައުމުން ދިފާއު ކުރާނެ ކަމަށް އޭނާ ވިދާޅުވި އެވެ.

މީގެ އިތުރުން ބޮޑުވަޒީރު ވިދާޅުވީ، މީގެ އެތައް އަހަރެއް ކުރިން ނޭޓޯ އުފެއްދި އެންމެ ބޮޑު އެއް ސަބަބަކީ، މެންބަރު ގައުމުތަކުގެ ތެރެއިން އެއްވެސް ގައުމަކަށް ކަމެއް ދިމާވެއްޖެ ހާލަތެއްގައި، ހުރިހާ ގައުމުތަކުން އެކަތިގަނޑަކަށް ވެ އެ ގައުމެއްގެ ދިފާއުގައި ތެދުވުން ކަމަށެވެ.