ގަތަރުން އީރާނަށް: ތެޔޮޓޭންކަރަށް ދިން ހަމަލާ ބައިނަލްއަގުވާމީ ގާނޫނާ ޚިލާފު

ހުރްމުޒް ކަނޑުއޮޅި ކައިރިން ގަތަރުގެ "އަލް ރެކައްޔާތު" ނަމަކަށް ކިޔާ ތެޔޮ ޓޭންކަރަށް ދިން ހަމަލާއަކީ ބައިނަލްއަގުވާމީ ކަނޑުދަތުރުފަތުރުގެ ރައްކާތެރިކަމަށާއި ދުނިޔޭގެ ހަކަތަ ފޯރުކޮށްދިނުމަށް ދިން ބަލައިގަނެވޭނެ ފަދަ ހަމަލާއެއް ނޫން ކަމަށް ގަތަރުގެ ފޮރިން މިނިސްޓްރީގެ ތަރުޖަމާނު މާޖިދު އަލް އަންސާރީ އަންގާރަ ދުވަހު ވިދާޅުވެއްޖެ އެވެ.

މި ހާދިސާއަކީ ބައިނަލްއަގުވާމީ ގާނޫނުތަކާ ކަނޑައެޅިގެން ޚިލާފު އަމަލެއްގެ ގޮތުގައި ސިފަކުރައްވައި، ސަރަހައްދީ ސަލާމަތާއި ކަނޑުދަތުރުފަތުރަށް ނުރައްކާވާ ފަދަ އަމަލުތައް ވަގުތުން ހުއްޓާލުމަށް އޭނާ ވަނީ އީރާނަށް ގޮވާލައްވާފަ އެވެ. އަދި މި ހަމަލާއާއި އޭގެ ސަބަބުން ލިބޭ އެންމެހައި ގެއްލުންތަކާއި ނަތީޖާތަކުގެ ފުރިހަމަ ގާނޫނީ ޒިންމާ އީރާނުން އުފުލަންޖެހޭނެ ކަމަށްވެސް ތަރުޖަމާނު ވިދާޅުވި އެވެ.

ގަތަރުގެ ގުދުރަތީ ގޭސް (އެލް.އެން.ޖީ) އުފުލާ "އަލް ރަކައްޔާތު" ޓޭންކަރުގެ އިންޖީނު ރޫމުގައި ރޯވި އަލިފާނުގެ ސަބަބުން، އެ އުޅަނދު ގޮވައިފާނެ ކަމުގެ ބިރު އެބައޮތް ކަމަށް މި ހާދިސާގެ މައުލޫމާތު ލިބިފައިވާ މަސްދަރަކުން އަންގާރަ ދުވަހު ރޮއިޓާސްއަށް ބުނެފައިވެއެވެ.

މަސްދަރުތަކުން މައުލޫމާތުދޭ ގޮތުގައި، "އަލް ރަކައްޔާތު" އަށް ގެއްލުން ލިބުނީ ހުރްމުޒް ކަނޑުއޮޅި ކައިރިންނެވެ. އެއީ ރޭގަނޑުގެ ވަގުތެއްގައި އީރާނުގެ ރިވޮލިއުޝަނަރީ ގާޑްސްއިން އެ ސަރަހައްދުގެ ކަނޑުއޮޅިން ދަތުރުކުރި އުޅަނދުތަކަށް އަމާޒުކޮށް މިސައިލް ހަމަލާތަކެއް ދިނުމާ ގުޅިގެންނެވެ.

ގުދުރަތީ ގޭސް ބަރުކޮށްގެން ދަތުރުކުރި މި އުޅަނދަށް ހަމަލާ އެރުމާ ގުޅިގެން، އެހީތެރިކަމަށް އެދި ޑިސްޓްރެސް ސިގްނަލް ފޮނުވާފައިވާ ކަމަށް އެއް މަސްދަރަކުން ބުނެފައިވެ އެވެ.

ނަމަވެސް އުޅަނދުގެ ފަޅުވެރިން ސަލާމަތުން ތިބި ކަމަށް މަސްދަރުތަކުން ބުނެ އެވެ. އަދި އުޅަނދުގެ އިންޖީނު ރޫމުގައި ރޯވެ، ދުންބޯވެފައިވުމުގެ ސަބަބުން އިތުރަށް ލިބިފައިވާ ގެއްލުންތައް ބަލައި ވަޒަންކުރުމަށް ފަޅުވެރިންނަށް ހުރަސްތަކެއް ކުރިމަތިވެފައިވާ ކަމަށްވެސް އެ ފަރާތްތަކުން ބުނެފައިވެއެވެ.

މި ހާދިސާއިން ހާމަވެގެންދަނީ، އެމެރިކާއާއި އީރާނާ ދެމެދު ވެފައިވާ ވަގުތީ އެއްބަސްވުމެއްގެ ދަށުން އުޅަނދުތަކަށް ރައްކާތެރިކަމާއެކު ދަތުރުކުރެވޭނެ އިންތިޒާމުތަކެއް ހަމަޖެހިފައިވީ ނަމަވެސް، ހުރްމުޒް ކަނޑުއޮޅި ސަރަހައްދުގައި ދަތުރުކުރާ އުޅަނދުތަކަށް އޮތް ނުރައްކާ އަދިވެސް ބޮޑުކަމެވެ. ދުނިޔޭގެ ތެޔޮ ސަޕްލައިގެ ފަސްބައިކުޅަ އެއްބައި ދަތުރުކުރާ މި ހަނި ކަނޑުއޮޅީގެ ކޮންޓްރޯލް އޮތް ކަމަށް އީރާނުން ބުނަމުންދާއިރު، މިއީ އެމެރިކާއާއި އިސްރާއީލުން އީރާނާއެކު ކުރަމުންދާ ހަނގުރާމައިގެ ސަބަބުން ކުރިމަތިވެފައިވާ އެންމެ ބޮޑު އެއް މައްސަލައެވެ.

"ސަތޭކަ އިންސައްތަ ރައްކާތެރި އީރާނުގެ ކަނޑުގެ ސަރަހައްދު ބޭނުންކުރާނަމަ، އޭގެ މާނައަކީ އަހަރެމެން އީރާނާއެކު މުއާމަލާތްކޮށް، ހުރްމުޒް ކަނޑުއޮޅި އޮތީ އެމީހުންގެ ކޮންޓްރޯލްގެ ދަށުގައި ކަމަށް ގަބޫލުކުރުން. އެކަމަކު އެމެރިކާ ނުވަތަ އޮމާންގެ ސަރަހައްދުން ދަތުރުކޮށްފިނަމަ ހަމަލާ އަމާޒުވޭ،" މަސްދަރަކުން ކިޔައިދިނެވެ.

"ދަތުރުކުރުމުގެ ހުއްދަ އެމެރިކާއިން ދޭ. އެކަމަކު މަގުމަތީގައި ކަމެއް ދިމާވެއްޖެނަމަ އެމީހުން ބުނަނީ ކުރިއަށް ދިއުމާއި ނުވަތަ އެނބުރި ދިއުމަކީ ކަލޭމެންގެ އަމިއްލަ ނިންމުމެކޭ،" އެ މަސްދަރުން އިތުރަށް ބުންޏެވެ.

މި މައުލޫމާތު ދިން ފަރާތްތަކުން މީޑިއާއާ ވާހަކަދެއްކުމުގެ ހުއްދަ ނެތުމުން، އެމީހުންގެ ނަން ހާމަނުކުރުމަށް ވަނީ އެދިފަ އެވެ.

"އަލް ރަކައްޔާތު" އަކީ ދުނިޔޭގެ އެންމެ ބޮޑު އެލް.އެން.ޖީ ޝިޕިން ފްލީޓް ހިންގާ ގަތަރު ގޭސް ޓްރާންސްޕޯޓް ކޮމްޕެނީ ލިމިޓެޑް (ނަކިލާތު) ގެ މިލްކުވެރިކަމުގެ ދަށުން ހިންގާ އުޅަނދެކެވެ. އެލް.އެސް.އީ.ޖީ ޝިޕިން ޑޭޓާއިން ދައްކާ ގޮތުގައި، މި އުޅަނދުގެ ލޮކޭޝަން އެންމެ ފަހުން ފެނިފައިވަނީ ޖޫން މަހުގެ 18 ވަނަ ދުވަހު އެވެ. މިއީ އެ އުޅަނދުގެ ޓްރާންސްޕޮންޑަރުތައް ނިއްވާލައިގެން ދަތުރުކުރަމުންދާކަމުގެ ނިޝާނެކެވެ.