ބިރު ދެއްކުމާއި ފިއްތުންތައް ހުއްޓާ ނުލާ ނަަމަ، މަޝްވަރާ ނުކުރާނަން: އީރާންގެ ފޮރިން މިނިސްޓަރު އަރާގްޗީ
7 ޖުލައި 2026 | އަންގާރަ 06:27އީރާން އިން އަބަދު ވެސް އިސްކަން ދެނީ ހަމަހަމަ އުސޫލެއްގެ މަތިން ކުރިއަށްދާ މަޝްވަރާ ތަކަށް ކަމަށް އަރާގްޗީ ވިދާޅުވި. ނަމަވެސް، ބާރުގެ ބޭނުން ކޮށްގެން ނުވަތަ ދަތި ކުރުމުގެ ފިޔަވަޅު ތަކުގެ ބިރު ދައްކައިގެން އީރާން ކުޑަ ކަކޫ ނުޖެއްސޭނެ ކަމަށް ވެސް އަރާގްޗީ ވިދާޅުވި.
އީރާންގެ ފޮރިން މިނިސްޓަރު އައްބާސް އަރާގްޗީ. | ގެޓީ އިމޭޖަސް
އީރާންއާ ދެކޮޅަށް ކުރިމަތި ކުރަމުންދާ ބިރު ދެއްކުންތަކާއި، ފިއްތުންތައް ހުއްޓާނުލާ ހިނދެއްގައި، ނިއުކްލިއާ މައްސަލަ ނުވަތަ އެ ނޫން ވެސް ދާއިރާ އަކުން ފައިނަލް އެއްބަސްވުމަށް އައުމަށް ކުރެވޭ އެއްވެސް މަޝްވަރާއެއް ފެށުމަށް ގަސްދު ނުކުރާ ކަމަށް އީރާންގެ ފޮރިން މިނިސްޓަރު އައްބާސް އަރާގްޗީ ވިދާޅުވެއްޖެ އެެވެ.
އަރާގްޗީ މިހެން ވިދާޅުވީ އަންގާރަ ދުވަހު އެކްސްގައި ކުރެއްވި ޕޯސްޓެއްގައި އެވެ.
އެގޮތުން އަރާގްޗީ ވިދާޅުވީ، މަޝްވަރާގެ މޭޒަށް ދިޔުމުގެ ކުރިން ބިރު ދެއްކުމުގެ އުސޫލުތައް ދޫކޮށްލަން ޖެހޭ ކަމަށެވެ. އަދި އީރާން އިން އަބަދު ވެސް އިސްކަން ދެނީ ހަމަހަމަ އުސޫލެއްގެ މަތިން ކުރިއަށްދާ މަޝްވަރާ ތަކަށް ކަމަށް އަރާގްޗީ ވިދާޅުވި އެވެ. ނަމަވެސް، ބާރުގެ ބޭނުން ކޮށްގެން ނުވަތަ ދަތި ކުރުމުގެ ފިޔަވަޅު ތަކުގެ ބިރު ދައްކައިގެން އީރާން ކުޑަ ކަކޫ ނުޖެއްސޭނެ ކަމަށް ވެސް އަރާގްޗީ ވިދާޅުވި އެވެ.
މީގެ އިތުރުން އަރާގްޗީ ވިދާޅުވީ، ބައިނަލްއަގުވާމީ މުޖުތަމައުން އީރާން އާއެކު ސީދާ މަޝްވަރާ ތަކަށް އަންނަން ބޭނުންވާ ނަމަ، އެންމެ ފުރަތަމަ ކުރަން ޖެހޭ ކަމަކީ އިތުބާރު އުފެއްދުން ކަމަށެވެ. އަދި ހަރުކަށި ބަސްމަގާއި، އިންޒާރުތައް ދިނުމަކީ މައްސަލަ އަށް އޮތް ހައްލެއް ނޫން ކަމަށާއި، އޭގެ ސަބަބުން މަޝްވަރާގެ މާހައުލު އިތުރަށް ގޯސްވެގެން ދާނެ ކަމަށް ވެސް އޭނާ ވިދާޅުވި އެވެ.
އަރާގްޗީގެ ހަރުކަށި ބަސްތައް އައިސްފައި ވަނީ އީރާންގެ ނިއުކްލިއާ ޕްރޮގްރާމްއާ ގުޅިގެން ހުޅަނގުގެ ގައުމު ތަކުން ފިއްތުންތައް ކުރިމަތި ކުރަމުންދާ ދަނޑިވަޅެއްގައި އެވެ. އީރާން އިން ތަކުރާރުކޮށް ބުނަމުން ދަނީ އެ ގައުމުގެ ނިއުކްލިއާ މަސައްކަތް ތަކަކީ ސުލްޙަވެރި ބޭނުން ތަކަށް ކުރާ މަސައްކަތް ތަކެއް ކަމަށެވެ. ނަމަވެސް އެމެރިކާ އާއި ޔޫރަޕުގެ ބައެއް ގައުމު ތަކުން ދަނީ އީރާންއާ ދެކޮޅަށް އިގްތިސާދީ ދަތި ކުރުމުގެ ފިޔަވަޅުތައް އަޅަމުންނެވެ.
އީރާންގެ އައު ސަރުކާރުން ބޭރުގެ ގައުމުތަކާ އެކު އޮންނަ ގުޅުން ރަނގަޅު ކުރަން ބޭނުންވާކަން ހާމަ ކޮށްފައިވީ ނަމަވެސް، އެ ގައުމުގެ ގައުމީ މަސްލަހަތާއި އިސްތިގުލާލަށް އުނިކަން އަންނަ ފަދަ އެއްވެސް ކަމަކަށް ދޫ ނުދޭނެ ކަމަށް އަރާގްޗީގެ ވާހަކަ ތަކުން ސާފުވެފައިވެ އެވެ. އެހެންކަމުން ކުރިއަށް އޮތް ތަނުގައި މަޝްވަރާތައް ކުރިއަށް ދާނީ ބިރު ދެއްކުމުގެ ސިޔާސަތު ތަކަށް ބަދަލު އައުމުން ކަމަށް ބެލެވެ އެވެ.
