ގަތަރުން ސަލާމަތީ ނުރައްކާ ބޮޑުވެފައިވާކަމަށް ބުނެ އިންޒާރު ނެރެފި

ގަތަރުގެ ސަލާމަތީ ނުރައްކާ ބޮޑުވެފައިވާތީ އެ ގައުމުގެ ދާޚިލީ ވުޒާރާއިން ސަމާލުކަން އިތުރުކުރުމަށް އަންގައިފި އެވެ. އެ ވުޒާރާއިން ނެރުނު އެލާޓެއްގައި ބުނެފައިވަނީ، ގައުމުގެ "ސަލާމަތީ ނުރައްކަލުގެ މިންވަރު މަތިވެފައިވާ" ކަމަށާއި، އެހެންކަމުން ހުރިހާ ރައްޔިތުންވެސް ގޭގައި މަޑުކުރުމަށާއި ރައްކާތެރި ތަންތަނުގައި ތިބުމަށް އިލްތިމާސްކުރާ ކަމަށެވެ.

ކުވެއިތަށް އަމާޒުކޮށް ދެމުންދާ މިސައިލް އަދި ޑްރޯން ހަމަލާތަކެއް އެ ގައުމުގެ އެއަރ ޑިފެންސް ސިސްޓަމްތަކުން ހުއްޓުވަމުންދާ ކަމަށް ކުވެއިތުގެ އަސްކަރިއްޔާއިން ބުނެފި އެވެ. ކުވެއިތު އަސްކަރިއްޔާގެ ޖެނެރަލް ސްޓާފުން ބުނީ، ދެމުންދާ ނުރައްކާތެރި ހަމަލާތައް "މިހާރުވެސް ދިފާއީ ނިޒާމުން ހުއްޓުވަމުންދާ" ކަމަށެވެ.

އަސްކަރިއްޔާއިން އިތުރަށް ބުނެފައިވަނީ، ގައުމުގެ އެކި ސަރަހައްދުތަކުން އިވެމުންދާ ގޮވުންތަކުގެ އަޑަކީ، ދެމުންދާ ހަމަލާތައް އެއަރ ޑިފެންސް ސިސްޓަމްތަކުން ހުއްޓުވުމުގެ ސަބަބުން އިވޭ އަޑުތަކެއް ކަމަށެވެ.

މީގެއިތުރުން، ކޫނާ ނިއުސް އެޖެންސީން ރިޕޯޓުކޮށްފައިވާ ގޮތުގައި، މުޅި ކުވެއިތުގައި މިހާރު ދަނީ ނުރައްކަލުގެ ސައިރަން އަޅަމުންނެވެ.

ބަހްރައިންގެ ދާޚިލީ ވުޒާރާއިން އެކްސްގައި ކުރި ޕޯސްޓެއްގައި ބުނެފައިވަނީ، އެ ގައުމުގައިވެސް މިހާރު ވަނީ ވައިގެ ދިފާއީ ނުރައްކަލުގެ ސައިރަންތައް އަޅަން ފަށާފައެވެ.

އެ ވުޒާރާއިން ވަނީ ހުރިހާ ރައްޔިތުންވެސް ކެތްތެރިކަން އިސްކުރުމަށާއި، ވީ އެންމެ އަވަހަކަށް އެމީހަކާ އެންމެ ގާތުގައި ހުރި ރައްކާތެރި ތަނަކަށް ދިއުމަށް އިލްތިމާސްކޮށްފަ އެވެ.