އެމެރިކާ އިން އީރާނު ބަނދަރަށް ހަމަލާދިން ވީޑިއޯ އާންމުވެއްޖެ
8 ޖުލައި 2026 | ބުދަ 09:31މި ހަމަލާތަކާ އެކު ދެ ގައުމުގެ ދެމެދުގައި އޮތް ސުލްހައިގެ އެއްބަސްވުން މިހާރު ނިމުމަކަށް އައިސްފައިވާ ކަމަށް ރައީސް ޓްރަމްޕް ވަނީ އިއުލާނު ކުރައްވާފައި. މީގެ އިތުރުން އީރާނަށް ތެޔޮ ވިއްކުމަށް ދީފައިވާ ހުއްދަ ބާތިލުކޮށް، އެ ގައުމާއެކު އިތުރަށް މުއާމަލާތް ކުރުމަކީ ވަގުތު ބޭކާރު ކުރުމެއް ކަމަށް އެމެރިކާ ސަރުކާރުން ވަނީ ބުނެފައި.
އީރާނުގެ ބަނދަރުމަތީ ސިޓީއަކަށް އެމެރިކާއިން ދިން ހަމަލާތަކުގެ މަންޒަރުތައް ފެންނަ ވީޑިއޯއެއް އާންމުވެއްޖެ | ސްކްރީން އިމޭޖް
އެމެރިކާއިން އީރާނުގެ ބަނދަރުމަތީ ރަށަކަށް ދިން ހަމަލާތަކުގެ މަންޒަރުތައް ފެންނަ ވީޑިއޯއެއް އާންމުވެއްޖެ އެވެ.
ރޭގެ ވަގުތެއްގައި އީރާނުގެ ބަންދަރު އައްބާސް ސިޓީއަށް އަމާޒުކޮށް އެމެރިކާއިން ދިން ގިނަ ހަމަލާތަކެއް ވީޑިއޯއަށް އަރާފައިވާއިރު، އެ ސިޓީގެ އިމާރާތްތަކުން ބޮޑެތި ގޮވުންތަކުގެ އަޑު އިވި، އަލިފާންގަނޑު މައްޗަށް އަަރަމުންދާ މަންޒަރު ފެނެ އެވެ.
އާންމުވެފައިވާ ވީޑިއޯ ފުޓޭޖްތަކުން އެމެރިކާގެ ހަމަލާތައް އަމާޒުކުރީ ސީދާ ކޮން ތަނަކަށް ނުވަތަ ކޮން އަމާޒަކަށް ކަމެއް ސާފެއް ނުވެ އެވެ.
އީރާނުގެ ބަނދަރު ސިޓީ އަށް އެމެރިކާއިން ބާރުގަދަ ހަމަލާތަކެއް ދޭ މަންޒަރު
އަންކާރާގައި ކުރިއަށްދާ ނޭޓޯ ސަމިޓުގައި ނޫސްވެރިންނާ ވާހަކަދައްކަވަމުން އެމެރިކާގެ ރައީސް ވިދާޅުވީ، އީރާނާއެކު ވެފައިވާ ފަހުމުނާމާ މިހާރު "އުވާލެވިފައިވާ" ކަމަށް ގަބޫލުކުރައްވާ ކަމަށެވެ.
"އެމީހުންނާއެކު މުއާމަލާތް ކުރުމަކީ ހަމައެކަނި ވަގުތު ބޭކާރު ކުރުމެއް،" ޓްރަމްޕް ވިދާޅުވި އެވެ.
ޓްރަމްޕް މިހެން ވިދާޅުވެފައިވަނީ، ހުރްމުޒް ކަނޑުއޮޅިން ދަތުރުކުރި ގަތަރާއި ސައުދީ އަރަބިއްޔާގެ ތެޔޮ ޓޭންކަރުތައް ހިމެނޭހެން ތިން އުޅަނދަކަށް ދިން ހަމަލާތަކާ ގުޅިގެން، އީރާނަށް އަމާޒުކޮށް "ބާރުގަދަ ހަމަލާތަކެއް" ދީފައިވާނެ ކަމަށް އެމެރިކާއިން ބުނެފައިވާ ދަނޑިވަޅެއްގަ އެވެ.
މި ހަމަލާތަކަށް ރައްދު ދެމުން އީރާނުން ބުނީ، އެ ގައުމުގެ ހުރްމޮޒްގާން ޕްރޮވިންސަށާއި ބަނދަރުމަތީ ރަށެއް ކަމަށްވާ މަހްޝަހްރަށް ދިން ހަމަލާތަކާ ގުޅިގެން، އެމެރިކާގެ އަސްކަރީ 85 މަރުކަޒަކަށް ހަމަލާދީފައިވާނެ ކަމަށެވެ. މި ހަމަލާތަކާ ގުޅިގެން ބަހްރައިނާއި ކުވެއިތުގައި ވަނީ ނުރައްކަލުގެ ސައިރަންގެ އަޑު ގުގުމާލާފަ އެވެ.
މީގެ އިތުރުން، ޖޫން މަހުގެ 17 ވަނަ ދުވަހު ވޮޝިންޓަނާއި ތެހެރާނާ ދެމެދު ސޮއިކުރި ވަގުތީ ސުލްހައިގެ އެއްބަސްވުމުގެ ދަށުން، އީރާނަށް ތެޔޮ ވިއްކުމަށް ދީފައިވާ ހުއްދަވެސް އެމެރިކާއިން މިހާރު ވަނީ ބާތިލުކޮށްފަ އެވެ.
އީރާނުގެ ދެކުނުގެ ޕްރޮވިންސެއް ކަމަށްވާ ބުޝެހްރުގައި ހުންނަ އެ ގައުމުގެ އަސްކަރީ ދެ މަރުކަޒަކަށް ހަމަލާތަކެއް އަމާޒުވެފައިވާ ކަމަށް އެ ގައުމުން ވަނީ ރިޕޯޓްކޮށްފަ އެވެ.
އީރާނުގެ ސެމީ-އޮފިޝަލް ނޫސް އެޖެންސީއެއް ކަމަށްވާ "ފާސް" ނިއުސް އެޖެންސީން ބުޝެހްރު ޕްރޮވިންސްގެ ގަވަރުނަރުގެ ސެކިއުރިޓީ އޮފިޝަލަކާ ހަވާލާދީ ރިޕޯޓްކޮށްފައިވާ ގޮތުގައި، އެ ޕްރޮވިންސްގައި ހުރި އަސްކަރީ ދެ މަރުކަޒަކަށް ހަމަލާދީފައިވަނީ ދުޝްމަނުން ފޮނުވާލި މިސައިލް ނުވަތަ ރޮކެޓް ފަދަ އާލާތްތަކެއް ބޭނުންކޮށްގެންނެވެ.
