ކުޑަކުދިންގެ ހެދިބޮޑުވުމާ ބެހޭ ބަލިތަކަށް ޚާއްސަވި ފުރަތަމަ ދިވެހި ޑޮކްޓަރު، ޑރ. ފަޒުނާ ނިޔާވެއްޖެ
9 ޖުލައި 2026 | ބުރާސްފަތި 12:49އޯޓިޒަމާއި އޭޑީއެޗްޑީ ފަދަ ކަންކަން ދެނެގަތުމަށް ރާއްޖޭގައި އެސެސްމެންޓްތައް ތައާރަފުކޮށްދެއްވި ޑރ. ފަޒުނާ ނިޔާވުމަކީ ސިއްހީ ދާއިރާއަށް ލިބުނު ބޮޑު އުނިކަމެއް.
އޯޓިޒަމް އާއި އޭޑީއެޗްޑީ ފަދަ ބަލިތަކަށް ޚާއްސަވި ރާއްޖޭގެ ފުރަތަމަ ޑޮކްޓަރު، ޑރ. ފަޒުނާ: އޭނާ ނިޔާވީ ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް | ފަޔާޒު މޫސާ / މިހާރު
ކުޑަކުދިންގެ ހެދިބޮޑުވުމާ ބެހޭ ބަލިތަކަށް ޚާއްސަވި ފުރަތަމަ ދިވެހި ޑޮކްޓަރު، ޑރ. އައިމިނަތު ފަޒުނާ، ކެންސަރު ބައްޔަށް ފަރުވާ ހޯއްދަވަމުން ދަނިކޮށް ނިޔާވެއްޖެ އެވެ.
މައުލޫމާތު ލިބިފައިވާ ގޮތުގައި ޑރ. ފަޒްނާ ނިޔާވީ ކެންސަރު ބައްޔަށް ފަރުވާ ހޯއްދަވަމުން ގެންދަވަނިކޮށް، ބުރާސްފަތި ދުވަހު މާލޭގަ އެވެ. މީގެ ދުވަސްކޮޅެއް ކުރިން ފެށިގެން އޭނާ ގެންދެވީ އައިޖީއެމްއެޗްގައި އެޑްމިޓްކޮށްގެން ފަރުވާ ހޯއްދަވަމުންނެވެ.
ޑރ. ފަޒްނާއަކީ ރާއްޖޭގެ ސިއްހީ ދާއިރާއަށް އަގުހުރި ޚިދުމަތްތަކެއް ކުރެއްވި ބޭފުޅެކެވެ. އެމްބީބީއެސް ނިންމެވުމަށްފަހު 2018 ވަނަ އަހަރު އައިޖީއެމްއެޗާ ގުޅިވަޑައިގެންނެވި ޑރ. ފަޒްނާ، 2021 ވަނަ އަހަރު މެލޭޝިއާގެ ކެބަންސާން ޔުނިވާސިޓީގައި ދެ އަހަރު ދުވަހު މަތީ ތައުލީމު ހާސިލުކުރެއްވި އެވެ.
އޭގެ ފަހުން އެމެރިކާގެ ކެލިފޯނިއާ ޔުނިވާސިޓީގައި އޯޓިޒަމް ފަދަ ބަލިތައް ދެނެގަތުމަށް ޚާއްސަވާ "ޑިވެލޮޕްމަންޓަލް ޕީޑިއެޓްރީޝަން" ދާއިރާއިން ތަމްރީނު ފުރިހަމަކުރެއްވި އެވެ. މި ރޮނގުން ތައުލީމު ހާސިލުކުރެއްވުމަށްފަހު އަލުން އައިޖީއެމްއެޗާ ގުޅިވަޑައިގެން ބަލިމީހުން ބައްލަވަން ފެއްޓެވީ މިއަހަރުގެ ކުރީކޮޅުގަ އެވެ.
ޑރ. ފަޒްނާއަކީ ރާއްޖޭގައި އޯޓިޒަމް ދެނެގަތުމަށް ޚާއްސަވި ފުރަތަމަ ދިވެހި ޑޮކްޓަރެވެ. އޭނާ ވަނީ އޯޓިޒަމްއާއި، އޭޑީއެޗްޑީ އަދި އުނގެނުމުގެ އުނދަގޫތައް ހުންނަ ކުދިން ދެނެގަތުމަށް ހަދާ އެސެސްމެންޓްތައް ތައާރަފުކޮށް، އެފަދަ ކުދިންނަށް އެހީތެރިކަން ފޯރުކޮށްދިނުމުގައި ނަމޫނާ މަސައްކަތްތަކެއް ކުރައްވާ ފައެވެ.
ޑރ. ފަޒުނާގެ ކަށުނަމާދު އޮންނާނީ ބުރާސްފަތި ދުވަހުގެ ރޭ އިޝާ ނަމާދަށްފަހު، މާލޭ އާސަހަރާ މިސްކިތުގަ އެވެ. ޑރ. ފަޒްނާގެ ވަކިވުމަކީ ރާއްޖޭގެ ސިއްހީ ދާއިރާއަށާއި، ޚާއްސަކޮށް ނުކުޅެދުންތެރިކަން ހުންނަ ކުދިންގެ އާއިލާތަކަށް ލިބުނު ބޮޑު ހިތާމައެއްކަން ގިނަ ބަޔަަކު ދަީ ފާހަގަކުރަމުންނެވެ.
