މުއިއްޒޫ! ހެޕީތަ؟

މުއިއްޒޫ އެވެ. ބާރަށު ދާއިރާގެ މެންބަރު ސުޖާ ވިދާޅުވަމުން ގެންދަވަނީ "ހެޕީ" ކަމަށެވެ. ރައްޔިތުން ހެޕީ ކަމަށެވެ. ނުތަނަވަސްކަމެއް ނެތްކަމަށެވެ. ހުރިހާ ކަމެއްވެސް ބަރާބަރު ކަމަށެވެ.

މުއިއްޒޫ އެވެ. މަށަށް ހަމަ ޔަގީނުންވެސް ސުޖާ އެހެން ވިދާޅުވީމާ މުއިއްޒު ހެޕީވާނެ އެވެ. ބޮޑުތަނުން ހެޕީވާނެ އެވެ. ބާރަށް އަތް ޖައްސަވާނެކަންވެސް އެނގެ އެވެ.

މުއިއްޒޫ އެވެ. ސުޖާ ވިދާޅުވީ ޑޮލަރު ލިބޭ ކަމަށެވެ. ދައްޗެއް ނެތްކަމަށެވެ. ވަރަށް ބަރާބަރެވެ. މުއިއްޒުއަށާއި ސުޖާއަށް ބޭނުން އިރަކު ބޭނުން ވަރަކަށް އަސްލު ރޭޓުގައި ބޯކޮށް ޑޮލަރު ލިބޭނެއެވެ. ކުޑައިކޮށްވެސް އެކަމަކަށް ޝައްކެއް ނުކުރަމެވެ. އެކަމާ ހެޕީވާނެ ކަންވެސް ދެނެހުރީމެވެ.

އެކަމަކު ރައްޔިތުމީހާ ދޯއެވެ. މަޖިލީސް މެޖޯރިޓީ ލިބުނިއްޔާ ދެއަހަރު ތެރޭ 15.42 އަށް ޑޮލަރުގެ އަގު ދައްކުރާނަމޭ އިކޮނޮމިކް މިނިސްޓަރ ސައީދު ވިދާޅުވީމާ ރައްޔިތުން އޭރު ހެޕީވި އެވެ. ވިޔަފާރިވެރިންވެސް އެހާމެ ހެޕީވި އެވެ. އަދި މުއިއްޒު މާ ހެޕީވިކަން އޭރުވެސް މަށަށް އެނގުނެވެ. އެއީ ސައީދު އެވިދާޅުވި ވިދާޅުވުމަށް ރައްޔިތުން ވޯޓުދީ މަޖިލިސް ނަގައިދިނީމައެވެ.

މުއިއްޒޫ އެވެ. މުއިއްޒު އަތްޕުޅުން ހަންދާވަރަށް އެކަމާ އަތްޖެއްސެވިދާނެ އެވެ. އަތްގުޅި ނުކާވަރުގެ ސުޕަރ މެޖޯރިޓީއަކާއެކު މަޖިލީހަށް ވީހާ ދުވަހެއް ވަނީ އެވެ. ތިޔަބުނާ އަގުވީ ދަށެއް ނޫނެވެ. އަދިވެސް އެދަނީ ދިމާ މައްޗަށެވެ. މިހާރު އެކާވީހަށް ބާވީހަށް އަރަނީ އެވެ. ރައްޔިތުމީހާ ހެޕީއެއް ނޫނެވެ. ހަމަ އެއްގޮތަކަށްވެސް ހެޕީއެއް ނޫނެވެ.

މުއިއްޒޫ އެވެ. ސުޖާ ވިދާޅުވީ އާސަންދައިން ބޭރަށްދާން ބޭންކުން ދެހާސް ޑޮލަރު ދޭ ކަމަށެވެ. ރައްޔިތުން ހެޕީވާނެ އެވެ. މަހަމަ ކޮސްވެއްޖެއެވެ. ކުރިން އެބުނާ ދެހާސް ޑޮލަރު ލިބެނީ އެންމެ ބޭންކަކުން ނޫނެވެ. ކިތަންމެ ބޭންކަކުން ލިބެ އެވެ. އޭރު ރައްޔިތުން ހެޕީ އެވެ. އެކަމަކު މުއިއްޒު ތިޔަ ގެންނެވި މޮޅު ބަދަލާއެކު މިހާރު އާސަންދަ ލިއުމަށް ލިބޭނީ އެންމެ ބޭންކަކުން 2000 ޑޮލަރު އެކަންޏެވެ. ބޮޑު ބައްޔަކަށް ބޭރުގައި މަޑުކުރަން ޖެހުނީމާ އެއީ ރައްޔިތުން ހެޕީވާނެ އެއްޗެއް ހެއްޔެވެ. ނޫނެކެވެ. އެކަމަކު ސުޖާ އެވާހަކަ ވިދާޅު ނުވެ މަނިކުފާނު ބޭނުންފުޅުގޮތައް ވިދާޅުވީމާ މަނިކުފާނު ހެޕީ އެވެ. ރައްޔިތު މީހާ ހެޕީ އެއް ނޫނެވެ.

މުއިއްޒޫ އެވެ. ކުރިން ކުޑަ ދަރިފުޅުގެ ބުއްދަޅާ ނެޕީ ބޮނޑި ގަންނަން ލިބޭ ވަރަށް މިހާރު ނުލިބޭކަން އެންމެބޮޑަށް އެނގިލައްވާނެ އެއްބޭފުޅަކީ ސީދާ ސުޖާ އެވެ. އެކަމަކު އެވާހަކަ ވިދާޅު ނުވީމާ މަނިކުފާނު ހެޕީ އެވެ. ވަރަށް ބޮޑަށް ހެޕީ އެވެ. ރައްޔިތުންނަށް އޮޅުވާލެވުނު ކަމަށެވެ. އެކަމަކު އެގަންނަންދާ އާއްމު މީހާއަށް މިހާރު އެ އެއްޗެހި ގަނެވޭވަރު ނުވީމާ އޭނާ ހެޕީއެއް ނޫނެވެ. ރައްޔިތު މީހާ ހެޕީއެއް ނޫނެވެ.

މުއިއްޒޫ އެވެ. ހަމަ ހައިރާންވެ އަންތަރީސް ވެއްޖެ އެވެ. ސިއްހީ ދާއިރާއަށް އައި ކުރިއެރުމާއި އާސަންދައާއި ބޭސް ލިބޭ ވާހަކަ ވިދާޅުވީމާ ގަދައަށް ހިނިފުޅުވަޑުވާފައި މަނިކުފާނު ތިޔަ ހުންނެވީ ހެޕީވެފަ އެވެ. ތެދެކެވެ. މަނިކުފާނާއި މަނިކުފާނުގެ މަޖިލިސް މެންބަރުންކޮޅު ބަލިވީމާ ބޭސްކުރާނީ ސިންގަޕޫރުންނާއި ދުނިޔޭގެ އެތަން މިތަނުންނެވެ. މަނިކުފާނު ހެޕީ އެވެ. އެކަމަކު އައިޖީއެމްއެޗުން ޑޮކްޓަރަށް ދެއްކުމުގެ ކިއޫ އިވިފައި ސަހަރޯ ހީވާ ރައްޔިތު މީހާ ހެޕީއެއް ނޫނެވެ. ހަމަ އެހެންމެ ލިޔެދޭ ބޭސް ސިޓީ ހިފައިގެން ތިންމުގޯލި ކުޅޭހެން ރައްޔިތު މީހާ ހިނގާ ހިނގާ ބަލިވާއިރުވެސް ބޭސް ނުލިބުނީ ރައްޔިތު މީހަ ހެޕީއެއް ނޫނެވެ. ތެދެކެވެ. މަނިކުފާނާ މަނިކުފާނުގެ މަޖިލިސް މެންބަރުންކޮޅު ބޭނުން މަދު ބަޔަކަށް ތިޔަބުނާ ބެންކޮކް އާސަންދަވެސް ލިބިދާނެ އެވެ. އެލިބުނިއްޔާ ލިބުނު ބަޔަކާ މަނިކުފާނާ ސުޖާވެސް ހެޕީވެދާނެ އެވެ. އެކަމަކު ބޮޑު ބައްޔެއް ވެގެން ރާއްޖެއިން ފަރުވާ ނުލިބި ބޭރަށް ދެވޭނެ ގޮތެއް ނެތިފައިތިބޭ ނިކަމެތި މީހާ ހެޕީ އެއް ނޫނެވެ.

މުއިއްޒޫ އެވެ. މަށަކު ދެން އިތުރަކަށް މި ހެޕީ ލިސްޓެއް ނުކިޔާނަމެވެ. ނިންމާލާނަމެވެ. އެކަމަކު މުއިއްޒު ރުއްސަން މުއިއްޒު ގެންގުޅޭ އަޅުކުދިންކޮޅު ކުންފުނިތަކުގެ މުވައްޒަފުންނަށް ބިރުދައްކައިގެން ތިޔަ ހެންވޭރުކޮޅަށް އެއްކުރާތީ ފެނިވަޑައިގަންނަވާ މަންޒަރު ފެނިފައި މުިއްޒު ކިތަންމެހާވެސް ހެޕީވެދާނެވެ. އެވެރިން އިސްޖަހައިގެންތިބެ އެޖަހާ އަތްތިލަބަޑިތަކުން މުިއްޒު ހެޕީވެ ނިދިވެސް ނުކުރެއްވިދާނެ އެވެ. އެކަމަކު ވަޒީފާގެ ބިރާ، އަނބިދަރިން ނިކަމެތިވެދާނެތީ އޮތް ބޮލުގެ ރިހުމަށް އެވެރިން ސުއްބުވެސް ނުބުނެ އެތަނަށް ދިޔަޔަސް ހެޕީއެއް ނޫނެވެ. އެއްގޮތަކަށްވެސް ރައްޔިތު މީހާ ހެޕީއެއް ނޫނެވެ. މުއިއްޒުއާއި ސުޖާ އަދި ހަކުރު ދޭތީ ބޮޑުބޭބެވެގެން ތިޔައުޅޭ ކުދިންކޮޅު ހެޕީ ވެދާނެ އެވެ. ބޮޑުތަނުން ހެޕީ ވެދާނެ އެވެ.