ހުޅުމާލޭގައި ސައިކަލެއް ކޮންޓްރޯލުން ނެއްޓި، މަގު ހުރަސްކުރި މީހެއްގެ ގައިގައި ޖެހިއްޖެ
ހުޅުމާލޭގެ ދެވަނަ ފިޔަވަހީގައި ބާރުމިނުގައި ދުއްވާފައިދިޔަ ސައިކަލެއް ކޮންޓްރޯލުން ނެއްޓި، ކަފިހިހުރަހުން މަގު ހުރަސްކުރި މީހެއްގެ ގައިގައި ޖެހި ނުރައްކާތެރި އެކްސިޑެންޓެއް ހިނގައިފި. މި ހާދިސާގައި އަނިޔާވި ދިވެހި ފިރިހެން މީހާ އަށް އައިޖީއެމްއެޗްގެ ވޯޑުގައި އެޑްމިޓްކޮށްގެން ފަރުވާދެމުންދާއިރު، ފުލުހުން ދަނީ މި މައްސަލަ އިތުރަށް ތަހުގީގު ކުރަމުން.
މީގެ ކުރިން ހުޅުމާލޭގައި އެކްސިޑެންޓެއް ހިނގި ސަރަހައްދުގައި ފުލުހުން ހަރަކާތްތެރިވަނީ. | ސަން
ހުޅުމާލޭގެ ދެވަނަ ފިޔަވަހީގައި ބާރު ސްޕީޑްގައި ދުއްވާފައިދިޔަ ސައިކަލެއް ކޮންޓްރޯލުން ނެއްޓި، ކަހާލައިގެން ގޮސް ކަފިހިހުރަހުން މަގު ހުރަސްކުރި މީހެއްގެ ގައިގައި ޖެހި ނުރައްކާތެރި އެކްސިޑެންޓެއް ހިނގައިފި އެވެ.
މި ހާދިސާގައި އަނިޔާވި މީހާއަށް މިހާރު އަންނަނީ އައިޖީއެމް ހޮސްޕިޓަލުގައި ފަރުވާ ދެމުންނެވެ.
ފުލުހުންގެ އިދާރާ އިން މައުލޫމާތު ދީފައިވާ ގޮތުގައި، މި އެކްސިޑެންޓް ހިނގާފައިވާ ކަމުގެ ރިޕޯޓު އެ މުއައްސަސާ އަށް ލިބިފައިވަނީ އާދީއްތަ ދުވަހުގެ ރޭ 9:26 ހާއިރު އެވެ. މި ހާދިސާ ހިނގާފައިވަނީ ހުޅުމާލެ ފޭސް ދޭއްގެ ހިތިގަސް މަގުން އުތުރުން ދެކުނަށް ދުއްވާފައިދިޔަ ސައިކަލެއް ކޮންޓްރޯލް ނުވެ ކަހާލައިގެން ގޮސް، އެ ވަގުތު ކަފިހިހުރަހުން މަގު ހުރަސްކުރަން އުޅުނު މީހެއްގެ ގައިގައި ޖެހިގެންނެވެ.
މި އެކްސިޑެންޓުގައި އަނިޔާވެފައިވަނީ ދިވެހި ފިރިހެނަކަށެވެ. އޭނާއަށް ލިބުނު އަނިޔާތަކާ ގުޅިގެން ފުރަތަމަ އެހީތެރިކަން ފޯރުކޮށްދިނުމަށްފަހު، އިތުރު ފަރުވާއަށް ވަނީ މާލޭގައި ހުންނަ އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް ގެންގޮސްފަ އެވެ. ފުލުހުން ބުނި ގޮތުގައި އެ މީހާއަށް އެކި ވަރުގެ އަނިޔާ ލިބިފައިވާއިރު، މިހާރު އޭނާއަށް ފަރުވާ ދެމުންދަނީ އެ ހޮސްޕިޓަލުގެ ވޯޑުގައި އެޑްމިޓް ކޮށްގެންނެވެ.
އައިޖީއެމްއެޗުން ވެސް ވަނީ އެ މީހާ އެ ހޮސްޕިޓަލަށް ގެނެސް ފަރުވާ ދެމުންދާކަން ކަށަވަރުކޮށްދީފައެވެ. ނަމަވެސް އޭނާއަށް ލިބިފައިވާ އަނިޔާތަކުގެ ތަފްސީލެއް ހޮސްޕިޓަލުން އަދި ހާމައެއް ނުކުރެ އެވެ. މި ހާދިސާގައި ސައިކަލު ދުއްވަން އިން މީހާއަށް ލިބުނު އަނިޔާއެއް ނުވަތަ އޭނާގެ ހާލަތާ ގުޅޭގޮތުން ފުލުހުން ވެެސް ވަކި އެއްޗެއް ބުނެފައެއް ނުވެ އެވެ.
މި އެކްސިޑެންޓާ ގުޅިގެން ބަލަންޖެހޭ ކަންކަން ބަލައި، މައްސަލަ އިތުރަށް ތަހުގީގު ކުރަމުންދާ ކަމަށް ފުލުހުން ވަނީ ބުނެފަ އެވެ.
