ޢަރަބި ލީގުގެ ސެކްރެޓަރީ ޖެނެރަލްގެ ދަތުރަށް އިސްރާއީލުން ހުރަސްއަޅައިފި

ޢަރަބި ލީގުގެ އާ ސެކްރެޓަރީ ޖެނެރަލް ނަބީލް ފަހުމީ މި މަހު މަގާމާ ހަވާލުވެވަޑައިގަތުމަށްފަހު، ރާމަﷲ އަށް ކުރައްވަން އުޅުއްވި ފުރަތަމަ ރަސްމީ ދަތުރުފުޅަށް އިސްރާއީލުން ހުރަސްއަޅާފައިވާ ކަމަށް ބުދަ ދުވަހު އޭނާ ވިދާޅުވެއްޖެ އެވެ.

ފަހުމީގެ އޮފީހުން ނެރުނު ބަޔާނެއްގައި ބުނެފައިވަނީ، ފަލަސްތީނުގެ ރައީސް މަހްމޫދު އައްބާސްއާ ބައްދަލުކުރެއްވުމަށް ރާމަﷲ އަށް ކުރައްވަން އުޅުއްވި ދަތުރުފުޅަށް، "އިސްރާއީލުގެ އިސްތިއުމާރީ ބާރުތަކުން ހުރަސްއަޅާފައިވާކަން" ފަލަސްތީނުގެ ކަމާބެހޭ ފަރާތްތަކުން ޢަރަބި ލީގުގެ ސެކްރެޓޭރިއަޓަށް އަންގާފައިވާ ކަމަށެވެ.

ރައީސް މަހްމޫދު އައްބާސްގެ ސަރުކާރުން ބަލަހައްޓަމުން ގެންދަނީ 1967 ވަނަ އަހަރުން ފެށިގެން އިސްރާއީލުން ހިފާފައިވާ ހުޅަނގު އައްސޭރީގެ ބައެއް ސަރަހައްދުތަކެވެ.

2023 ވަނަ އަހަރު ގާޒާ ހަނގުރާމަ ފެށުނު ފަހުން، ހުޅަނގު އައްސޭރީގައި އިސްރާއީލު ސިފައިން ހިންގާ އަސްކަރީ އޮޕަރޭޝަންތަކާއި، ޔަހޫދީ ވަޒަންވެރިން ދޭ ނުރައްކާތެރި ހަމަލާތަކުގެ އިތުރުން، ބައިނަލްއަގުވާމީ ގާނޫނުތަކާ ޚިލާފަށް ހަދާފައިވާ ޔަހޫދީ އާބާދީތައް ފުޅާކުރުމުގެ ސަބަބުން އެ ސަރަހައްދުގެ މަސްލަހަތު ވަނީ ވަރަށް ބޮޑަށް ގޯސްވެފަ އެވެ.

ފަހުމީ ވިދާޅުވި ގޮތުގައި، އެ ސަރަހައްދުގައި ދިރިއުޅޭ ފަލަސްތީނު ރައްޔިތުން ތިބީ އެމީހުންގެ އަވަށްތަކާއި ސިޓީތަކުގައި ބަންދުވެފަ އެވެ. އަދި އެ ސަރަހައްދުތައް ވަށާލާފައިވަނީ ފުޅާވަމުންދާ ޔަހޫދީ އާބާދީތަކާއި ވަޒަންވެރިންނަށް ޚާއްސަ މަގުތަކުން ކަމަށާއި، އިސްރާއީލު ސަރުކާރުގެ ހިމާޔަތާއި ހިތްވަރު ލިބިގެން ޔަހޫދީ ވަޒަންވެރިން ހިންގާ ލާއިންސާނީ އަމަލުތަކާއި ޓެރަރިޒަމްގެ ޝިކާރައަކަށް ފަލަސްތީނު ރައްޔިތުން ވަމުންދާ ކަމަށް އޭނާ ވިދާޅުވި އެވެ.

މިސްރުގެ ތަޖުރިބާކާރު ޑިޕްލޮމޭޓެއް ކަމަށްވާ ނަބީލް ފަހުމީ، ގާހިރާގައި މަރުކަޒުވެފައިވާ 22 ގައުމު ހިމެނޭ ޢަރަބި ލީގުގެ އިސްވެރިޔާގެ މަގާމާ ހަވާލުވެވަޑައިގަތީ، ސަރަހައްދީ އެއްބައިވަންތަކަން ގާއިމުކުރުމަށް އުފައްދާފައިވާ މި ޖަމާއަތުގެ މައިގަނޑު މަސައްކަތްތައް ފަލަސްތީނުގެ މައްސަލައަށް އެކަނި ހުސްވެފައިވާ ދަނޑިވަޅެއްގަ އެވެ.

ފަލަސްތީނުގެ ހެލްތު މިނިސްޓްރީގެ ތަފާސްހިސާބުތަކަށް ބިނާކޮށް އޭއެފްޕީން އެކުލަވާލާފައިވާ ރިޕޯޓެއް ބުނާގޮތުން، 2023 ވަނަ އަހަރުގެ އޮކްޓޫބަރު މަހުން ފެށިގެން ހުޅަނގު އައްސޭރީގައި އިސްރާއީލު ސިފައިންނާއި ޔަހޫދީ ވަޒަންވެރިން ދިން ހަމަލާތަކުގައި ފަލަސްތީނުގެ މަދުވެގެން 1،087 މީހުން ވަނީ މަރުވެފައެވެ. މީގެ ތެރޭގައި ހަނގުރާމަވެރިންނާއި އާންމު ރައްޔިތުންވެސް ހިމެނެ އެވެ.