އިސްރާއީލުގެ ފުލުހަކު ފަލަސްތީނު މީހުން ތިބި ކާރެއްގެ ތެރެއަށް ސްޓަން ގްރެނޭޑެއް އެއްލުމަށްފަހު، ކާރުގެ ދޮރު ބަންދުކޮށްގެން ހިފަހައްޓައިގެން ހުންނަ ބިރުވެރި މަންޒަރު ފެންނަ ވީޑިއޯއެއް އާންމުވެއްޖެ

އިސްރާއީލުގެ ބޯޑަރ ޕޮލިސް އޮފިސަރަކު، ފަލަސްތީނު މީހުން ތިބި ކާރެއްގެ ތެރެއަށް ސްޓަން ގްރެނޭޑެއް  އެއްލުމަށްފަހު، އެ ގޮވުމުގެ ކުރިން ކާރުގެ ދޮރު ބަންދުކޮށްގެން ހިފަހައްޓައިގެން ހުންނަ މަންޒަރު ފެންނަ ވީޑިއޯއެއް އާންމުވެއްޖެ އެވެ.

އިރުމަތީ ގުދުސްގެ ގަލަންދިޔާ ރެފިއުޖީ ކޭމްޕުގައި ހިނގި މި ބިރުވެރި ހާދިސާ ފެންނަ ވީޑިއޯއާ ބެހޭގޮތުން އިސްރާއީލުގެ "ހާރެޓްޒް" ވެބްސައިޓުން ރިޕޯޓްކޮށްފައިވެ އެވެ.

މި ހާދިސާއާ ގުޅިގެން އެ އޮފިސަރުގެ މައްޗަށް މިހާރު ވަނީ އިސްލާހީ ފިޔަވަޅު އެޅުމުގެ މަސައްކަތް ފަށާފައިކަމަށް ރިޕޯޓުކޮށްފައިވެ އެވެ. އިސްރާއީލުގެ ކަމާބެހޭ އިދާރާތަކުން ބުނެފައިވަނީ އެ އޮފިސަރު އަމަލުކޮށްފައިވަނީ ކަނޑައެޅިފައިވާ އުސޫލުތަކާ ޚިލާފަށް ކަމަށާއި، ޖަސްޓިސް މިނިސްޓްރީގެ ފުލުހުންގެ މައްސަލަތައް ތަހުގީގުކުރާ ޑިޕާޓްމަންޓުން މި މައްސަލަ ބަލަމުންދާ ކަމަށެވެ.

ރިޕޯޓްތައް ބުނާގޮތުގައި، ކާރުގެ ތެރޭގައި ތިބި މީހުންނާ ދިމާލަށް "އަނގަ މަޑުންލައިގެން ތިބޭށޭ، ތިޔަ ވާހަކަ ދައްކަނީ ކާކާ ހެއްޔެވެ؟" މިފަދައިން އެ އޮފިސަރު ބުނާ އަޑު ވީޑިއޯއިން އިވެ އެވެ.

އެއަށްފަހު، އޮފިސަރު ކާރުގެ ތެރެއަށް ގްރެނޭޑް އެއްލާލާ މަންޒަރު ފެނެއެވެ. އެ ވަގުތު ކާރުގައި އިން އެކަކު އަނެއް ފަރާތު ދޮރުން ފުންމާލައިގެން ސަލާމަތްވި ނަމަވެސް، ކާރު ދުއްވަން އިން މީހާ އިނީ ކާރުގެ ތެރޭގައި ތާށިވެފަ އެވެ.

ސްޓަން ގްރެނޭޑަކީ އާންމުކޮށް މުޒާހަރާތައް ރޫޅާލުމަށް ބޭނުންކުރާ އެއްޗެކެވެ.