ޣައްޒާގައި ވޯލްޑް ކަޕް މެޗުތައް ދެއްކުމުގެ އިންތިޒާމުގައި އުޅުނު ފަރާތްވެސް އިސްރާއީލުން ޝަހީދު ކޮށްލައިފި

ޣައްޒާގައި ވޯލްޑް ކަޕް މެޗުތައް ބެލުމަށް ސްކްރީންތައް ބެހެއްޓުމުގެ މަސައްކަތުގައި އިސްކޮށް އުޅުނު ފަލަސްތީނުގެ އެހީދޭ ޖަމާއަތެއްގެ އިސް އޮފިޝަލަކު، މިސްރާއި އާޖެންޓީނާ ބައްދަލުކުރި މެޗު ފެށެން ކުޑަވަގުތުކޮޅަކަށް ވެފައި ވަނިކޮށް އިސްރާއީލުން ދިން ހަމަލާއެއްގައި މަރާލައިފި ކަމަށް އެ ސަރަހައްދުގެ ސިއްހީ އޮފިޝަލުން ހާމަކޮށްފި އެވެ.

އަރަބި ޓީމަކުން އާޖެންޓީނާ ބަލިކޮށްފާނެ ކަމުގެ އުންމީދުގައި، އުފާވެރި މާހައުލެއްގައި މެޗު ބަލަން ތައްޔާރުވަމުން ދަނިކޮށް ދިން މި ހަމަލާއަކީ، މިދިޔަ އޮކްޓޯބަރު މަހު ހަމަލާ ބަދަލުކުރުން ހުއްޓާލުމުގެ އެއްބަސްވުމަކަށް އައި ފަހުން ވެސް، އިސްރާއީލުން މެދުކެނޑުމެއް ނެތި އާންމުންނަށް އަމާޒުކޮށް ދެމުންދާ ހަމަލާތަކުގެ އިތުރު އުދުވާނެކެވެ.

އަންގާރަ ދުވަހުގެ އިރުއޮއްސުނު ވަގުތު ޣައްޒާ ސިޓީގެ ސަބްރާ އަވަށުގައި ދުއްވާފައި ދިޔަ ކާރަކަށް އަމާޒުކޮށް ދިން މި ބޮމުގެ ހަމަލާގައި، ޣައްޒާގައި ހުންނަ އިޖިިޕްޝަން ކޮމިޓީގެ އޮފިޝަލެއް ކަމަށްވާ މުހައްމަދު އަލް-ވަހީދީ އާއި، އެ ސަރަހައްދުން ހިނގާފައި ދިޔަ 10 އަހަރުގެ ހަމްޒާ އަލް-ދޭރީ އާއި އޭނާގެ 8 އަހަރުގެ ކޮއްކޮ ފާރީ ވަނީ ޝަހީދުވެފަ އެވެ. މީގެ އިތުރުން ކާރު ދުއްވަން އިން 33 އަހަރުގެ އަހުމަދު ދަގްމުޝް ވެސް މި ހަމަލާގައި ޝަހީދުވި ކަމަށް، ހަތަރު މީހުންގެ ހަށިގަނޑު ގެންދެވުނު ޝިފާ ހޮސްޕިޓަލުގެ ޑިރެކްޓަރު ޑޮކްޓަރު މުހައްމަދު އަބޫ ސަލްމިއްޔާ ވިދާޅުވި އެވެ.

އިސްރާއީލު ސިފައިން ބުނި ގޮތުގައި، ފުޓްބޯޅަ މެޗުތައް ދެއްކުމުގެ އިންތިޒާމުތަކުގައި އުޅުނު އަލް-ވަހީދީއަކީ އެމީހުންގެ އަމާޒެއް ނޫނެވެ. އެ ހަމަލާއަކީ ހަމާސްގެ ހަނގުރާމަވެރިއަކަށް އަމާޒުކޮށް ދިން ހަމަލާއެއް ކަމަށާއި، ކާރު ދުއްވަން އިން ދަގްމުޝްއަކީ އެމީހުން ހޯދަން ބޭނުންވި މީހާާތޯ ބަލަމުންދާ ކަމަށް އިސްރާއީލުން ބުނެފައިވެ އެވެ.

ނަމަވެސް ޑޮކްޓަރު އަބޫ ސަލްމިއްޔާ ވިދާޅުވި ގޮތުގައި، ދަގްމުޝްއަކީ ޓެކްސީ ޑްރައިވަރެކެވެ. އަދި އޭނާއަކީ އެއްވެސް ހަނގުރާމަވެރި ޖަމާއަތަކާ ގުޅުން އޮންނަ މީހެއް ކަމަށް އެނގިފައެއް ނުވެ އެވެ.

މި ހަމަލާ ދިނުމުގެ ބައިގަޑިއިރު ކުރިން ވެސް އިސްރާއީލުން ވަނީ އެ މަގަށް ހަމަލާއެއް ދީފަ އެވެ. ނަމަވެސް އެ ހަމަލާގައި އެއްވެސް މީހަކަށް އަނިޔާއެއް ލިބިފައެއް ނުވެ އެވެ.

އަލް-ވަހީދީ މަސައްކަތް ކުރަމުންދިޔަ ކޮމިޓީއަކީ މިސްރު ސަރުކާރުގެ އެހީދޭ ގޮފީގެ ދަށުން ހިންގާ، ޣައްޒާގެ ރައްޔިތުންނަށް ކާބޯތަކެއްޗާއި ބޯހިޔާވަހިކަން ފޯރުކޮށްދޭ އިދާރާއެކެވެ. ޣައްޒާގެ އެކި ސަރަހައްދުތަކުގައި ބޮޑު ސްކްރީން ބަހައްޓައިގެން ފުޓްބޯޅަ މެޗުތައް ދެއްކުމުގެ އިންތިޒާމު ހަމަޖެއްސީ ވެސް އެ ކޮމިޓީންނެވެ.

އިސްރާއީލާއި ހަމާސްއާ ދެމެދު ހަމަލާ ބަދަލުކުރުން ހުއްޓާލުމަށް މެދުވެރިއެއްގެ ދައުރު އަދާކުރި މިސްރަކީ، ފަލަސްތީނުގެ ގިނަ އަދަދެއްގެ ރައްޔިތުން ހިޖުރަކޮށްގެން ދިރިއުޅެމުންދާ ގައުމެކެވެ.

މި މުބާރާތް ފެށުނީއްސުރެ ޣައްޒާގައި މިސްރު ޓީމަށް ސަޕޯޓްކުރާ މީހުންގެ އަދަދު ވަނީ ވަރަށް ބޮޑަށް އިތުރުވެފަ އެވެ. އެއީ އެ ޓީމުގެ ކޯޗު ހުސާމް ހަސަން، ނޫސްވެރިންގެ ބައްދަލުވުންތަކުގައާއި ދަނޑުމަތީގައި ފަލަސްތީނުގެ ރައްޔިތުންގެ ހާލަތާ ގުޅޭގޮތުން އަޑުއުފުލަމުންދާތީ އެވެ. މިދިޔަ ހުކުރު ދުވަހު އޮސްޓްރޭލިއާ އަތުން މިސްރު މޮޅުވި މެޗު އޭނާ ހަދިޔާކުރީ މިސްރާއި ފަލަސްތީނުގެ ރައްޔިތުންނަށެވެ. އަދި އެ މެޗަށްފަހު އޭނާ ވަނީ ދަނޑުމަތީގައި ފަލަސްތީނުގެ ދިދަ ވިހުރުވާފަ އެވެ.

ހޯމަ ދުވަހު އާޖެންޓީނާ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި ވެސް، ފަލަސްތީނުގެ ރައްޔިތުންނަށްޓަކައި ދުނިޔެއިން މިއަށްވުރެ ބޮޑަށް މަސައްކަތް ކުރުމަށް ހަސަން ވަނީ ގޮވާލާފަ އެވެ.

"އަޅުގަނޑު ގޮވާލަން، ހުރިހާ މީޑިއާ އޮފިޝަލުންނާއި ދުނިޔޭގެ ހުރިހާ ކުޅިވަރު ކުޅުންތެރިންނަށް، އެމީހުންނަކީ ކޮންމެ ބަޔަކަށް ވީނަމަވެސް، އަޅުގަނޑުމެން އެންމެން ގުޅިގެން އެއް މެސެޖެއް ދެމާ ހިނގާ. އެއީ ފަލަސްތީނުގެ ރައްޔިތުންނަށް އަމާންކަމާއެކު ދިރިއުޅުމުގެ ފުރުސަތު ދިނުމަށާއި، އެމީހުންގެ އަމިއްލަ މިނިވަން ދިރިއުޅުމެއް އުޅުމުގެ ފުރުސަތު ދިނުމަށް،" ހަސަން ވިދާޅުވި އެވެ.

އިސްރާއީލު ސިފައިން ބުނަމުންދަނީ އެމީހުންގެ ހަމަލާތައް އަމާޒުކުރަނީ ހަނގުރާމަވެރިންނަށް ކަމަށެވެ. ނަމަވެސް އޮކްޓޯބަރު މަހު ހަމަލާ ބަދަލުކުރުން ހުއްޓާލުމުގެ އެއްބަސްވުން އަމަލީގޮތުން ހިނގަން ފެށި ފަހުން ވެސް، މަދުވެގެން 1,084 މީހުން މަރުވެފައިވާއިރު، އޭގެ ތެރޭގައި 258 ކުޑަކުދިން ހިމެނެ އެވެ. ހަމަ އެ މުއްދަތުގެ ތެރޭގައި އިސްރާއީލުގެ ފަސް ސިފައިން ވަނީ މަރުވެފަ އެވެ.

ޣައްޒާގެ ހެލްތު މިނިސްޓްރީން ހާމަކޮށްފައިވާ ތަފާސްހިސާބުތަކަށް ބަލާއިރު، އިސްރާއީލާއި ހަމާސްއާ ދެމެދު ކުރިއަށްދާ ހަނގުރާމައިގައި ފަލަސްތީނުން މަރުވި މީހުންގެ އަދަދު މިހާރު ވަނީ 73,110 އަށް އަރާފަ އެވެ. ހަމާސްއިން ހިންގާ ސަރުކާރުގެ ދަށުން މަސައްކަތްކުރާ މި މިނިސްޓްރީގެ ތަފާސްހިސާބުތަކަކީ އދ. ގެ އިދާރާތަކާއި މިނިވަން މާހިރުން އިތުބާރުކުރާ ސައްހަ މައުލޫމާތުތަކެކެވެ. މި ހިސާބުތަކުގައި އާންމުންނާއި ހަނގުރާމަވެރިން ވަކިން ފާހަގަކޮށްފައި ނުވި ނަމަވެސް، މަރުވި މީހުންގެ ދެބައިކުޅަ އެއްބަޔަކީ އަންހެނުންނާއި ކުޑަކުދިން ކަމަށް އެ މިނިސްޓްރީން ބުނެ އެވެ.