އިސްރާއީލުން އިބްރާހީމީ މިސްކިތުގެ ކޮންޓްރޯލް އަތުލައިފި: މީގެ މާނައަކީ ކޮބާ؟

އިސްރާއީލުގެ ފިނޭންސް މިނިސްޓަރު ބެޒަލެލް ސްމޮޓްރިޗް އަންގާރަ ދުވަހު ވިދާޅުވި ގޮތުގައި، ހިފާފައިވާ ހުޅަނގު އައްސޭރީގައި މުސްލިމުންނާއި ޔަހޫދީންގެ މުގައްދަސް ބިނާއެއް ހުރި އިބްރާހީމީ މިސްކިތުގެ ޕްލޭން ކުރުމާއި އިމާރާތް ކުރުމުގެ ބާރުތައް ފަލަސްތީނުގެ ކަމާބެހޭ ފަރާތްތަކުގެ އަތުން އިސްރާއީލުން ވަނީ އަތުލާފައެވެ. މިއާއެކު 1990 ގެ އަހަރުތަކުން ފެށިގެން އަމަލުކުރަމުން އައި އެއްބަސްވުމުގެ ބައެއް ބައިތައް ވަނީ އުވާލާފައެވެ.

މި ނިންމުން އިއުލާން ކުރަމުން ސްމޮޓްރިޗް ބުނީ، 1997 ވަނަ އަހަރުގެ ހެބްރޮން އެއްބަސްވުމުގެ ދަށުން ހުޅަނގު އައްސޭރީގެ ހެބްރޮން ސިޓީގެ "އެޗް2" ޒޯނުގެ ޕްލޭން ކުރުމާއި، ޒޯން ކުރުމާއި އަދި އިމާރާތް ކުރުމުގެ ކަންކަން ބެލެހެއްޓުމަށް ހެބްރޮންގެ ފަލަސްތީނު މުނިސިޕަލް ކައުންސިލަށް ދީފައިވާ ބާރުތައް މިހާރު "އުވާލާފައިވާ" ކަމަށެވެ.

މި ފިޔަވަޅަކީ "ނުރައްކާތެރި" ފިޔަވަޅެއްގެ ގޮތުގައި މަސްރަހު ދިރާސާކުރާ ފަރާތްތަކުން ސިފަކުރެއެވެ. ކައުންސިލް ފޯ އެރަބް-ބްރިޓިޝް އަންޑަސްޓޭންޑިންގްގެ ޑައިރެކްޓަރު ކްރިސް ޑޮއިލް އަލްޖަޒީރާއަށް ވިދާޅުވި ގޮތުގައި، ހެބްރޮންއަކީ އެތައް އަހަރެއް ވަންދެން ހުޅަނގު އައްސޭރީގައި އެންމެ ނުތަނަވަސްކަން ބޮޑު ސިޓީއެވެ. އަދި އިސްރާއީލުގެ އިސްތިއުމާރު ވަރުގަދަވާނެ ގޮތަށް ހެބްރޮންގައި މިހާރު އޮތް އިންތިޒާމުތަކަށް ބަދަލު ގެނައުމަށް އަޅާ ކޮންމެ ފިޔަވަޅަކީ އިންތިހާއަށް ނުރައްކާތެރި ކަމެއް ކަމަށް އޭނާ ފާހަގަކުރެއްވިއެވެ.

މި ނިންމުން މިހާ މުހިންމު ވަނީ ކީއްވެގެންކަން ތިރީގައި މިވަނީއެވެ.

އިބްރާހީމީ މިސްކިތަކީ ކޮބާ؟

އިސްލާމް، ޔަހޫދީ، ނަސާރާ ދީނުގެ އެންމެންވެސް ގަބޫލުކުރާ ގޮތުގައި ހެބްރޮންގެ ގަދީމީ ސިޓީގައި ހުންނަ މި ބިނާގެ އެތެރޭގައި އިބްރާހީމްގެފާނާއި، އިސްހާގުގެފާނާއި، ޔައުގޫބުގެފާނުގެ އިތުރުން އެބޭފުޅުންގެ އަނބިކަނބަލުން ވަނީ ފަސްދާނުލެވިފައެވެ.

ޔަހޫދީންނާއި ނަސާރާ ދީނުގެ މީހުން މި ތަނަށް ކިޔަނީ "ޓޫމްބް އޮފް ދަ ޕެޓްރިއާކްސް" ނުވަތަ "ކޭވް އޮފް ދަ ޕެޓްރިއާކްސް" އެވެ.

ނަސާރާއިންނެކޭ އެއްފަދައިން މުސްލިމުންވެސް އިބްރާހީމްގެފާނަށް ނުހަނު އިހުތިރާމް ކުރެއެވެ. މުސްލިމުން އެތަނުގައި "ސެންޗުއަރީ އޮފް އެބްރަހަމް" ގެ ނަމުންވެސް މަޝްހޫރުވެފައިވާ އިބްރާހީމީ މިސްކިތް ބިނާކުރީ 14 ވަނަ ގަރުނުގައެވެ. އެއީ އޭގެ ކުރިން އީސާގެފާނުގެ މީލާދުގެ ކުރިން ފުރަތަމަ ގަރުނުގައި ރޯމަން ރަސްގެފާނު ހެރޮޑް ބިނާކުރެއްވި ބޭރު ފާރުތަކުގެ މައްޗަށް ބިނާކޮށް ފުޅާކޮށްގެންނެވެ.

ހެބްރޮން އާއި އިބްރާހީމީ މިސްކިތަކީ ދޭތެރެ ދޭތެރެއިން ބޮޑެތި ހަމަނުޖެހުންތައް ހިނގާ ތަނެކެވެ. 1994 ވަނަ އަހަރު، އެމެރިކާ-އިސްރާއީލަށް ނިސްބަތްވާ ޔަހޫދީ ވަޒަންވެރިއަކު ވަނީ އެ މިސްކިތުގައި ނަމާދަށް ތިބި 29 މުސްލިމުން ބަޑިޖަހައި މަރާލައި، އިތުރު 125 މީހުން ޒަހަމްކޮށްލާފައެވެ.

އިސްރާއީލުން އިއުލާން ކުރީ ކޮން ކަމެއް؟

ހަރުކަށި ކަނާތު ފިޔައިގެ މިނިސްޓަރު ސްމޮޓްރިޗް ބުނެފައިވަނީ، އެ މުގައްދަސް ބިނާ އާއި ކައިރީގައި އުޅޭ ޔަހޫދީ ވަޒަންވެރިންގެ ސަރަހައްދުތަކުގެ ޕްލޭން ކުރުމާއި އިމާރާތް ކުރުމުގެ ބާރުތައް އިސްރާއީލުގެ އިދާރާތަކަށް ބަދަލުކުރުމަށް ހޯމަ ދުވަހުގެ ރޭ އޭނާ ހުއްދަ ދެއްވާފައިވާ ކަމަށެވެ.

ހުޅަނގު އައްސޭރީގެ ދެކުނުގައި ހެބްރޮން ކައިރީގައި އަލަށް އުފެއްދި އިސްރާއީލުގެ އާބާދީއެއް ފާހަގަކުރުމަށް ބޭއްވި ރަސްމިއްޔާތެއްގައި ވާހަކަ ދައްކަމުން ސްމޮޓްރިޗް ބުނީ، މި "ތާރީޚީ ފިޔަވަޅުގެ" ސަބަބުން ހުޅަނގު އައްސޭރީގައި އިސްރާއީލުގެ ސިޔާދަތީ ބާރު (ސޮވެރެންޓީ) އިތުރަށް ވަރުގަދަވެގެންދާނެ ކަމަށެވެ. ފަލަސްތީނުން ދެކޭ ގޮތުގައި ހުޅަނގު އައްސޭރިއަކީ މުސްތަގުބަލުގައި އުފެދޭ މިނިވަން ދައުލަތުގެ މައި ހިތެވެ.

ސިޓީގެ 20 އިންސައްތަ ސަރަހައްދުގެ ޕްލޭން ކުރުމާއި އިމާރާތް ކުރުމުގެ ބާރުތައް އަތުލުމަށް ސްމޮޓްރިޗް ނިންމި މި ނިންމުމަކީ، ހުޅަނގު އައްސޭރިން ބިން ގަތުމަށް ޔަހޫދީ ވަޒަންވެރިންނަށް ފަސޭހަކޮށްދިނުމަށާއި، އެ ސަރަހައްދުގައި އިސްރާއީލުގެ ބާރުތައް ތަންފީޒުކުރުމަށް ފުރުސަތު ދިނުމަށް ބޮޑުވަޒީރު ބެންޖަމިން ނަތަންޔާހޫގެ ސެކިއުރިޓީ ކެބިނެޓުން މިއަހަރުގެ ކުރީކޮޅު ފާސްކުރި ފިޔަވަޅުތަކަށް ފަހު އައި ނިންމުމެކެވެ.

ހުޅަނގު އައްސޭރީގައި ފަލަސްތީނުގެ ދައުލަތެއް އުފެދުމުގެ އެއްވެސް ވިސްނުމެއް ނައްތާލަން ބޭނުންވާ ކަމަށް ފާޅުގައި ވިދާޅުވެފައިވާ ސްމޮޓްރިޗަކީ، ފަހަކަށް އައިސް އެ ސަރަހައްދުގައި އިސްރާއީލުގެ އާބާދީތައް ހަލުވިކަމާއެކު ފުޅާކުރުމަށް ތާއީދުކުރާ ފަރާތެކެވެ. މިއާއެކު ފަލަސްތީނު ރައްޔިތުންނަށް ޔަހޫދީ ވަޒަންވެރިން ދޭ ހަމަލާތައްވެސް ވަނީ އިތުރުވެފައެވެ.

އދ. ގެ ތަފާސްހިސާބުތަކަށް ބަލާއިރު، މިއަހަރުގެ މިހާތަނަށް ހުޅަނގު އައްސޭރީގައި ޔަހޫދީ ވަޒަންވެރިން ވަނީ ފަލަސްތީނުގެ 13 މީހަކު މަރާލާފައެވެ. މީގެ އިތުރުން އިސްރާއީލު ސިފައިންގެ ހަމަލާތަކުގައިވެސް ގިނަ ބަޔަކު ވަނީ މަރުވެފައެވެ.

މީގެ ކުރިން އިބްރާހީމީ މިސްކިތް ކޮންޓްރޯލް ކުރީ ކޮން ބައެއް؟

އިބްރާހީމީ މިސްކިތް ހިމެނެނީ 1997 ވަނަ އަހަރު އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާއި ފަލަސްތީނުގެ ކުރީގެ ލީޑަރު ޔާސިރު އަރަފާތު ސޮއިކުރެއްވި ހެބްރޮން އެއްބަސްވުމުގެ ދަށުގައެވެ. އެ އެއްބަސްވުމުގެ ދަށުން ސިޓީ ވަނީ ދެ ޒޯނަކަށް ބަހާލާފައެވެ. "އެޗް1" އަކީ ފަލަސްތީނުގެ ކޮންޓްރޯލްގެ ދަށުގައި އޮންނަ، ސިޓީގެ 80 އިންސައްތަ ސަރަހައްދެވެ. "އެޗް2" އަކީ އިސްރާއީލުގެ ކޮންޓްރޯލްގެ ދަށުގައި އޮންނަ، ބާކީ 20 އިންސައްތަ ސަރަހައްދެވެ. މީގެ ތެރޭގައި ޔަހޫދީންގެ މުގައްދަސް ބިނާ އާއި، އެއާ އިންވެގެން ހުރި މުސްލިމުންގެ އިބްރާހީމީ މިސްކިތާއި، އަދި އޯލްޑް ސިޓީ ހިމެނެއެވެ.

ނަމަވެސް، އެ އެއްބަސްވުމުގައި ބުނެފައިވަނީ އިބްރާހީމީ މިސްކިތް ހިމެނޭހެން މުޅި ސިޓީގެ ޕްލޭން ކުރުމާއި އިމާރާތް ކުރުމުގެ ކަންކަން ބަލަހައްޓާނީ ފަލަސްތީނު އޮތޯރިޓީ (ޕީއޭ) އިން ކަމަށެވެ.

ހެބްރޮންގެ އޯލްޑް ސިޓީއަކީ ޔުނެސްކޯއިން ބަލައިގެންފައިވާ ފަލަސްތީނުގެ ދުނިޔޭގެ ތަރިކައިގެ ސަރަހައްދެކެވެ. އިސްރާއީލުގެ ސަލާމަތީ ކޮންޓްރޯލްގެ ދަށުގައި އޮންނަ މި ސިޓީގެ 20 އިންސައްތަ ސަރަހައްދުގައި އެތައް ހާސް ފަލަސްތީނު ރައްޔިތުންގެ މެދުގައި އެތައް ސަތޭކަ ޔަހޫދީ ވަޒަންވެރިން ދިރިއުޅެއެވެ.

ޔަހޫދީ ވަޒަންވެރިން ހެބްރޮންގައި ވަޒަންވެރިވާން ފެށީ 1968 ގައެވެ. 1994 ވަނަ އަހަރަށްފަހު، އިސްރާއީލުން ވަނީ ހެބްރޮންގެ އޯލްޑް ސިޓީގެ ބޮޑު ބައެއް ބަންދުކޮށް، އިބްރާހީމީ މިސްކިތް މުސްލިމުންނާއި ޔަހޫދީންގެ މެދުގައި ބަހާލައި، ޔަހޫދީންނަށް އެތަނުގައި އަޅުކަން ކުރުމުގެ ހުއްދަ ދީގެން އެތަނުގެ ކޮންޓްރޯލް ހޯދުމަށް މަޑުމަޑުން މަސައްކަތް ކޮށްފައެވެ.

"އިބްރާހީމީ މިސްކިތަށް ބަލާއިރު، އެތަން އޮތީ މިހާރުވެސް އަމަލީ ގޮތުން އިސްރާއީލުގެ ކޮންޓްރޯލްގެ ދަށުގައި. އެތަނަށް ވަދެ ނުކުމެ އުޅުން އޮންނަނީ ވަރަށް ބޮޑަށް ހިފަހައްޓާފައި، އަދި ދޭތެރެ ދޭތެރެއިން އެތަން ބަންދުކުރޭ. އެހެންކަމުން މި އާ ނިންމުމުގެ ސަބަބުން މާ ބޮޑު ބަދަލެއް އަންނާނެ ކަމަކަށް ނުފެނޭ،" ފަލަސްތީނުގެ ތިންކް ޓޭންކެއް ކަމަށްވާ އަލް-ޝަބަކާގެ ފެލޯ ފަތުހީ ނިމްރު އަލްޖަޒީރާއަށް ވިދާޅުވިއެވެ.

އޭނާ އިތުރަށް ވިދާޅުވީ، "އެމީހުން ބޭނުން ކޮންމެ ކަމެއް ކުރެވިދާނެ. މިހާރު އެމީހުން އެ އުވާލީ އެތަނުގެ ވަށައިގެންވާ އިމާރާތް ކުރުމުގެ ކަންކަން ރެގިއުލޭޓް ކުރާނެ ގޮތުގެ މާއްދާ. އަސްލު އެމީހުން އެކަމަށް ކުރިންވެސް މާ ބޮޑު ސަމާލުކަމެއް ދީފައެއް ނުވޭ."

މީގެ ސަބަބުން ހެބްރޮން އެއްބަސްވުމަށް ވާނީ ކިހިނެއް؟

މަސްރަހު ދިރާސާކުރާ ފަރާތްތަކުން ބުނާ ގޮތުގައި، ސްމޮޓްރިޗްގެ މި ނިންމުމާ ގުޅިގެން ބައިނަލްއަގުވާމީ މުޖުތަމައުގެ ފާޑުކިޔުންތަކުން ސަލާމަތްވުމަށްޓަކައި، އިސްރާއީލުގެ ފޮރިން މިނިސްޓްރީން ވަނީ 1997 ގެ ހެބްރޮން އެއްބަސްވުން އެއްކޮށް އުވާނުލާ ކަމަށް ބުނެފައެވެ.

ހޯމަ ދުވަހުގެ ރޭ އިސްރާއީލުގެ ހަޔަރ ޕްލޭނިންގް ކައުންސިލުން މި ބާރުތައް ބަދަލުކުރި ނަމަވެސް، ފޮރިން މިނިސްޓްރީން ކުރި ޓުވީޓެއްގައި ބުނީ "ފިނޭންސް މިނިސްޓަރުގެ ވާހަކަތަކާ ޚިލާފަށް، ހެބްރޮން އެއްބަސްވުން އުވާލާފައި ނުވާ" ކަމަށެވެ.

އެ މިނިސްޓްރީން ބުނި ގޮތުގައި، ޔަހޫދީ ވަޒަންވެރިންގެ ސަރަހައްދުތަކާއި، މުސްލިމުންނާއި ޔަހޫދީން އަދި ނަސާރާއިންގެ މުގައްދަސް ބިނާ ހިމެނޭހެން ޔަހޫދީންގެ މުގައްދަސް ތަންތަނުގެ ޕްލޭން ކުރުމާއި އިމާރާތް ކުރުމުގެ ބާރު އަތުލުމަށް ސެކިއުރިޓީ ކެބިނެޓުން ނިންމީ މީގެ މަސްތަކެއް ކުރިންނެވެ.

"އަޅުގަނޑަށް ވިސްނޭ ގޮތުގައި ސްމޮޓްރިޗް މި މަސައްކަތް ކުރަނީ އިމާރާތް ކުރުމުގެ ހުއްދަ ދިނުމާއި، އަޅުކަންކުރާ ތަންތަނަށް ބަދަލު ގެނައުމާއި، އަދި އާބާދީތައް ފުޅާކުރުމުގައި ފަލަސްތީނުގެ މުނިސިޕަލްޓީއާ ކޯޑިނޭޓް ކުރަންޖެހޭ މާއްދާ އުވާލަން،" ނިމްރު ވިދާޅުވިއެވެ.

މީގެ މުހިންމުކަމަކީ ކޮބާ؟

ނިމްރު ފާހަގަކުރެއްވި ގޮތުގައި، ހެބްރޮން އެއްބަސްވުމުގެ ދަށުން، ޔަހޫދީ ވަޒަންވެރިންގެ ޕްލޭންތަކާ ދެކޮޅު ހެދުމުގެ ނުވަތަ އެކަމަށް އެއްބާރުލުން ނުދީ ހުރަސް އެޅުމުގެ ގާނޫނީ ފުރުސަތު ފަލަސްތީނު މުނިސިޕަލްޓީއަށް އޮވެއެވެ.

"މިއީ އޮސްލޯ އެއްބަސްވުމުގެ ދަށުން ފަލަސްތީނާއެކު ވެފައިވާ ރަސްމީ މަޝްވަރާތަކާއި، ކޯޑިނޭޝަން އަދި އެއްބަސްވުންތަކަށް ދެމުންދާ ބޮޑު ހަމަލާއެއްގެ ބައެއް."

އޮސްލޯ އެއްބަސްވުމަކީ 1993 އަދި 1995 ވަނަ އަހަރު ފަލަސްތީނާއި އިސްރާއީލާ ދެމެދު ސޮއިކުރެވުނު ފުރަތަމަ ސީދާ ސުލްހައިގެ އެއްބަސްވުންތަކެވެ. މީގެ ބޭނުމަކީ ފަލަސްތީނުގެ އަމިއްލަ އިޚްތިޔާރު އޮންނަ ދައުލަތަކަށް މަގުފަހިކުރުމެވެ. މި އެއްބަސްވުމުގެ ދަށުން ވަގުތީ ގޮތުން ފަލަސްތީނު އޮތޯރިޓީ (ޕީއޭ) އުފައްދައި، ހުޅަނގު އައްސޭރީގެ ބިންތައް އޭ، ބީ އަދި ސީ އޭރިއާތަކަށް ބަހާލިއެވެ.

ނިމްރު ވިދާޅުވީ ސްމޮޓްރިޗްގެ މި ފިޔަވަޅުގެ ސަބަބުން، ހެބްރޮން އެއްބަސްވުމާ ޚިލާފުވެއްޖެ ކަމަށް ބުނެ އިސްރާއީލުގެ ކޯޓަކަށް މައްސަލަ ހުށަހެޅުމުގެ ފުރުސަތުވެސް ހެބްރޮން މުނިސިޕަލްޓީއަށް ގެއްލިގެންދާނެ ކަމަށެވެ.

"އެމީހުން އެތަން އެ ބަދަލުކޮށްލީ ހުޅަނގު އައްސޭރީގެ އޭރިއާ ސީ ފަދަ ތަނަކަށް. އެތަނުގައި އިމާރާތް ކުރާނެ ތަންތަނާއި ފުޅާކުރާނެ ގޮތެއް ނިންމާނީ ހަމައެކަނި އިސްރާއީލުން."

ނިމްރު އިތުރަށް ވިދާޅުވީ، އިސްރާއީލުގެ މިނިސްޓަރުން ބޭނުންވަނީ އޮސްލޯ އެއްބަސްވުމުގެ ވީހާވެސް ގިނަ ބައިތަކެއް އުވާލަން ކަމަށެވެ. "އަޅުގަނޑުމެން ބަލަންޖެހޭނީ އަމަލީ ގޮތުން މީގެ ނަތީޖާ ފެންނާނީ ކިހިނެއްތޯ. މިއީ މުޅި އެއްބަސްވުން އުވާލުމަށް ސްމޮޓްރިޗް ބޭނުންކުރާ ހަތިޔާރެއްގެ ފެށުމަށްވެސް ވެދާނެ."

ފަލަސްތީނުގެ ކަމާބެހޭ ފަރާތްތަކުން ބުނީ ކީކޭ؟

ފަލަސްތީނުގެ ރައީސް މަހްމޫދު އައްބާސްގެ އޮފީހުން ބުނީ، ބާރުތައް އަތުލުމަކީ "ހެބްރޮންގެ ސިޔާސީ އަދި ގާނޫނީ ހައިސިއްޔަތަށް އަރައިގަތުން" ކަމަށާއި، އެއީ ބައިނަލްއަގުވާމީ ގާނޫނުތަކާ ޚިލާފު ކަމެއް ކަމަށެވެ. ހެބްރޮންގެ ފަލަސްތީނު މޭޔަރު ޔޫސުފް އަލް-ޖަބާރީ ވިދާޅުވީ ސްމޮޓްރިޗްގެ ނިންމުމަކީ "ހެބްރޮން މުނިސިޕަލްޓީގެ ބާރުތައް ނިގުޅައިގަތުމަށް ނިންމި ނަސްލީ ތަފާތުކުރުމުގެ ނިންމުމެއް" ކަމަށެވެ.

އޮކްޓޯބަރު މަހުގެ ނިޔަލަށް އިސްރާއީލުގެ އާންމު އިންތިޚާބު ބާއްވަން ޖެހޭއިރު، ސްމޮޓްރިޗްގެ މަގުބޫލުކަން ވަނީ ދަށްވެފައެވެ. އަމިއްލައަށްވެސް ހުޅަނގު އައްސޭރީގެ ފަލަސްތީނު ބިމެއްގައި ވަޒަންވެރިވެގެން އުޅޭ ސްމޮޓްރިޗަކީ، ހުޅަނގު އައްސޭރިއަކީ އިސްރާއީލުގެ ބައެއްގެ ގޮތުގައި ހެދުމަށް ވަކާލާތުކުރާ ފަރާތެކެވެ. އޭނާގެ ޕާޓީއަށް ތާއީދުކުރަނީ ހުޅަނގު އައްސޭރިއަކީ އެމީހުންގެ ބިމެއް ކަމަށް ގަބޫލުކުރާ ހަރުކަށި ޔަހޫދީ ވަޒަންވެރިންނެވެ.

އިސްރާއީލުން އަތުލަން ބޭނުންވާ އެހެން މުހިންމު ތަންތަނަކީ ކޮބާ؟

ފަލަސްތީނުގެ އެހެން މުގައްދަސް ތަންތަނުގެ ކޮންޓްރޯލާއި ގާނޫނީ ހައިސިއްޔަތަށްވެސް މިފަދަ ބަދަލުތައް ދަނީ ގެންނަމުންނެވެ.

މިސާލަކަށް، ގުދުސްގެ އޯލްޑް ސިޓީގައި ހުންނަ، މުސްލިމުންގެ ތިންވަނަ އެންމެ މުގައްދަސް ބިނާ ކަމަށްވާ މަސްޖިދުލް އަގްސާގައި، އިސްރާއީލުން ދަނީ "މައްސަލަ ޖައްސާ" މީހުން ކަމަށް ބުނެ އަޅުކަންކުރާ މީހުން އެތަނުން ނެރެ ބޭރުކުރަމުންނެވެ. އަދި ދޭތެރެ ދޭތެރެއިން މިސްކިތް ބަންދުކުރުމާއި މުސްލިމުންނަށް ހުރަސް އެޅުމަކީ "ސަލާމަތީ ފިޔަވަޅެއް" ކަމަށް އެމީހުން ބުނެއެވެ.

މީގެ އިތުރުން، ޔަހޫދީ ވަޒަންވެރިންގެ ޖަމިއްޔާތަކުން ދަނީ ސަރުކާރުގެ އެހީތެރިކަމާއެކު އޯލްޑް ސިޓީގެ ވަށައިގެންވާ އިމާރާތްތަކާއި މުގައްދަސް ތަންތަން ކައިރީގައި ހުރި ބިނާތަކުގެ ކޮންޓްރޯލް ހޯދުމަށް މަސައްކަތް ކުރަމުންނެވެ.