ޣައްޒާގެ ފޭލިގެތަކަށް އަމާޒުކޮށް އިސްރާއީލުން ދިން ހަމަލާތަކުގައި 13 އަހަރުގެ އަންހެން ކުއްޖަކާއެކު ފަލަސްތީނުގެ ހަތަރު މީހަކު ޝަހީދުކޮށްލައިފި

އިސްރާއީލުން ފަލަސްތީނުގެ ޣައްޒާއަށް ދެމުންގެންދާ ހަމަލާތައް ވަރުގަދަކޮށް، ރައްކާތެރިކަން ހޯދުމަށް ޖަހާފައިވާ ފޭލިގެތަކަށް އަމާޒުކޮށް ދިން ހަމަލާތަކުގައި 13 އަހަރުގެ އަންހެން ކުއްޖަކާއެކު ފަލަސްތީނުގެ ހަތަރު މީހަކު ޝަހީދުކޮށްލައިފި އެވެ. ޣައްޒާގެ އިތުރުން އިސްރާއީލުން ދަނީ ހިފާފައިވާ ހުޅަނގު އައްސޭރީގައިވެސް ފަލަސްތީނު ރައްޔިތުންނަށް އަމާޒުކޮށް ދޭ ހަމަލާތަކާއި ހިންގާ ރޭޑްތައް ފުޅާކުރަމުންނެވެ.

ފަލަސްތީނުގެ ރަސްމީ ނޫސް އެޖެންސީ "ވަފާ" އިން އާދިއްތަ ދުވަހު ރިޕޯޓްކޮށްފައިވާ ގޮތުގައި، ޣައްޒާގެ އުތުރުގައިވާ ބައިތު ލާހިޔާގެ ހުޅަނގުން އަލް-ސަލާތީން ސަރަހައްދަށް އިސްރާއީލުގެ ޑްރޯންއަކުން ދިން ހަމަލާއެއްގައި ދެ މީހަކު ޝަހީދުވެ، އެކަކު ވަނީ ޒަޚަމްވެފަ އެވެ. ޣައްޒާގެ ދެކުނުގައިވާ ޚާން ޔޫނިސްގައި ރައްކާތެރިކަން ހޯދައިގެން ތިބި މީހުންގެ ފޭލިގެއަކަށް އިސްރާއީލުގެ ހަނގުރާމަމަތީ ބޯޓުތަކުން މިސައިލް ހަމަލާއެއް ދިނުމުގެ ސަބަބުން ގިނަ ބަޔަކު ޒަޚަމްވެގެން ހޮސްޕިޓަލަށް ވަނީ ގެންގޮސްފަ އެވެ.

ނާސިރު މެޑިކަލް ކޮމްޕްލެކްސްގެ މެޑިކަލް ސްޓާފުން ބުނި ގޮތުގައި، މި ހަމަލާއަށްފަހު ކާކުކަން ނޭނގޭ ފިރިހެނެއްގެ ހަށިގަނޑު އެ ހޮސްޕިޓަލަށް ވަނީ ގެނެސްފަ އެވެ.

މީގެ އިތުރުން، ޣައްޒާގެ ދެކުނުގައި އިސްރާއީލުގެ ޓޭންކުތަކުން ދިން ހަމަލާއެއްގައި ބުރައިގެން ދިޔަ އެތިކޮޅުތަކެއް އަމާޒުވެ، އުމުރުން އެންމެ 13 އަހަރުގެ އައިލީން އަލް-ފައްރާ ޝަހީދުވެފައިވާ ކަމަށްވެސް ސިއްހީ އޮފިޝަލުން ވަނީ ބުނެފަ އެވެ.

އިންޓަނޭޝަނަލް ކޮމިޓީ އޮފް ދަ ރެޑް ކްރޮސް (އައި.ސީ.އާރު.ސީ) އިން ބުނި ގޮތުގައި، އިސްރާއީލުގެ ބަންދުގައި ތިބި ފަލަސްތީނުގެ 14 މީހަކު ކެރެމް އަބޫ ސާލިމް ބޯޑަރު ހުރަސްކޮށް ޣައްޒާގެ މެދުތެރޭގައިވާ އަލް-އަޤްޞާ މާޓިއާސް ހޮސްޕިޓަލަށް ބަދަލުކުރުމުގެ މަސައްކަތް އެ ޖަމިއްޔާއިން ވަނީ ކޮށްފަ އެވެ. އަދި އެމީހުންގެ އާއިލާތަކާ ގުޅުވައިދިނުމަށްވެސް އެހީތެރިކަން ފޯރުކޮށްދީފައިވެ އެވެ.

އައި.ސީ.އާރު.ސީ އިން ހާމަކުރި ގޮތުގައި، 2023 ވަނަ އަހަރުން ފެށިގެން މިހާތަނަށް މި އުސޫލުގެ ދަށުން މިނިވަންކުރި 2،500 އަށްވުރެ ގިނަ އަސީރުން ބަދަލުކުރުމުގެ މަސައްކަތް އެ ޖަމިއްޔާއިން ވަނީ ކޮށްފަ އެވެ.

ނަމަވެސް، 2023 ވަނަ އަހަރުގެ އޮކްޓޯބަރު މަހުން ފެށިގެން އިސްރާއީލުގެ ޖަލުތަކުގައި ބަންދުކޮށްފައި ތިބި ފަލަސްތީނު މީހުންނާ ބައްދަލުކުރުމުގެ ފުރުސަތު އިސްރާއީލުން އެ ޖަމިއްޔާއަށް ދީފައި ނުވާކަމަށް އައި.ސީ.އާރު.ސީ އިން ބުންޏެވެ.

އެ ޖަމިއްޔާއިން ބުނީ ބަންދުގައި ތިބި ހުރިހާ އެންމެން ތިބި ތަނަކާއި އެމީހުންނަށް ވީގޮތް އިސްރާއީލުން ހާމަކުރަންޖެހޭނެ ކަމަށާއި، އެމީހުންނާ ބައްދަލުކުރުމުގެ ފުރުސަތު ދީ، އާއިލާތަކާ މުއާމަލާތް ކުރެވޭނެ އިންތިޒާމު ހަމަޖައްސައިދޭން ޖެހޭނެ ކަމަށެވެ.

ޣައްޒާ ސިޓީން ރިޕޯޓްކުރަމުން އަލްޖަޒީރާގެ ތާރިގް އަބޫ އަޒޫމް ބުނީ، ހޮނިހިރު ދުވަހު އިސްރާއީލުން ވައިގެ ހަމަލާތައް ވަރުގަދަކޮށްފައިވާ ކަމަށެވެ. މި ހަމަލާތައް މައިގަނޑު ގޮތެއްގައި އަމާޒުކޮށްފައިވަނީ ޣައްޒާ ސިޓީއާއި އަލް-މަވާސީ ސަރަހައްދުގައި ޖަހާފައިވާ ވަގުތީ ފޭލިގެތަކަށް ކަމަށާއި، އަލް-މަވާސީއަކީ މިދިޔަ އަހަރު އެއްބަސްވި ސިޒްފަޔާ ޗާޓުގެ ދަށުން ރައްކާތެރި ސަރަހައްދެއްގެ ގޮތުގައި ކަނޑައަޅާފައިވާ ތަނެއް ކަމަށް އޭނާ ފާހަގަކުރި އެވެ.

މީގެ އިތުރުން، ޣައްޒާ ސިޓީގެ އިރުމަތީ ބިތުގައި އިސްރާއީލުގެ އެއްގަމު ސިފައިންގެ ހަރަކާތްތައް ފުޅާކޮށް، ރީނދޫ ކުލައިން ފާހަގަކޮށްފައިވާ ސަރަހައްދުގެ ބޯޑަރުތައް އިސްރާއީލު ސިފައިން ފުޅާކުރަމުންދާ ކަމަށްވެސް އޭނާ ބުންޏެވެ.

ޣައްޒާގެ ހެލްތު މިނިސްޓްރީން ހާމަކޮށްފައިވާ އެންމެ ފަހުގެ ތަފާސްހިސާބުތަކަށް ބަލާއިރު، 2023 އޮކްޓޯބަރު 7 އިން ފެށިގެން އިސްރާއީލުން ހިންގަމުންދާ ގަތުލުއާންމުގައި މިހާތަނަށް ފަލަސްތީނުގެ 73،054 މީހުން ޝަހީދުވެ، 173،480 މީހުން ވަނީ ޒަޚަމްވެފަ އެވެ.

ވޭތުވެދިޔަ 24 ގަޑިއިރު ނުވަނީސް، އިސްރާއީލުގެ ހަމަލާތަކުގައި ޝަހީދުވި ތިން މީހެއްގެ ހަށިގަނޑު ހޮސްޕިޓަލްތަކަށް ގެނެސްފައިވާއިރު، ޒަޚަމްވި 43 މީހަކަށް ފަރުވާދީފައިވާ ކަމަށްވެސް އެ މިނިސްޓްރީން ބުންޏެވެ.

ހުޅަނގު އައްސޭރީގެ ރޭޑްތަކާއި މިސްކިތްތަކަށް އަޅާފައިވާ ހުރަސްތައް

ހިފާފައިވާ އިރުމަތީ ގުދުސްގައި، އިސްރާއީލު ފުލުހުންގެ ވަރުގަދަ ހިމާޔަތުގެ ދަށުން އިސްރާއީލުގެ 110 ވަޒަންވެރިން އަލް-އަޤްޞާ މިސްކިތަށް ވަދެގަނެފައިވާ ކަމަށް އިސްލާމިކް ވަގުފް ޑިޕާޓްމަންޓުން ބުނެފި އެވެ.

އިސްރާއީލުގެ ސިފައިންގެ ފުރިހަމަ ހިމާޔަތާއި ރައްކާތެރިކަމުގެ ދަށުގައި ތިބެ، އެ ގައުމުގެ ހަރުކަށި ވަޒަންވެރިންގެ ގްރޫޕްތަކަކުން އަލްއަގްސާ މިސްކިތުގެ ގޯތިތެރެއަށް ވަދެގަނެ، ޔަހޫދީންގެ އަޅުކަމުގެ ހަރަކާތްތަކެއް ވަނީ ހިންގާފައި | އެކްސް

ވަގުފް އޮފީހުން ބުނި ގޮތުގައި، ވަޒަންވެރިން މިސްކިތަށް ވަދެފައިވަނީ މުޣްރަބީ ގޭޓުންނެވެ. އެމީހުން ވަނީ މިސްކިތުގެ ގޯތިތެރޭގައި ހިނގައި، މިސްކިތުގެ އިރުމަތީ ފަރާތުގައި ފަލަސްތީނު ރައްޔިތުންގެ ޝުއޫރުތަކާ ކުޅޭފަދަ ދީނީ ހަރަކާތްތަކެއް ހިންގާފަ އެވެ.

އިސްރާއީލު ފުލުހުން ވަނީ ފަލަސްތީނުގެ ރައްޔިތުން އަޅުކަން ކުރުމަށް ހަރުކަށި ހުރަސްތަކެއް ކުރިމަތިކޮށް، އެމީހުންނަށް ގޯނާކޮށް، ބައެއް މީހުން މިސްކިތަށް ވަނުން ހުއްޓުވައި، ބޭރު ދޮރުތަކުން އެމީހުންގެ އައިޑީ ކާޑުތައް އަތުލާފަ އެވެ.

ހެބްރޯންގައި، އިސްރާއީލު ސިފައިން އިބްރާހީމީ މިސްކިތުގައި ބަންގި ގޮވުން ހުއްޓުވާފައިވާތާ މިއަދަށް މެދުނުކެނޑި އަށް ދުވަސް ވެފައިވާ ކަމަށް ބުނެފަ އެވެ.

އެ މިސްކިތުގެ ޑައިރެކްޓަރު މުންޖިދު އަލް-ޖައުބަރީއާ ހަވާލާދީ "ވަފާ" އިން ރިޕޯޓްކޮށްފައިވާ ގޮތުގައި، ވޭތުވެދިޔަ އަށް ދުވަހު އިސްރާއީލު ސިފައިން ވަނީ ހުރިހާ ވަގުތެއްގައިވެސް ބަންގި ގޮވުން ހުއްޓުވާފަ އެވެ. އޭނާ ބުނި ގޮތުގައި މި ހުރަސްތަކުގެ ބޭނުމަކީ މިސްކިތުގެ މައްޗަށް އިސްރާއީލުގެ ބާރު ގަދަކޮށް، މިސްކިތް ހުސްކުރުމެވެ.

މީގެ އިތުރުން، ހިފާފައިވާ ގުދުސްގެ އުތުރުގައިވާ ގަލަންދިޔާ ކޭމްޕަށް އިސްރާއީލު ސިފައިން ހިންގި ރޭޑެއްގައި، ފަލަސްތީނުގެ ޒުވާނެއްގެ ފަޔަށް ބަޑިޖަހައި ޒަޚަމްކޮށްލުމަށްފަހު، އިތުރު ދެ މީހަކު ވަނީ ހައްޔަރުކޮށްފަ އެވެ.

ބެތުލެހަމް ސަރަހައްދުގައި، އިސްރާއީލު ސިފައިން ބައިތު ސާހޫރަށް ވަދެގަނެ، އާއިލީ ގެއެއް ބަލައި ފާސްކުރުމަށްފަހު ދެ ޒުވާނަކު ވަނީ ހައްޔަރުކޮށްފަ އެވެ.

ނާބްލަސްގައި، އިސްރާއީލު ސިފައިން އެކި ސަރަހައްދުތަކުގެ ގެތަކަށް ވަދެ ބަލައި ފާސްކުރުމަށްފަހު ފަލަސްތީނުގެ 11 މީހަކު ވަނީ ހައްޔަރުކޮށްފަ އެވެ. އަދި ނާބްލަސްގެ ހުޅަނގު އުތުރުގައިވާ ސެބަސްޓިއާއަށް ވަދެގަނެ، ނޫސްވެރިޔާ އަނަސް އަލް-ހަވާރީ ހިމެނޭހެން ދެ މީހަކު ހައްޔަރުކޮށް، އުޅަނދެއް ވަނީ ހަލާކުކޮށްލާފަ އެވެ.

ފަލަސްތީނުގެ ޖަމާއަތްތަކުން ވަނީ ސިއްހީ ޚިދުމަތްތެރިންނާއި މަދަނީ ޖަމިއްޔާތަކަށް އަމާޒުކޮށް އިސްރާއީލުން ދޭ ހަމަލާތައް އިތުރުވަމުންދާކަމުގެ އިންޒާރު ދީފަ އެވެ.

ފަލަސްތީނުގެ އެން.ޖީ.އޯ ނެޓްވޯކުން ވަނީ ބަންދުކޮށްފައިވާ ޑޮކްޓަރުން ކަމަށްވާ މާޒިން އަލް-ރަންތީސީ، ޚާލިދު އަޔާޝް އަދި ހުސާމް އަބޫ ސަފިއްޔާ މިނިވަންކުރުމަށް ބައިނަލްއަގުވާމީ މުޖުތަމައުން އިސްރާއީލަށް ފިއްތުންތައް ކުރިމަތިކުރުމަށް ގޮވާލާފަ އެވެ.

ކޮމިޝަން އޮފް ޑިޓެއިނީސް އެންޑް އެކްސް-ޑިޓެއިނީސް އެފެއާޒް އިން ބުނި ގޮތުގައި، ދާމޫން ޖަލުގައި ބަންދުކޮށްފައި ތިބި ފަލަސްތީނުގެ އަންހެނުން ދަނީ ވަރަށް ދަތި ހާލަތެއްގައި އުޅެމުންނެވެ. އަދި އެމީހުންނަށް އަސާސީ ހައްގުތަކުން މަހްރޫމްކުރަމުންދާ ކަމަށްވެސް ބުންޏެވެ.