އިސްރާއީލުގެ ހަމަލާތަކުގައި ފަލަސްތީނުގެ ތިން މީހަކު ޝަހީދުވެއްޖެ

އިސްރާއީލުން އަންގާރަ ދުވަހު ޣައްޒާގެ އެކި ސަރަހައްދުތަކަށް ދިން ހަމަލާތަކުގައި ފަލަސްތީނުގެ މަދުވެގެން ތިން މީހަކު ޝަހީދުކޮށްލާފައިވާ ކަމަށް އެ ސަރަހައްދުގެ ސިއްހީ އޮފިޝަލުން ވިދާޅުވެއްޖެ އެވެ.

ސިއްހީ ޚިދުމަތްތެރިން މައުލޫމާތު ދޭ ގޮތުގައި، ޣައްޒާގެ ދެކުނުގައި އޮންނަ ޚާން ޔޫނިސްގެ މަވާސީ ސަރަހައްދަށް އިސްރާއީލުން ދިން ވައިގެ ހަމަލާއެއްގައި ފިރިހެނަކު ޝަހީދުވެ، ދެ ކުޑަކުދިން ވަނީ ޒަޚަމްވެފަ އެވެ. އިސްރާއީލުގެ އަސްކަރިއްޔާއިން ރޮއިޓާސްއަށް ބުނެފައިވަނީ އެ ހަމަލާ އަމާޒުކުރީ ހަމާސްގެ ހަނގުރާމަވެރިއަކަށް ކަމަށެވެ.

އަންގާރަ ދުވަހުގެ ފަހުގެ ވަގުތެއްގައި، ޣައްޒާ ސިޓީގެ ހުޅަނގުގައި ހާލުގައި ޖެހިފައިވާ އާއިލާތައް ދިރިއުޅޭ ފޭލިގެތަކެއް ކައިރިއަށް އިސްރާއީލުން ދިން އެހެން ހަމަލާއެއްގައި އެކަކު ޝަހީދުވެ، ފަސް މީހަކު ޒަޚަމްވެފައިވާ ކަމަށް ސިއްހީ ޚިދުމަތްތެރިން ބުނެ އެވެ. މީގެ އިތުރުން ޚާން ޔޫނިސްއަށް ދިން ތިންވަނަ ހަމަލާއެއްގައި ވެސް އެކަކު ޝަހީދުވެ، ތިން މީހަކު ވަނީ ޒަޚަމްވެފަ އެވެ.

އެމެރިކާ މެދުވެރިވެގެން މިދިޔަ އޮކްޓޫބަރު މަހު ހަމާސްއާއެކު ހަމަލާ ބަދަލުކުރުން ހުއްޓާލުމުގެ އެއްބަސްވުމަކަށް އައި ފަހުން ވެސް، އިސްރާއީލުން ދަނީ ތަކުރާރުކޮށް ޣައްޒާ އަށް ހަމަލާދެމުންނެވެ. އިސްރާއީލުން ބުނާ ގޮތުގައި މި ހަމަލާތައް އަމާޒުކުރަނީ އެ ގައުމުގެ ސިފައިންނަށް ނުރައްކާކުރާ ހަނގުރާމަވެރިންނަށާއި، 2023 ވަނަ އަހަރުގެ އޮކްޓޫބަރު މަހު އިސްރާއީލަށް ދިން ހަމަލާގައި ބައިވެރިވި މީހުންނަށެވެ.

ހަމާސްއިން ވަނީ އިސްރާއީލުން ހަމަލާ ބަދަލުކުރުން ހުއްޓާލުމުގެ އެއްބަސްވުމާ ޚިލާފުވަމުންދާ ކަމަށް ތުހުމަތުކޮށްފަ އެވެ. އެމެރިކާގެ ރައީސް ޑޮނަލްޑް ޓްރަމްޕް ޣައްޒާގެ ސުލްހައަށް ކަނޑައަޅުއްވާފައިވާ މަންދޫބު ނިކޮލާއި މިލަޑެނޯވް ވިދާޅުވީ، ދެ ފަރާތުން ވެސް އެއްބަސްވުމާ ޚިލާފުވެފައިވާ ކަމަށެވެ.

ދެ ފަރާތުން އާންމުކޮށްފައިވާ ތަފާސްހިސާބުތަކަށް ބަލާއިރު، މީގެ އަށް މަސް ކުރިން ހަމަލާ ބަދަލުކުރުން ހުއްޓާލުމުގެ އެއްބަސްވުމަށް އަމަލުކުރަން ފެށި ފަހުން، ފަލަސްތީނުގެ 1،070 އަށްވުރެ ގިނަ މީހުން ވަނީ ޝަހީދުވެފަ އެވެ. މީގެ ތެރޭގައި ގިނައީ އާންމު ރައްޔިތުންނެވެ. ހަމަ މި މުއްދަތުގައި އިސްރާއީލުގެ ހަތަރު ސިފައިން މަރުވެފައިވެއެވެ. ނަމަވެސް، ހަމާސްއިން އެ ޖަމާއަތުގެ މަރުވި ހަނގުރާމަވެރިންގެ އަދަދެއް ހާމައެއް ނުކުރެ އެވެ.

އިސްރާއީލުގެ ސިފައިން މިހާރު ވެސް ޣައްޒާގެ 60 އިންސައްތައަށްވުރެ ބޮޑު ސަރަހައްދެއް ކޮންޓްރޯލް ކުރަމުންދާއިރު، ބޮޑުވަޒީރު ބެންޖަމިން ނަތަންޔާހޫ ސިފަކުރައްވާ ގޮތުގައި އެއީ ހަމާސްގެ ހަމަލާތައް ހުއްޓުވުމަށް ގާއިމުކޮށްފައިވާ "ބަފަރ ޒޯން" އެކެވެ. ނަތަންޔާހޫ ވިދާޅުވެފައިވަނީ އިސްރާއީލު ސިފައިން އެ ސަރަހައްދުން ފޭބުމަށް ގަސްދުނުކުރާ ކަމަށެވެ.

އިސްރާއީލުން ޣައްޒާ އަށް ދެމުންދާ ނުރައްކާތެރި ވައިގެ އަދި އެއްގަމު ހަމަލާތަކުގެ ސަބަބުން، އެ ސަރަހައްދުގައި ދިރިއުޅޭ 2 މިލިއަން މީހުންގެ އާބާދީގެ ގާތްގަނޑަކަށް ހުރިހާ އެންމެން ވަނީ ގެދޮރު ދޫކޮށް ރައްކާތެރިކަން ހޯދަން މަޖުބޫރުވެފަ އެވެ. މީގެ ތެރެއިން ގިނަ ބަޔަކު މިހާރު ދިރިއުޅެމުންދަނީ ހަމާސްއިން ބަލަހައްޓަމުންދާ ހަނި ސަރަހައްދެއްގައި ހުރި ފޭލިގެތަކުގައާއި ހަލާކުވެފައިވާ އިމާރާތްތަކުގަ އެވެ.