އިސްރާއީލުގެ މިސްކިތްތަކުގައި އަޑުގަދަކުރާ ބޭނުންކޮށްގެން ބަންގިގޮވުން މަނާކުރުމަށް ކްނެސެޓް އިން ފާސްކުރި ބިލް، އޯއައިސީ އިން ކުށްވެރިކޮށްފި

އިސްރާއީލުގެ މިސްކިތްތަކުގައި އަޑުގަދަކުރާ ބޭނުންކޮށްގެން ބަންގިގޮވުން މަނާކުރުމަށް އެ ގައުމުގެ ގާނޫނު ހަދާ މަޖިލިސް (ކްނެސެޓް) އިން ފާސްކުރި ބިލު، އޯގަނައިޒޭޝަން ފޯ އިސްލާމިކް ކޯޕަރޭޝަން (އޯއައިސީ) އިން ކުށްވެރިކޮށްފި އެވެ.

އޯއައިސީން ނެރުނު ބަޔާނެއްގައި ބުނެފައިވަނީ، އިސްރާއީލުގެ މި ނިންމުމަކީ ބާތިލް ނިންމުމެއް ކަމަށާއި، މިއީ ނަސްލީ ތަފާތުކުރުންތަކުގެ މައްޗަށް ބިނާވެފައިވާ ގާނޫނީ ޖަރީމާއެއް ކަމަށެވެ. އަދި މިއީ ދީނީ މިނިވަންކަމާއި އަޅުކަން ކުރުމުގެ ހައްގުގެ އިތުރުން، ބައިނަލްއަގުވާމީ ގާނޫނުތަކާއި އިންސާނީ ހައްގުތަކާ ބެހޭ ބައިނަލްއަގުވާމީ ގާނޫނުތަކުން ކަށަވަރުކޮށްދީފައިވާ ސަގާފީ އަދި ދީނީ ހައްގުތަކާ ކަނޑައެޅިގެން ޚިލާފު އަމަލެއް ކަމަށްވެސް އެ ޖަމިއްޔާއިން ބުނެފައިވެ އެވެ.

120 މެންބަރުން ހިމެނޭ އިސްރާއީލުގެ ގާނޫނު ހަދާ މަޖިލީހުން މި ބިލް ފާސްކޮށްފައިވަނީ 50 މެންބަރުންގެ ވޯޓުންނެވެ. މި ބިލާ ދެކޮޅަށް 36 މެންބަރުން ވޯޓު ދީފައިވެ އެވެ. މި ބިލުގައި ބުނެފައިވަނީ، ކުރިން ހޯދަންޖެހޭ ހާއްސަ ހުއްދައެއް ނެތި އެއްވެސް މިސްކިތެއްގައި އަޑުގަދަކުރާ ނިޒާމެއް ހަރުކުރުމާއި ބޭނުންކުރުމަކީ މަނާކަމެއް ކަމަށެވެ.

މި ބިލް ގާނޫނަކަށް ވުމުގެ ކުރިން، މަޖިލީހުގައި އިތުރު ތިން ފަހަރެއްގެ މަތިން ބަހުސްކޮށް ވޯޓަށް އަހަންޖެހޭނެ އެވެ.

އޯއައިސީން އިތުރަށް ފާހަގަކޮށްފައިވާ ގޮތުގައި، މި ބިލަކީ ފަލަސްތީނުގެ ރައްޔިތުންގެ ދިރިއުޅުން ހަނިކޮށް، އަރަބި އަދި އިސްލާމީ ވަންތަކަމަށް އަމާޒުކޮށް އިސްރާއީލުން ހިންގަމުންދާ ނަސްލީ ތަފާތުކުރުމުގެ ސިޔާސަތުތަކުގެ ތެރެއިން ނިންމި ނުރައްކާތެރި ނިންމުމެކެވެ. އަދި މިއީ ދީނީ އަޅުކަންތަކުގެ މުގައްދަސްކަމާއި އިސްލާމީ މުގައްދަސް ބިނާތަކަށް ދިން ސީދާ ހަމަލާއެއްގެ ގޮތުގައިވެސް އެ ޖަމިއްޔާއިން ވަނީ ސިފަކޮށްފަ އެވެ.