އެމެރިކާއިން ދޭ ހަމަލާތަކަށް އެހީތެރިވާ ކޮންމެ ތަނަކަށް ހަމަލާދޭނެ ކަމުގެ އިންޒާރު އީރާނުގެ އަސްކަރިއްޔާއިން ދީފި

އީރާނުގެ އިސްތިގުލާލަށް އުނިކަން އަންނަ ގޮތަށް "އިސްތިއުމާރީ އެމެރިކާ ސިފައިން" ދޭ އެއްވެސް ހަމަލާއަކަށް އެހީތެރިކަން ފޯރުކޮށްދޭ ކޮންމެ ތަނަކީ، އީރާނުގެ ހަތިޔާރު އެޅި ބާރުތަކުން ހަމަލާދިނުން ހުއްދަ އަމާޒެއްގެ ގޮތުގައި ބަލާނެ ކަމަށް ޚާތަމުލް އަންބިޔާ ސެންޓްރަލް ހެޑްކުއާޓާޒް އިން އިއުލާންކޮށްފި އެވެ.

ބުދަ ދުވަހު އެ މަރުކަޒުން ނެރުނު ބަޔާނެއްގައި ބުނެފައިވަނީ، އިސްލާމީ ޖުމްހޫރިއްޔާ އީރާނުގެ އިސްތިގުލާލާ ދެކޮޅަށް އެމެރިކާގެ އިސްތިއުމާރީ ސިފައިން ހިންގާ އުދުވާނުތަކަށް އެހީތެރިކަން ފޯރުކޮށްދޭ ކޮންމެ މަސްދަރަކީ ނުވަތަ ތަނަކީ، އީރާނުގެ ހަތިޔާރު އެޅި ބާރުތަކުގެ ގާނޫނީ އަމާޒެއް ކަމުގައި ބެލެވޭނެ ކަމަށެވެ.

މި ބަޔާން ނެރެފައިވަނީ، ހަމަލާ ބަދަލުކުރުން ހުއްޓާލުމުގެ އެއްބަސްވުމާ ޚިލާފަށް އެމެރިކާ ސިފައިން އީރާނުގެ ދެކުނުގެ ބައެއް ސަރަހައްދުތަކަށް ހަމަލާދީފައިވާ ކަމަށް ބުނެ ކުރިން ނެރުނު އިއުލާނަކަށް ފަހުގަ އެވެ. އެމެރިކާއިން މި ހަމަލާތައް ދީފައިވަނީ އިސްލާމީ އިންގިލާބުގެ އަވަހާރަކޮށްލާފައިވާ ލީޑަރު އާޔަތުﷲ ސައްޔިދު އަލީ ޚާމަނާއީގެ ޖަނާޒާގެ ރަސްމިއްޔާތު އިރާގުގައި ކުރިއަށް ދަނިކޮށްގެންނެވެ.

އެމެރިކާގެ އުދުވާނުތަކާއި ޓެރަރިސްޓް އަމަލުތަކަށް އީރާނުގެ ހަތިޔާރު އެޅި ބާރުތަކުން "ވަރުގަދަ ރައްދު ހަމަލާއެއް" ދޭނެ ކަމަށް އެ މަރުކަޒުން ބުނެފައިވެ އެވެ. އަދި ހުރްމުޒް ކަނޑުއޮޅީގެ ކަންކަމުގެ ތެރެއަށް ވަނުމަށް ނުވަތަ އެތަން ބެލެހެއްޓުމުގެ ތެރެއަށް އެމެރިކާއިން އަތްބޭނުމަށް އެއްވެސް ހާލަތެއްގައި ފުރުސަތު ނުދޭނެ ކަމަށްވެސް އެ ބަޔާނުގައި އިތުރަށް ބުނެފައިވެ އެވެ.

ސްޓްރެޓީޖިކް ގޮތުން މުހިންމު އެ ކަނޑުއޮޅިން ދަތުރުކުރާ މުދާ އުފުލާ ބޯޓުފަހަރާއި ތެޔޮ ޓޭންކަރުތަކަށް އޮތް ހަމައެކަނި ރައްކާތެރި މަގަކީ، އިސްލާމީ ޖުމްހޫރިއްޔާ އީރާނުން ކަނޑައަޅާފައިވާ މަގު ކަމަށް އެ ގައުމުން އަނެއްކާވެސް ވަނީ ތަކުރާރުކޮށްފަ އެވެ.

ބުދަ ދުވަހުގެ ކުރީކޮޅު، އެމެރިކާއިން އީރާނުގެ ދެކުނަށް ދިން ހަމަލާތަކުގެ ބަދަލުހިފުމުގެ ގޮތުން، އިސްލާމީ އިންގިލާބީ ގާޑް ކޯޕްސް (އައި.އާރް.ޖީ.ސީ) އާއި އީރާނުގެ އަސްކަރިއްޔާއިން ވަނީ ކުވެއިތާއި ބަހްރައިންގައި ހުރި އެމެރިކާގެ އަސްކަރީ މަރުކަޒުތަކަށް ހަމަލާދީފަ އެވެ.