އީރާނުގެ ތެލުގެ ސިނާއަތަށް އަޅާފައިވާ ދަތިކުރުމުގެ ފިޔަވަޅުތަކަށް ވަގުތީ ގޮތުން ދިން ލުއިތައް އެމެރިކާ އިން އުވާލައިފި
8 ޖުލައި 2026 | ބުދަ 07:14ހުރްމުޒް ކަނޑުއޮޅިން ދަތުރުކުރި ތެޔޮ ޓޭންކަރުތަކަކަށް އީރާނުން ހަމަލާދިނުމާ ގުޅިގެން، އެ ގައުމުގެ ތެލުގެ ސިނާއަތަށް ދީފައިވާ ލުއިތައް އެމެރިކާއިން އުވާލައިފި. ގަތަރުގެ އުޅަނދެއް ހިމެނޭހެން ދިން މި ހަމަލާތައް ގަތަރާއި އެމެރިކާއިން ކުށްވެރިކޮށްފައިވާއިރު، މިއީ ކަނޑުދަތުރުފަތުރުގެ މިނިވަންކަމަށް އޮތް ހުރަހެއް ކަމަށް އެ ގައުމުތަކުން ބުނޭ. މި ފިޔަވަޅާއެކު ދެ ގައުމުގެ ދެމެދުގައި ކުރިއަށްދާ ސުލްހައިގެ މަޝްވަރާތަކަށް ބޮޑެތި ގޮންޖެހުންތަކެއް ވަނީ ކުރިމަތިވެފައި.
ހުރްމުޒް ކަނޑުއޮޅި ކައިރީގައި އޮންނަ އޮމާންގެ އުތުރު މުސަންދަމް ޕެނިންސިއުލާގެ އައްސޭރިފަށުގައި ބައެއް އުޅަނދުފަހަރު ބަނދަރުކޮށްފައި ހުރި މަންޒަރު. | ގެޓީ އިމޭޖަސް
އީރާނުން ހުރްމުޒް ކަނޑުއޮޅީގައި ހިންގަމުންދާ އަމަލުތަކަކީ އެއްގޮތަކަށްވެސް ބަލައިގަނެވޭނެ ކަންތައްތަކެއް ނޫން ކަމަށް ބުނެ، އެ ގައުމުގެ ތެލުގެ ސިނާއަތަށް އަޅާފައިވާ ދަތިކުރުމުގެ ފިޔަވަޅުތަކަށް ވަގުތީ ގޮތުން ދީފައިވާ ލުއިތައް އެމެރިކާގެ ޓްރެޜަރީ ޑިޕާޓްމަންޓުން އަންގާރަ ދުވަހު އުވާލައިފި އެވެ.
މުހިންމު ކަނޑުގެ މަގެއް ކަމަށްވާ ހުރްމުޒް ކަނޑުއޮޅިން ދަތުރުކުރި ތެޔޮ ޓޭންކަރުތަކަކަށް ދިން ހަމަލާތަކާ ގުޅިގެން، އެމެރިކާ ސަރުކާރުގެ އޮފިޝަލަކު އޭއެފްޕީ ނިއުސް އެޖެންސީއަށް މައުލޫމާތު ދެމުން ވިދާޅުވީ، އެ ސަރަހައްދުގައި އީރާނުން ހިންގި އަމަލުތަކަކީ އެމެރިކާއަށް އެއްވެސް ހާލެއްގައި ބަލައިގަނެވޭނެ ކަންކަމެއް ނޫން ކަމަށާއި، އެކަމުގެ ނަތީޖާއާ އެ ގައުމުން ކުރިމަތިލާން ޖެހޭނެ ކަމަށެވެ.
މިދިޔަ ޖޫން މަހު އިއުލާންކުރި މި ލުއިތަކުގެ ދަށުން، އީރާނަށް ސާފުނުކުރާ ތެލާއި ތެލުގެ އުފެއްދުންތައް އުފައްދައި، ވިއްކައި އަދި އެކްސްޕޯޓް ކުރުމުގެ ހުއްދަ އަންނަ އޯގަސްޓް މަހުގެ 21 ވަނަ ދުވަހުގެ ނިޔަލަށް އޮތީ ދީފަ އެވެ.
ކަނޑުދަތުރުފަތުރުގެ ކަންކަން ބަލަހައްޓާ ފަރާތްތަކާއި ގަތަރުން ބުނާ ގޮތުގައި، ވޮޝިންގްޓަނުން މި ފިޔަވަޅު އަޅާފައިވަނީ ހުރްމުޒް ކަނޑުއޮޅިން ދަތުރުކުރި ތިން ޓޭންކަރަކަށް، އޭގެ ތެރޭގައި ގަތަރުގެ އެލްއެންޖީ އުޅަނދެއް ހިމެނޭހެން، ހަމަލާދީފައިވާ ދަނޑިވަޅެއްގަ އެވެ.
މި މައްސަލައިގައި ސުލްހަވެރިކަމާއެކު މެދުވެރިއެއްގެ ދައުރު އަދާކުރަމުންދާ ގަތަރުން ވެސް ވަނީ އީރާނުން ދިން މި ހަމަލާއަކީ ބަލައިގަނެވޭނެ ކަމެއް ނޫން ކަމަށް ބުނެ އެކަން ކުށްވެރިކޮށްފަ އެވެ.
އެމެރިކާއާއެކު ގާއިމުކުރި ނާޒުކު ހަނގުރާމަ ހުއްޓާލުމުގެ އެއްބަސްވުމަކަށްފަހު، އީރާނުން އެ ކަނޑުއޮޅި ބަންދުކޮށްފައި އޮތް އޮތުން ނިމުމަކަށް ގެނައި ނަމަވެސް، ފަހުން ހިނގި މި ހާދިސާތަކާއެކު ކަނޑުދަތުރުފަތުރުގެ މިނިވަންކަމާ މެދު އޮތް ކަންބޮޑުވުންތައް އަނެއްކާވެސް ވަނީ އިތުރުވެފަ އެވެ.
ނަން ހާމަނުކުރުމަށް އެދި އަންގާރަ ދުވަހު ވާހަކަދެއްކެވި އެމެރިކާގެ އޮފިޝަލް ވިދާޅުވީ، އީރާނާއެކު ވެފައިވާ ފަހުމުނާމާއަކީ މުޅިންވެސް އެ ގައުމުގެ އަމަލުތައް ހުންނަ ގޮތުގެ މައްޗަށް ބިނާވެފައިވާ އެއްބަސްވުމެއް ކަމަށެވެ. އަދި އީރާނަށް އެއްވެސް މަންފާއެއް ލިބޭނީ އެ ގައުމުން "ރަނގަޅު އަމަލުތަކެއް" ދައްކައިގެން ކަމަށް އޭނާ އިންޒާރު ދެއްވި އެވެ.
ނަމަވެސް، އެމެރިކާގެ މަޝްވަރާވެރިން ދާއިމީ އެއްބަސްވުމަކަށް ދިއުމަށްޓަކައި އިޚްލާޞްތެރިކަމާއެކު މަސައްކަތް ކުރަމުންދާ ކަމަށް އެ އޮފިޝަލް ވިދާޅުވި އެވެ.
މިދިޔަ ފެބްރުއަރީ މަހުގެ ފަހުކޮޅު ފެށުނު ހަމަނުޖެހުންތައް ދާއިމީކޮށް ހުއްޓާލުމަށްޓަކައި ވޮޝިންގްޓަނާއި ތެހެރާނާ ދެމެދު ކުރިއަށްދާ މަޝްވަރާތަކުގައި، ގަލްފުގެ ހަކަތަ އެކްސްޕޯޓް ކުރާ މައި މަގު ކަމަށްވާ ހުރްމުޒް ކަނޑުއޮޅީގެ މުސްތަގުބަލާ މެދު އެއްބަސްވުމަކަށް އައުމަކީ އެންމެ ބޮޑު ގޮންޖެހުމަކަށް ވަނީ ވެފައެވެ.
މަސްދަރު: އޭއެފްޕީ
