ޚާމަނާއީގެ ޖަނާޒާގެ ޙަރަކާތްތައް ވެރިރަށް ތެހެރާންގައި ފަށައިފި

އީރާންގެ ކުރީގެ ރޫހާނީ ލީޑަރު އާޔަތުﷲ އަލީ ޚާމަނާއީގެ ޖަނާޒާގެ ހަރަކާތްތައް ހޯމަ ދުވަހު އެ ޤައުމުގެ ވެރި ރަށް ތެހެރާންގައި ފަށައިފި އެވެ.

ތެހެރާންގައި ކުރިއަށްދާ ޚާމަނާއީގެ ޖަނާޒާގެ ޙަރަކާތް ތަކުގައި ބައިވެރިވުމަށް އެތައް ހާސް ބަޔަކު ވަނީ ޖަމާވެފައި އެވެ. އެމެރިކާ އާއި އިސްރާއީލުގެ ހަމަލާ ތަކަށް ފަހު، މި ޙަރަކާތް ތަކަކީ އީރާންގެ ސާބިތުކަމާއި، ވަރުގަދަކަން ދައްކުވައި ދިނުމަށް އެ ޤައުމަށް ލިބޭ ވަރަށް ބޮޑު ފުރުސަތެކެވެ. 

ނަމަވެސް، ގިނަ ބައެއްގެ ސަމާލުކަން ހުއްޓިފައި ވަނީ ޖަނާޒާގެ އެއްވެސް ޙަރަކާތެއްގައި އީރާންގެ މިހާރުގެ ލީޑަރު މުޖުތަބާ ޚާމަނާއީ ބައިވެރިވެ ވަޑައިގެންފައި ނުވާތީ އެވެ. ބައްޕާފުޅު އަވަހާރަ ކޮށްލި ފަހުން، ރޫހާނީ ލީޑަރުގެ މަޤާމާ ހަވާލުވެ ވަޑައިގެންނެވި ނަމަވެސް، މިހާތަނަށް މުޖުތަބާ އާންމުންގެ ތެރެއިން ފެނިވަޑައިގެންފައި ނުވެ އެވެ. 

އީރާންގެ ގިނަ އަދަދެއްގެ ރައްޔިތުން ވަނީ ތެހެރާންގެ އިރުމަތީގައި ހުންނަ އިމާމް ޙުސައިން މައިދާނަށް އެއްވެފައި އެވެ. އާދީއްތަ ދުވަހު އޮތް ޖަނާޒާގެ ޙަރަކާތުގައި ވެސް އެތައް ހާސް ބަޔަކު ބައިވެރިވެފައިވެ އެވެ. އެގޮތުން ޚާމަނާއީގެ އިތުރުން އާއިލާގެ ހަތަރު ބޭފުޅުންނަށް އިޙްތިރާމް ކުރުމުގެ ގޮތުން ގިނަ ބަޔަކު އެއްވެފައިވެ އެވެ. 

ހޯމަ ދުވަހުގެ ޙަރަކާތް ތަކަށް ފަހު އަންގާރަ ދުވަހު ޚާމަނާއީގެ ހަށިކޮޅު ގެންދެވޭނީ އިރާޤުގެ ނަޖަފް އާއި ކަރުބަލާ އަށެވެ. އަދި އެއަށް ފަހު ބުރާސްފަތި ދުވަހު އަލުން އީރާން އަށް ގެނެސް، މަޝްހަދުގައި ޚާމަނާއީގެ ހަށިކޮޅު ފަސްދާނު ލެވޭނެ އެވެ. 

އާދީއްތަ ދުވަހު ކުރިއަށް ގެންދިޔަ ޖަނާޒާގެ ޙަރަކާތް ތަކުގައި ޚާމަނާއީގެ ހަތަރު ދަރިކަލުން ވެސް ވަނީ ބައިވެރިވެ ވަޑައިގެންފައި އެވެ. ނަމަވެސް، އޭގެ ތެރެއިން ވެސް މުޖުތަބާ ފެންނަން ނެތުމުން ގިނަ ބައެއްގެ ސަމާލުކަން އެކަމަށް ލިބުނެވެ. ބައެއް ފަރާތް ތަކުން ބުނެފައި ވަނީ ބައްޕާފުޅު އަވަހާރަ ކޮށްލަން ދިން ހަމަލާގެ ސަބަބުން، މުޖުތަބާ އަށް ވެސް އަނިޔާ ތަކެއް ލިބިވަޑައިގެންފައިވާ ކަމަށެވެ. ނަމަވެސް، އެ އަނިޔާގެ ތަފްސީލު ތަކެއް ހާމަވެފައި ނުވެ އެވެ. 

އާދީއްތަ ދުވަހުގެ ޖަނާޒާ ޙަރަކާތުގެ ތެރެއިން އީރާންގެ އިސްލާމިކް ރިވޮލިއުޝަނަރީ ގާޑް ކޯޕްސްގެ އައު ކޮމާންޑަރު އަޙުމަދު ވަހީދީ ވަނީ ފެނިފަ އެވެ. މީގެ އިތުރުން ގުދުސް ފޯސްގެ ވެރިޔާ އިސްމާއީލް ޣާނީ ވެސް ވަނީ ޖަނާާޒާގެ ތެރެއިން ފެނިފަ އެވެ.