ކޮންމެސް ޤައުމެއްގައި ހުރި ކޮންމެސް މީހަކު ބައިވެރިވިއޭ ބުނުމަކުން ނުފުދޭ!

މައުލޫމާތު ސިއްރު ކުރުމާއި، ނޫސްވެރިންނަށް މައުލޫމާތު ނުދީ ހިފެހެއްޓުމަށް މި ސަރުކާރުން ކުރަމުންދާ މަސައްކަތަށް އަނެއްކާވެސް އިތުރު ބޮޅެއް މިވަނީ އިތުރުވެފަ އެވެ. މި ދައްކަނީ އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީގެ ޖަނާޒާގައި ދިވެހިރާއްޖޭގެ ފަރާތުން ބައިވެރިވީ ކޮން ބޭފުޅެއްތޯ ކުރި ސުވާލުގެ ޖަވާބު ނުދީ ހިފަހައްޓަން ސަރުކާރުން ކުރަމުންދާހާ މަސައްކަތުގެ ވާހަކަ އެވެ.

އީރާނުގެ ލީޑަރުގެ ޖަނާޒާގައި ބައިވެރިވުމަށް އެ ގައުމުން ފޮނުވި ރަސްމީ ދައުވަތު ލިބިފައިވާ ކަމަށާއި، އެ ދައުވަތު ގަބޫލުކޮށްފައިވާ ކަމަށް ދިވެހި ސަރުކާރުން ވަނީ ކަށަވަރުކޮށްދީފަ އެވެ. ސަރުކާރުގެ އިސް ތަރުޖަމާނު މުހައްމަދު ހުސައިން ޝަރީފް ރާއްޖެޓީވީއަށް މައުލޫމާތު ދެއްވަމުން ވިދާޅުވީ، އެ ދައުވަތު ގަބޫލުކޮށްފައިވާ ކަމަށާއި، ރާއްޖޭގެ ފަރާތުން ބައިވެރިވާނީ ގަލްފް ސަރަހައްދުގައި ހުންނަވާ ސަފީރެއް ކަމަށެވެ.

ނަމަވެސް، އެއީ ކޮން ސަފީރެއްތޯ ސުވާލުކުރުމުން ޝަރީފް އެ ބޭފުޅެއްގެ ނަމެއް ހާމައެއް ނުކުރެއްވި އެވެ. އޭގެ ބަދަލުގައި އޭނާ ވިދާޅުވީ، އެ ސަރަހައްދުގައި ރާއްޖޭގެ ހަތަރު އެމްބަސީއެއް ހުރި ކަމަށާއި، އޭގެ ތެރެއިން މިޝަނެއްގެ މަންދޫބަކު ޖަނާޒާގައި ބައިވެރިވާނެ ކަމަށެވެ. އޭރު ރާއްޖެއަށްވުރެ އެތައް ގޮތަކުން ބޮޑެތި، ޚާރިޖީ ގޮތުން "މުސްކުޅި"، ތަޖުރިބާހުރި ޤައުމުތަކުންވެސް އޮތީ އެ ޤައުމަކުން ދާނެ އޮފިޝަލުންގެ ނަން މީޑިއާތަކަށް ހިއްސާކޮށްފަ އެވެ.

މި ޖަވާބުގެ ސަބަބުން ސަރުކާރުގެ ދެފުށް ފެންނަ ސިޔާސަތާ މެދު ސީރިއަސް ކަންބޮޑުވުންތަކެއް ވަނީ އުފެދިފަ އެވެ. އިސްލާމީ ގައުމެއްގެ އެންމެ އިސްވެރިޔަކު އަވަހާރަވެގެން ޖަނާޒާއެއްގައި ބައިވެރިވާ ދައުލަތުގެ މަންދޫބަކީ ކޮބައިކަން ހާމަކުރުމަކީ ގައުމީ ސަލާމަތާ ގުޅުންހުރި ކަމެއް ނޫނެވެ. އަދި އެއީ ސިއްރު ކުރަންޖެހޭ ފަދަ ޖާސޫސީ މައުލޫމާތެއް ވެސް ނޫނެވެ. އެއީ ހަމަ އެކަނި ޑިޕްލޮމެޓިކް އާންމު މައުލޫމާތެކެވެ.

ދުނިޔޭގެ އެހެން ގައުމުތަކުން މިފަދަ ބައިނަލްއަގުވާމީ ރަސްމިއްޔާތުތަކަށް ފޮނުވާ މަންދޫބުންގެ މައުލޫމާތު އާންމުކޮށް ހާމަކުރެ އެވެ. ހާއްސަކޮށް، ސިޔާސީ ނުވަތަ ދީނީ ގޮތުން ނުފޫޒުގަދަ ޝަހުސިއްޔަތެއްގެ ޖަނާޒާގައި ގިނަ ގައުމުތަކުގެ ވަފުދުތައް ބައިވެރިވާކަން އާންމުކޮށް އެނގެން އޮންނަ ހާލަތްތަކުގައި މިފަދަ މައުލޫމާތު ހާމަކުރުމަކީ އާންމު އުސޫލެކެވެ.

ނަމަވެސް ރާއްޖޭގެ ރައްޔިތުންނަށް ސަރުކާރުގެ ފަރާތުން ލިބުނީ ފުރިހަމަނުވާ ޖަވާބެކެވެ. އެއީ ކޮންމެވެސް އެމްބަސީއެއްގެ "ކޮންމެވެސް މީހަކު" ބައިވެރިވާނެ ކަމަށް ބުނުމެވެ.

މި މައްސަލަ އިތުރަށް ސީރިއަސްވީ، ސަރުކާރުން ދައުވަތު ގަބޫލުކުރި ނަމަވެސް، އީރާނުގެ ޖަނާޒާގައި ދިވެހި ސަރުކާރުގެ ރަސްމީ އެއްވެސް މަންދޫބަކު ބައިވެރިނުވާ ކަމަށް އިތުބާރު ހުރި މަސްދަރުތަކުން ކަށަވަރުކޮށްދިން ހިސާބުންނެވެ. އެއްވެސް ބޭފުޅަކު ބައިވެރިނުވާ ނަމަ، މިވަރުގެ ބޮޑު ދޮގެއް ހަދަން ޖެހުނު ސަބަބު ސަރުކާރުން ސާފުކޮށްދޭންޖެހޭނެ އެވެ. ކޮންމެސް ޤައުމެއްގައި ހުރި ކޮންމެސް މީހަކު ބައިވެރިވިއޭ ބުނެ ބޮޑު ދައުލަތަކުން އެ މިންވަރުގެ ޖަވާބެއްދީގެން ފުއްދައެއް ނުލެވޭނެ އެވެ. މިއީ ރައްޔިތުންނަށް ޖަވާބުދާރީ ވުމުގެ ނުވަތަ ޒިންމާދާރު ސަރުކާރެއްގެ ކޮންފަދަ މިސާލެއް ހެއްޔެވެ؟