އިސްރާއީލުން ސަރަހައްދީ ހަނގުރާމައެއް އަލުން ފެށުމަށް މަސައްކަތް ކުރަމުންދާ ކަމުގެ އިންޒާރު ތުރުކީވިލާތުން ދީފި
ޕާކިސްތާނުގެ ބޮޑުވަޒީރާއެކު ބޭއްވެވި ބައްދަލުވުމުގައި، އިސްރާއީލަކީ ހަނގުރާމައަށް ދެވިހިފާފައިވާ ބައެއްގެ ގޮތުގައި ސިފަކުރައްވައި، އެ ގައުމުން ސަރަހައްދީ މަސްރަހު ގޯސްކުރަން ކުރާ މަސައްކަތްތަކަށް ތުރުކީގެ ރައީސް އުރުދުޣާން ވަރަށް ބޮޑަށް ފާޑުވިދާޅުވެއްޖެ. ޣައްޒާގައި ހިންގާ ގަތުލުއާންމަށް އިސްރާއީލު ޒިންމާދާރުކުރުވާނެ ކަމުގެ އިންޒާރު ދެއްވަމުން، މަޝްވަރާގެ އުސޫލުން ސަރަހައްދީ ސުލްހަ ގާއިމުކުރުމަށް ކުރެވޭ މަސައްކަތްތަކަށް ތުރުކީން ފުރިހަމައަށް ތާއީދުކުރާނެ ކަމަށް އޭނާ ވިދާޅުވި. މީގެ އިތުރުން، އިސްރާއީލުގެ އަމަލުތައް ނާޒީ ޖަރުމަނާ އެއްފަދަކުރައްވައި، ސަރަހައްދީ ހަމަޖެހުން ގާއިމުކުރުމަށް އިސްލާމީ ގައުމުތަކާ ގުޅިގެން މަސައްކަތް ކުރައްވާނެ ކަމަށްވެސް އުރުދުޣާން ވިދާޅުވި.
ތުރުކީވިލާތުގެ އިސްތަންބޫލްގައި 2026 ވަނަ އަހަރުގެ ޖުލައި މަހުގެ 4 ވަނަ ދުވަހު ބޭއްވި ގުޅިފައިވާ ނޫސްވެރިންގެ ބައްދަލުވުމެއްގެ ތެރެއިން، ތުރުކީވިލާތުގެ ރައީސް ރަޖަބް ތައްޔިބް އުރުދުޣާން (ކ) އަދި ޕާކިސްތާނުގެ ބޮޑުވަޒީރު ޝެހްބާޒް ޝަރީފް | ގެޓީ އިމޭޖަސް
އިސްރާއީލުން ސަރަހައްދީ ހަނގުރާމައެއް އަލުން ފެށުމަށް މަސައްކަތް ކުރަމުންދާ ކަމުގެ އިންޒާރު ތުރުކީވިލާތުން ދީފިއެވެ.
ތުރުކީވިލާތުގެ ރައީސް ރަޖަބް ތައްޔިބް އުރުދުޣާން ވިދާޅުވީ، އިސްރާއީލުގެ ސަބަބުން ސަރަހައްދީ ހަނގުރާމައެއް ފެށުމުގެ ބިރު އެބައޮތް ކަމަށާއި، މަޝްވަރާ އާއި ޑިޕްލޮމަސީގެ ޒަރީއާއިން މަސްރަހު ފިނިކުރުމަށް ކުރެވޭ މަސައްކަތްތަކަށް އަންކާރާއިން ތާއީދުކުރާ ކަމަށެވެ.
ޕާކިސްތާނުގެ ބޮޑުވަޒީރު ޝެހްބާޒް ޝަރީފާއެކު އިސްތަންބޫލްގައި ބޭއްވެވި ބައްދަލުވުމަށްފަހު ބޭއްވި ގުޅިފައިވާ ނޫސްވެރިންގެ ބައްދަލުވުމުގައި އުރުދުޣާން ވިދާޅުވީ، ދީނީ ތަފާތުކުރުމެއް ނެތި ސަރަހައްދުގެ ހުރިހާ ރައްޔިތުންނަށް ސުލްހަޔާއި އަމާންކަން ލިބުމަށް ތުރުކީވިލާތުން އެދޭ ކަމަށެވެ.
"އަޅުގަނޑުމެން ބޭނުންވަނީ ދީނީ އަގީދާއަށް ބެލުމެއް ނެތި، ސަރަހައްދުގެ ހުރިހާ ރައްޔިތުން ސުލްހަޔާއި އަމާންކަމާއެކު ދިރިއުޅޭނެ މާހައުލެއް ގާއިމުކުރަން،" އުރުދުޣާން ވިދާޅުވި އެވެ.
ނަމަވެސް، ތުރުކީގެ ރައީސް އިތުރަށް ވިދާޅުވީ އިސްރާއީލަކީ "ހަނގުރާމައަށް ދެވިހިފާފައިވާ" ބައެއް ކަމަށާއި، އެ ފުރުސަތު އެ ގައުމަށް ދީގެން ނުވާނެ ކަމަށެވެ.
އުރުދުޣާން ވިދާޅުވީ ސަރަހައްދީ ނުތަނަވަސްކަން ކުޑަކުރުމަށާއި ޑިޕްލޮމެޓިކް އުސޫލުން މައްސަލަތައް ހައްލުކުރުމަށް ކުރާ މަސައްކަތްތަކަށް އަންކާރާއިން ދެމުންދާ އެއްބާރުލުން ކުރިއަށް ގެންދާނެ ކަމަށެވެ.
"މަސްރަހު ފިނިކުރުމަށް އެޅޭ ކޮންމެ ފިޔަވަޅަކަށާއި، މަޝްވަރާގެ މަތިން މައްސަލަތައް ހައްލުކުރުމަށް ކުރެވޭ ކޮންމެ މަސައްކަތަކަށް އަޅުގަނޑުމެން ތާއީދުކުރަން،" އޭނާ ވިދާޅުވި އެވެ.
އޭނާ އިތުރަށް ވިދާޅުވީ ސަރަހައްދީ ހަމަޖެހުމާއި، ސަލާމަތާއި، ފާގަތިކަން ކުރިއެރުވުމަށްޓަކައި ޕާކިސްތާނު ހިމެނޭހެން "އަޚުވަންތަ ގައުމުތަކާއެކު" ތުރުކީވިލާތުން ގުޅިގެން މަސައްކަތް ކުރަމުންދާނެ ކަމަށެވެ.
ސަރަހައްދީ ހަނގުރާމައެއް ފެށިދާނެ ކަމުގެ އިންޒާރު ތުރުކީގެ ރައީސް ތަކުރާރުކޮށް ދެއްވަމުން ގެންދަވާއިރު، އިސްރާއީލުގެ ސަބަބުން މުޅި ސަރަހައްދަށް ހަނގުރާމަ ފެތުރިދާނެ ކަމަށް ވިދާޅުވެ އޭނާ ދެއްވާ އިންޒާރުތައް ފާއިތުވި ހަފުތާތަކުގައި ވަނީ ވަރުގަދަ ކުރައްވާފައެވެ.
ނިމިދިޔަ މަހުގެ ފަހުކޮޅު އަންކާރާގައި ބޭއްވި ތުރުކީގެ ރެޑް ކްރެސެންޓް އެވޯޑް ދިނުމުގެ ރަސްމިއްޔާތެއްގައި އުރުދުޣާން ވަނީ އިސްރާއީލަކީ "ސަރަހައްދުގައި ފިތުނަވެރިކަމާއި، ލޭއޮހޮރުވުމާއި، ހަމަނުޖެހުން އުފައްދާ ފެކްޓަރީއެއްގެ" ގޮތުގައި ސިފަކުރައްވާފަ އެވެ.
އޭނާ ވިދާޅުވީ ޣައްޒާ ގައި އިސްރާއީލުން ހިންގަމުންދާ ގަތުލުއާންމަށް އެ ގައުމު ޒިންމާދާރުކުރުވުމަށް ތުރުކީން މަސައްކަތް ކުރަމުންދާ ކަމަށާއި، އެކަމުގައި ޒިންމާވާންޖެހޭ ފަރާތްތައް ގާނޫނާއި ތާރީޚުގެ ކުރިމަތީގައި ޖަވާބުދާރީ ކުރުވާނެ ކަމަށެވެ.
މި މަހުގެ ކުރީކޮޅުވެސް އުރުދުޣާން ވަނީ އިސްރާއީލަށް ވަރަށް ބޮޑަށް ފާޑުވިދާޅުވެފަ އެވެ. އެގޮތުން އިސްރާއީލަކީ ނާޒީ ޖަރުމަނު ފަދަ ބައެއްގެ ގޮތުގައި ސިފަކުރައްވައި، "އެޑޮލްފް ހިޓްލަރުގެ ފިޔަވަޅުމަތިން ހިނގާ މީހުން" އެ މަގުން ކުރިއަށްދާނަމަ، އެމީހުންނަށްވެސް ޖެހޭނީ ހިޓްލަރަށް ޖެހުނު ފަދަ ހާލެއް ކަމަށް އޭނާ ވިދާޅުވި އެވެ.
"ލޭގެ ވަސް ދުވުމުން ހަމަލާދޭ މިޔަރެއް ފަދައިން މި ސަރަހައްދަށް ހަމަލާދޭ މީހުން، މިއަދު ނޫނީ މާދަމާވެސް އޭގެ އަގު އަދާކުރަން ޖެހޭނެ،" ކަމަށް ވިދާޅުވެ އުރުދުޣާން އިންޒާރު ދެއްވި އެވެ.
