ޣައްޒާގެ ހަނގުރާމައަށް 1،000 ދުވަސް - މުހިންމު ތަފާސްހިސާބުތައް

އިސްރާއީލުން ޣައްޒާގައި ހިންގަމުންދާ ނަސްލު ނައްތާލުމުގެ ލާއިންސާނީ ހަނގުރާމައަށް 1،000 ދުވަސް ފުރުމާ ގުޅިގެން، ޣައްޒާ ސަރުކާރުގެ މީޑިއާ އޮފީހުން ވަނީ މުހިންމު ތަފާސްހިސާބުތަކެއް ހިމެނޭ ބަޔާނެއް ނެރެފަ އެވެ.

އެ ބަޔާނުގައި ފާހަގަކޮށްފައިވާ މުހިންމު ބައެއް ކަންތައްތަކަކީ:

• އިސްރާއީލުން ދެމުންދާ ވަރުގަދަ ހަމަލާތަކުގެ ސަބަބުން ޣައްޒާގެ 90 އިންސައްތައަށްވުރެ ބޮޑު ބައެއް ވަނީ ސުންނާފަތިވެފަ އެވެ.
• އިސްރާއީލުގެ އެއްގަމު މަގުން ދޭ ހަމަލާތަކާއި، މަޖުބޫރުން މީހުން ހުސްކުރުމަށް ނެރޭ އަމުރުތަކުގެ ސަބަބުން ޣައްޒާގެ ބިމުގެ 80 އިންސައްތަ ސަރަހައްދެއް މިހާރު އޮތީ އިސްރާއީލު ސިފައިންގެ ބާރުގެ ދަށުގަ އެވެ.
• އިސްރާއީލުން ޣައްޒާއަށް ގާތްގަނޑަކަށް 223،000 ޓަނުގެ ގޮވާތަކެތި އަޅާފައިވެ އެވެ. މިއީ 1945 ވަނަ އަހަރު އެމެރިކާއިން ޖަޕާނުގެ ހީރޯޝީމާއަށް އެޓަމިކް ބޮން އެޅިއިރު ބޭނުންކުރި ގޮވާތަކެތީގެ މިންވަރަށްވުރެ 16 ގުނަ އިތުރު އަދަދެކެވެ.
• 2023 ވަނަ އަހަރުގެ އޮކްޓޫބަރު މަހުން ފެށިގެން މިހާތަނަށް ފަލަސްތީނުގެ މަދުވެގެން 73،066 މީހުން ވަނީ ޝަހީދުކޮށްލާފަ އެވެ. މީގެ ތެރޭގައި އިމާރާތްތަކުގެ ދަށުގައިވެގެން ނުވަތަ ވީނުވީއެއް ނޭނގި ގެއްލިފައިވާ 9،500 މީހުން ހިމެނެ އެވެ.
• ޝަހީދުވި މީހުންގެ ތެރެއިން 21،500 އަށްވުރެ ގިނަ މީހުންނަކީ ކުޑަކުދިންނެވެ. މީގެ ތެރޭގައި އެއް އަހަރު ނުފުރޭ 1،022 ތުއްތު ކުދިން ހިމެނެ އެވެ.
• ޣައްޒާގައި އިސްރާއީލު ސިފައިން ދިން ހަމަލާތަކުގައި މަދުވެގެން 262 ނޫސްވެރިންނާއި، ފަލަސްތީނުގެ ސިވިލް ޑިފެންސްގެ 145 މުވައްޒަފުންގެ އިތުރުން ފަލަސްތީނުގެ 928 ކުޅިވަރު އެތުލީޓުން ވަނީ ޝަހީދުކޮށްލާފަ އެވެ.

ފަލަސްތީނުގެ ރައްޔިތުންގެ ކުރިމަގަކީ ކޮބާ؟

ހަނގުރާމައިގެ 1،000 ވަނަ ދުވަހު ޣައްޒާގެ ހާލަތު އޮތް ގޮތަށް ބަލާލާއިރު:

2025 ވަނަ އަހަރުގެ އޮކްޓޫބަރު މަހު އިއުލާންކުރި "ސުލްހައިގެ އެއްބަސްވުމަށް" ފަހު އިސްރާއީލުގެ ވައިގެ ހަމަލާތަކާއި ބޮޑުބަޑީގެ ހަމަލާތައް މަދުވި ނަމަވެސް، ކޮންމެ ދުވަހަކު ކަހަލަ ގޮތަކަށް ހަމަލާތައް ދަނީ ދެމުންނެވެ. އެއާއެކު ސުލްހައިގެ އެއްބަސްވުން ގާއިމުކުރި ފަހުން ވެސް ފަލަސްތީނުގެ 1،053 މީހުން ޝަހީދުވެފައިވާ ކަމަށް ޣައްޒާގެ ހެލްތު މިނިސްޓްރީން ބުނެ އެވެ. މީގެ ތެރޭގައި 350 އަށްވުރެ ގިނަ އަންހެނުންނާއި ކުޑަކުދިން ހިމެނޭއިރު، ހަމަ މި މުއްދަތުގައި 3،400 އަށްވުރެ ގިނަ މީހުން ވަނީ ޒަޚަމްވެފަ އެވެ.

އިސްރާއީލުން ޣައްޒާގެ ބިންތަކަށް އަތްގަދަކުރަމުންދާ ދިއުމުގެ ސަބަބުން، ވަކި އިންތަކެއް ކަނޑައެޅިފައި ނުވާ ސަރަހައްދުތަކުގައި ދިރިއުޅޭ އާންމު ރައްޔިތުންގެ ފުރާނައަށް އޮތް ނުރައްކާ ބޮޑުވަމުންދާ ކަމަށް އދ. އިން ބުދަ ދުވަހު ވަނީ އިންޒާރު ދީފައެވެ.

ޣައްޒާއަށް ވަދެނިކުމެވާ ހުރިހާ ބޯޑަރުތަކެއް އިސްރާއީލު ސިފައިން ވަނީ ބަންދުކޮށް ނުވަތަ ވަރަށް ބޮޑަށް ހިފަހައްޓާފަ އެވެ. މީގެ މާނައަކީ ޣައްޒާ އަދިވެސް އޮތީ އިސްރާއީލުގެ ފުރިހަމަ ހިސާރުގެ ދަށުގައެވެ. އިސްރާއީލުން ޣައްޒާ ހިސާރުކޮށްފައި އޮތުމުގެ ސަބަބުން، އަސާސީ ސާމާނު ނުލިބިގެން 17 ހޮސްޕިޓަލެއްގެ ޚިދުމަތް މެދުކެނޑިފައިވާ ކަމަށް އދ. އިން މިދިޔަ މަހު ވަނީ ހާމަކޮށްފަ އެވެ.

1،000 ދުވަހުގެ ހަނގުރާމައަށްފަހު، ކެތްތެރިކަން ކޮޅުންލާފައިވާ ކަމަށް ފަލަސްތީނުގެ ގިނަ ރައްޔިތުން ބުނެ އެވެ. އެތައް ލައްކަ ބަޔަކު ދިރިއުޅެމުންދަނީ އަސާސީ ޚިދުމަތްތަކެއް ނެތް ފޭލިގެތަކުގަ އެވެ. ނުވަތަ ބޮން އަޅައި ސުންނާފަތިކޮށްފައިވާ އިމާރާތްތަކުގެ ކުނިބުނީގެ ތެރޭގަ އެވެ.

ބައިނަލްއަގުވާމީ ސިއްހީ މާހިރުންނާއި ކާބޯތަކެތީގެ ރައްކާތެރިކަމާ ބެހޭ މާހިރުން ލަފާކުރި ގޮތަށް، މިދިޔަ އޮގަސްޓް މަހު ޣައްޒާ ސިޓީގައި ވަނީ ބޮޑު ތަދެއް ނުވަތަ ބަނޑުހައިހޫނުކަން އިއުލާންކޮށްފަ އެވެ. ނަމަވެސް، ޣައްޒާގެ މަދަނީ ކަންކަން ވިލަރެސްކުރާ އިސްރާއީލުގެ އަސްކަރީ އިދާރާ ކަމަށްވާ ކޯގަޓް (COGAT) އިން ބުނެފައިވަނީ، ޣައްޒާއަށް އެތެރެކުރާ ކާބޯތަކެތީގެ މިންވަރު އެ ސިޓީގެ ރައްޔިތުންގެ ކާނާގެ ބޭނުންތަކަށްވުރެ މާ އިތުރު ކަމަށެވެ.