ބަލޯގަންގެ ރަތްކާޑުގެ އަދަބު ލުއިކުރުމާ ގުޅިގެން ފީފާގެ ރައީސް އިންފަންޓީނޯ ގެ މައްސަލަ ބެލުމަށް ޔޫރަޕްގެ ޕާލަމެންޓުގެ މެމްބަރުން ގޮވާލައިފި

އެމެރިކާގެ ފޯވާޑް ފޮލަރިން ބަލޯގަންއަށް ރަތް ކާޑެއް ދައްކާފައި ވަނިކޮށް، އޭނާއަށް މެޗުތަކުގައި ކުޅުމުގެ ހުއްދަ ދިނުމަށް ނިންމި ނިންމުމުގައި ފީފާގެ ރައީސް ޖިއާނީ އިންފަންޓީނޯ ބައިވެރިވެފައިވާ މައްސަލަ ޔޫރަޕްގެ ޕާލަމެންޓުން ތަހުގީގު ކުރުމަށް، އެ ޕާލަމެންޓުގެ ގިނަ އަދަދެއްގެ މެންބަރުން މަސައްކަތް ފައްޓަވައިފިއެވެ.

މިދިޔަ ޖުލައި މަހުގެ 1 ވަނަ ދުވަހު ބޮސްނިއާ-ހެރްޒެގޮވީނާ އަތުން އެމެރިކާ މޮޅުވި މެޗުގައި ބަލޯގަންއަށް ރަތް ކާޑެއް ދައްކާފައިވާތީ، އާންމު އުސޫލުން އޭނާއަށް ޖެހިގެން އަންނަ މެޗުގައި ނުކުޅެވޭނެ އެވެ. ނަމަވެސް، އުމުރުން 25 އަހަރުގެ މި ފޯވާޑަށް ދީފައިވާ ސަސްޕެންޝަން، އެމެރިކާގެ ރައީސް ޑޮނަލްޑް ޓްރަމްޕް އިންފަންޓީނޯއަށް ގުޅުއްވައި ކުރެއްވި އިލްތިމާސަކާ ގުޅިގެން، މިދިޔަ ހޯމަ ދުވަހުގެ މެޗަށް ފީފާއިން ވަނީ އުވާލާފަ އެވެ.

ޔޫރަޕްގެ ޕާލަމެންޓުގެ މެންބަރުން ކަމަށްވާ ބެރީ އެންޑްރޫސް، ލާރާ ވޮލްޓާސް އަދި ނީލްސް ފުގްލްސަންގް ނެރުއްވި ގުޅިފައިވާ ބަޔާނެއްގައި ވިދާޅުވީ، މުބާރާތުގެ މެދުތެރެއިން ރަތް ކާޑުގެ ސަސްޕެންޝަނާ ގުޅޭ ގަވާއިދު ބަދަލުކުރުމަށް ފީފާއިން ނިންމި ނިންމުމަކީ ލަދުވެތި އަދި އިންސާފުން އެއްކިބާވެފައިވާ ނިންމުމެއް ކަމަށެވެ.

އެ ބަޔާނުގައި އިތުރަށް ބުނެފައިވަނީ، އިންފަންޓީނޯ އާއި ފީފާއިން ޓްރަމްޕްގެ ސަރުކާރުގެ ނުފޫޒަށް ދޫދީފައިވާކަން އަނެއްކާވެސް ހާމަވެގެން ގޮސްފައިވާ ކަމަށެވެ.

ޔޫރަޕްގެ އިއްތިހާދުގެ ގައުމުތަކުގެ ފުޓްބޯޅަ އެސޯސިއޭޝަންތަކުން ފީފާގެ އެތިކްސް ކޮމިޓީއަށް ބާރުއަޅައި، މި މައްސަލަ ތަހުގީގު ކުރުމަށް މެންބަރުން ދަނީ ގޮވާލަމުންނެވެ. މި ތަހުގީގުގައި ބަލޯގަންގެ ސަސްޕެންޝަން އުވާލުމުގައި ޓްރަމްޕްގެ ސަރުކާރުގެ ނުފޫޒެއް އޮތްތޯ ބެލުމުގެ އިތުރުން، ޓްރަމްޕަށް "ފީފާ ޕީސް ޕްރައިޒް" އެރުވުން ފަދަ ސިޔާސީ ނުފޫޒުން އެއްކިބާވެ އޮތުމުގެ އުސޫލާ ޚިލާފު ކަންކަން ހިނގާފައިވޭތޯ ބެލުމަށް ވެސް މެންބަރުން ވަނީ އެދިވަޑައިގެންފައެވެ.

ފީފާއިން ބުނެފައިވަނީ ސަސްޕެންޝަން އުވާލުމަކީ އެ އިދާރާގެ ޑިސިޕްލިނަރީ ކޮމިޓީން ނިންމި ނިންމުމެއް ކަމަށެވެ.

މި މައްސަލައިގައި ފޮނުވާ ސިޓީގައި މިހާތަނަށް 35 މެންބަރަކު ސޮއިކުރައްވާފައިވާ ކަމަށް ޔޫރަޕްގެ ޕާލަމެންޓުގެ މެންބަރުން ވިދާޅުވި އެވެ.

"ކުޅިވަރުގެ ރީތިކަމަކީ ވަކި ފަރާތަކަށް ނުޖެހޭ، ހާމަކަން ބޮޑު ގަވާއިދުތަކެއްގެ މައްޗަށް އެކަން ބިނާވެފައި އޮތުން. ސިޔާސީ ނުފޫޒުގެ ސަބަބުން ކުޅޭނެ ކުޅުންތެރިން ކަނޑައެޅުމަށް އިންފަންޓީނޯ ފުރުސަތު ދެއްވުމުން، ކުޅިވަރުގައި އޮންނަންޖެހޭ އިންސާފުވެރިކަން ގެއްލިގެންދޭ،" މެންބަރުން ވިދާޅުވި އެވެ.