ތުރުކީއާ ދެކޮޅަށް އެމެރިކާ އިން އަޅާފައިވާ ދަތިކުރުމުގެ ފިޔަވަޅު އުވާލަނީ

ނޭޓޯ ސަމިޓުގެ ހަވާސާގައި އަންގާރަ ދުވަހު ތުރުކީވިލާތުގެ ރައީސް ރަޖަބް ތައްޔިބް އުރުދުޣާންއާ ބައްދަލުކުރައްވައި ވާހަކަފުޅު ދައްކަވަމުން، އެމެރިކާއިން ތުރުކީއާ ދެކޮޅަށް އަޅާފައިވާ ދަތިކުރުމުގެ ފިޔަވަޅުތައް އުވާލައްވާނެ ކަމަށާއި، އެ ގައުމަށް އެފް-35 މަރުކާރުގެ ހަނގުރާމަމަތީ ބޯޓުތައް ވިއްކުމާ މެދު ގޮތެއް ނިންމަވާނެ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އެމެރިކާގެ ދުޝްމަނުންނާ ދެކޮޅަށް ދަތިކުރުމުގެ ފިޔަވަޅު އެޅުމަށް އެކުލަވާލާފައިވާ "ކައުންޓަރިންގ އެމެރިކާސް އެޑްވާސަރީސް ތުރޫ ސެންކްޝަންސް އެކްޓް" (ކާޓްސާ) ގެ ދަށުން އަޅާފައިވާ ފިޔަވަޅުތަކާ ގުޅޭގޮތުން ނޫސްވެރިން ސުވާލުކުރުމުން، ޓްރަމްޕް ވިދާޅުވީ އެ ފިޔަވަޅުތައް އުވާލައްވާނެ ކަމަށެވެ.

ރަޝިޔާގެ އެސް-400 ވައިގެ ދިފާއީ ނިޒާމު ތުރުކީން ގަތުމާ ގުޅިގެން، 2020 ވަނަ އަހަރު ވޮޝިންގޓަނުން ވަނީ ކާޓްސާގެ ދަށުން ތުރުކީއާ ދެކޮޅަށް ދަތިކުރުމުގެ ފިޔަވަޅު އަޅާފަ އެވެ. މީގެ އިތުރުން، އެމެރިކާއިން ވަނީ އެފް-35 ފައިޓަރ ޖެޓް ޕްރޮގްރާމުން ތުރުކީ ވަކިކޮށްފަ އެވެ. އެމެރިކާގެ މި ނިންމުމަކީ ބޭއިންސާފު އަދި ޣައިރު ގާނޫނީ ނިންމުމެއް ކަމަށް ތުރުކީން އޭރު ބުނެފައިވެ އެވެ.

މި މައްސަލައިގެ މައުލޫމާތު އެނގޭ ދެ މަސްދަރަކުން އަންގާރަ ދުވަހު ބުނި ގޮތުގައި، ގާނޫނީ ގޮތުންނާއި ކޮންގްރެސްގެ ތެރެއިން ކުރިމަތިވެފައިވާ ހުރަސްތައް މުޅިން ހައްލުނުވި ނަމަވެސް، މި ދަތުރުފުޅުގެ ތެރެއިން ތުރުކީއަށް އެފް-35 ބޯޓުތައް ވިއްކުމަށް ޓްރަމްޕް ތާއީދުކުރައްވާނެ ކަމަށް ބެލެވެ އެވެ.

"އެއީ އަޅުގަނޑުމެން ގޮތެއް ނިންމާނެ ކަމެއް،" އެފް-35 ބޯޓުތައް ވިއްކުމާ ގުޅޭގޮތުން ޓްރަމްޕް ވިދާޅުވި އެވެ. މީގެ އިތުރުން، އޭނާއާއި ރައީސް އުރުދުޣާން ދެ ގައުމުގެ ދެމެދުގައި އޮތް ވިޔަފާރީގެ ގުޅުންތަކާ ބެހޭގޮތުން ވެސް މަޝްވަރާ ކުރައްވާނެ ކަމަށް ޓްރަމްޕް ވިދާޅުވި އެވެ.