އެއް ގޮތަކީ އީރާން އާއެކު އެއްބަސްވުމަކަށް އައުން، އެހެން ނޫނީ އީރާން ނައްތާލުންް: ޓްރަމްޕް

އީރާން އާއި އެމެރިކާއާ ދެމެދު ދާއިމީ އެއްބަސްވުމަކަށް އާދެވޭނެ ކަމަށާއި، އެހެން ނޫން ނަމަ އީރާން ނައްތާލާނެ ކަމުގެ އިންޒާރު އެމެރިކާގެ ރައީސް ޑޮނަލްޑް ޓްރަމްޕް ދެއްވައިފި އެވެ. 

އެމެރިކާ އާއި އީރާންއާ ދެމެދު އަންނަނީ ދާއިމީ އެއްބަސްވުމަކަށް އައުމުގެ މަޝްވަރާތައް ކުރިއަށް ގެންދަމުންނެވެ. ނަމަވެސް، އެކަމުގައި މިހާތަނަށް އަލި މަގެއް ފެނިފައި ނުވާއިރު، މަޝްވަރާތައް މެދު ކަނޑާލާފައި ވަނީ އީރާންގެ ކުރީގެ ރޫހީ ލީޑަރު އާޔަތުﷲ އަލީ ޚާމަނާއީގެ ޖަނާޒާގެ ކަންކަން ކުރިއަށް ގެންދިޔުމަށެވެ. 

އެމެރިކާގެ ރިޔާސީ ގަނޑުވަރު ވައިޓް ހައުސްގައި ނޫސްވެރިންނާ ވާހަކަ ދައްކަވަމުން ޓްރަމްޕް ވިދާޅުވީ، އެއް ގޮތަކީ އީރާން އާއެކު އެއްބަސްވުމަކަށް އައުން ކަމަށެވެ. އެހެން ނޫނީ އެމެރިކާ އިން މަސައްކަތް ނިންމާލުން ނުވަތަ އީރާން ނައްތާލުން ކަަމަށް ވެސް ޓްރަމްޕް ވިދާޅުވި އެވެ. 

އެކަން ފާހަގަކޮށް ޓްރަމްޕް ވިދާޅުވީ އެ މަސައްކަތް ނިންމާލުމަކީ އެމެރިކާ އަށް އުނދަގޫ ކަމަކަށް ނުވާނެ ކަމަށެވެ. އެހެން ނަމަވެސް، 90 މިލިއަން މީހުންނަށް އަސަރު ކުރަން ބޭނުން ނުވާ ކަމަށާއި، އެއްބަސްވުމަކަަށް ދާން ބޭނުން ވަނީ އެ ސަބަބާ ހުރެ ކަމަށް ޓްރަމްޕް ވިދާޅުވި އެވެ.  

އީރާން އަށް އިންޒާރު ދެއްވަމުން ޓްރަމްޕް ވިދާޅުވީ ބަރާބަރު އެއް ގަޑިއިރުގެ ތެރޭގައި އީރާންގެ ބްރިޖުތައް ވައްޓާލެވޭނެ ކަމަށާއި، އަދި އެ ޤައުމުގެ ހަކަތައިގެ ނިޒާމު ފުނޑާލެވޭނެ ކަމަށެވެ. ޓްރަމްޕް ވިދާޅުވީ އީރާންގައި މިހާރު ފައިސާއެއް ނެތް ކަމަަށާއި، އެމެރިކާ އިން އެއްވެސް ފައިސާއެއް ދީފައި ވެސް ނުވާނެ ކަމަށެވެ.

ޓްރަމްޕް މިހެން ވިދާޅުވި ނަމަވެސް، އީރާންގައި މިހާރު ކުރިއަށް ގެންދާ ޚާމަނާއީގެ ޖަނާޒާގައި އެ ޤައުމު ފެނިގެން ދަނީ ވަރަށް ވަރުގަދަ ކޮށެވެ. ޚާމަނާއީގެ ޖަނާޒާގައި ބައިވެރިވާ އީރާންގެ ރައްޔިތުން ވަނީ، ޓްރަމްޕް މަރާލުމަށް ވެސް ގޮވާލައިފަ އެވެ. އަދި އެމެރިކާ އާއި އިޒްރޭލްއާ މެދު އެ މީހުންގެ ހިތުގައި އޮތް ރުޅިވެރިކަން ވަނީ ދައްކާލައިފަ އެވެ. 

ޓްރަމްޕްގެ މި އިންޒާރު ތަކުން ސާފު ވަނީ، އެމެރިކާ އިން އޮތީ އަދި ވެސް އީރާންއާ ދެކޮޅަށް ހަމަލާ ދިނުމަށް ތައްޔާރަށް ކަމަށެވެ.