ކުވެއިތާއި ބަހްރައިންގައި ހުރި އެމެރިކާގެ 85 ތަނަކަށް ހަމަލާ ދީފިން: އީރާން
އައިއާރުޖީސީގެ ކަނޑުގެ ސިފައިންނާއި ވައިގެ ސިފައިން ގުޅިގެން ހިންގި މި ޚާއްސަ އޮޕަރޭޝަނުގައި މިސައިލް އާއި ޑްރޯން ބޭނުން ކޮށްގެން އެމެރިކާގެ އަސްކަރީ މަރުކަޒު ތަކުގެ ތެރެއިން މުހިންމު 85 ތަނަކަށް ހަމަލާ ދީފައިވާ ކަމަށް އެ ޖަމާއަތުން ވަނީ ބުނެފައި.
އީރާންގެ ވެރި ރަށް ތެހެރާންގެ އިންގިލާބު މައިދާނުގައި ހުންނަ އިމާރާތެއްގައި ހަރުކޮށްފައިވާ އީރާންގެ ގައުމީ ދިދަ ކައިރިން އުޅަނދު ފަހަރު ދަތުރު ކުރަނީ. | ރޮއިޓާސް
ބަަހްރައިން އާއި ކުވެއިތުގައި ހުރި އެމެރިކާގެ އަސްކަރީ މަރުކަޒު ތަކަށް އަމާޒުކޮށް ވަރުގަދަ ހަމަލާ ތަކެއް ދީފަައިވާ ކަމަށް، އީރާންގެ އިސްލާމިކް ރިވޕޮލިއުޝަނަރީ ގާޑް ކޯޕްސް (އައިއާރުޖީސީ) އިން ބުނެފި އެވެ.
އައިއާރުޖީސީގެ ކަނޑުގެ ސިފައިންނާއި ވައިގެ ސިފައިން ގުޅިގެން ހިންގި މި ޚާއްސަ އޮޕަރޭޝަނުގައި މިސައިލް އާއި ޑްރޯން ބޭނުން ކޮށްގެން އެމެރިކާގެ އަސްކަރީ މަރުކަޒު ތަކުގެ ތެރެއިން މުހިންމު 85 ތަނަކަށް ހަމަލާ ދީފައިވާ ކަމަށް އެ ޖަމާއަތުން ވަނީ ބުނެފައި އެވެ.
އައިއާރުޖީސީ އިން ހާމަ ކޮށްފައިވާ ގޮތުގައި މި ހަމަލާތައް މައިގަނޑު ގޮތެއްގައި އަމާޒު ކޮށްފައި ވަނީ ބަހްރައިންގައި ހުންނަ އެމެރިކާގެ ފިފްތު ފްލީޓް ބޭސް، ނުވަތަ ފަސް ވަނަ ފްލީޓްގެ މަރުކަޒަށާއި، ކުވެއިތުގައި ހުންނަ އަލީ އަލް ސާލިމް އެއާބޭސް އަށެވެ. މި ދެ ތަނަކީ ވެސް މެދު އިރުމަތީގައި އެމެރިކާގެ އަސްކަރީ ހަރަކާތްތައް ހިންގުމުގައި ބޭނުންކުރާ އެންމެ މުހިންމު ދެ މަރުކަޒެވެ.
މި ހަމަލާ ތަކަކީ އެމެރިކާ އިން ހަނގުރާމަ ހުއްޓާލުމުގެ އެއްބަސްވުމާއި، އިސްލާމްއާބާދު އެއްބަސްވުމާ ޚިލާފު ވުމުން އެކަމަށް ދިން ފުރަތަމަ ރައްދު ކަމަށް އީރާން އިން ބުނެ އެވެ. އޭގެ ކުރިން އެމެރިކާގެ އަސްކަރީ މަތިންދާ ބޯޓު ތަކުން ވަނީ އީރާންގެ އަސްކަރީ މަރުކަޒު ތަކަށާއި، އަސްކަރީ ނޫން ބައެއް ތަންތަނަށް ވައިގެ މަގުން ހަމަލާ ދީފައި އެވެ. އީރާން އިން ބުނާ ގޮތުގައި އެމެރިކާގެ މި އަމަލަކީ ބައިނަލްއަގުވާމީ މިންގަނޑުތަކާ ޚިލާފަށް ހިންގި އުދުވާނެކެވެ.
މީގެ އިތުރުން އައިއާރުޖީސީ އިން ތުހުމަތު ކުރާ ގޮތުގައި އެމެރިކާ އިން މި ހަމަލާތައް ދީފައި ވަނީ އީރާންގެ ކުރީގެ ރޫހާނީ ލީޑަރު އާޔަތުﷲ އަލީ ޚާމަނާއިގެ ޖަނާޒާއާ ދިމާކޮށެވެ. އެމެރިކާގެ ބޭނުމަކީ އެ ތާރީޚީ ރަސްމިއްޔާތުގެ މުހިންމުކަން ކުޑަކޮށް، ދުނިޔޭގެ ސަމާލުކަން އެހެން ދިމާލަކަށް އަނބުރާލުން ކަމަށް ވެސް އީރާންގެ އަސްކަރިއްޔާ އިން ބުނެފައިވެ އެވެ.
މި ހަމަލާތަކާ ގުޅިގެން މެދު އިރުމަތީގެ މަސްރަހު ވަނީ ނުހަނު ބޮޑަށް ހޫނުވެފައި އެވެ. އެމެރިކާގެ އަސްކަރީ މަރުކަޒު ތަކަށް ލިބުނު ގެއްލުން ތަކުގެ ތަފްސީލު އަދި މިހާތަނަށް އެމެރިކާގެ ދިފާއީ ވުޒާރާ އިން ހާމަ ކޮށްފައި ނުވެ އެވެ. ނަމަވެސް، މި ހަމަލާ ތަކަކީ ފަހުގެ ތާރީޚެއްގައި އީރާން އިން އެމެރިކާގެ މަރުކަޒު ތަކަށް ދިން އެންމެ ވަރުގަދަ އެއް ހަމަލާ ކަމަށް މަސްރަހު ދިރާސާކުރާ ފަރާތް ތަކުން ބުނެ އެވެ.
މަސްދަރު: އަލް ޖަޒީރާ
