އީރާން އަށް ހަމަލާ ދިނުމަށް ފަހު އެމެރިކާ އިން ބުނީ ބޮޑެތި ގެއްލުން ތަކެއް ލިބޭނެ ކަމަށް

ހުރްމުޒް ކަނޑު އޮޅީގައި ވިޔަފާރީގެ ބޯޓު ތަކަށް އީރާން އިން ހަމަލާދިން ކަމަށް ބުނެ، އެމެރިކާގެ ސިފައިން ބުދަ ދުވަހުގެ ރޭ އީރާން އަށް ވަރުގަދަ ހަމަލާ ތަކެއް ދިނުމަށް ފަހު، އެކަމުގެ ސަބަބުން އީރާން އަށް ބޮޑެތި ގެއްލުން ތަކެއް ލިބިގެން ދާނެ ކަމަށް ބުނެފި އެވެ. 

އެމެރިކާގެ މެދު ތެރޭ ސަރަހައްދުގެ ކޮމާންޑް އިން ނެރުނު ބަޔާނެއްގައި ބުނީ، ބައިނަލްއަގުވާމީ ކަނޑު މަގު ތަކުގައި ދަތުރުކުރާ، އަދި އާންމު ރައްޔިތުން މަސައްކަތް ކުރާ ވިޔަފާރީގެ ބޯޓު ތަކަށް ހަމަލާ ދިނުމުގެ ސަބަބުން އީރާން އަށް ބޮޑެތި ގެއްލުން ތަކެއް ލިބޭނެ ކަމަށާއި، ވަރުގަދަ ހަމަލާ ތަކެއް ދިނުން ފަށާފައިވާ ކަމަށެވެ.

އެމެރިކާގެ ސެންޓްކޮމް އިން ވަނީ މި ބަޔާން ސޯޝަލް މީޑިއާގައި ވެސް ހިއްސާކޮށްފައި އެވެ. 

ފާއިތުވި ދުވަސް ތަކުގައި ހުރްމުޒް ކަނޑު އޮޅީގައި ދަތުރު ކުރަމުންދިޔަ ވިޔަފާރީގެ ތިން ބޯޓަކަށް އީރާން އިން ހަމަލާ ދީފައިވާ ކަމަށް އެމެރިކާގެ ސިފައިން ބުނެފައިވެ އެވެ. މި ހަމަލާ ތަކުގައި ޤަތަރުގެ އަދި ސައުދީ އަރަބިއްޔާގެ ބޯޓުތައް ހިމެނޭ ކަމަށް ވެސް ބުނެފައިވެ އެވެ.

އެމެރިކާގެ ސެންޓްކޮމް އިން ބުނެފައި ވަނީ އީރާން އިން ދައްކަމުން އަންނަ ދެކޮޅުވެރި ކަމާއި، އެ ޤައުމުގެ އަމަލު ތަކުގެ ސަބަބުން ހަނގުރާމަ މެދު ކަނޑާލުމަށް ވެފައިވާ އެއްބަސްވުމާ ފުށުއަރާ ކަމަށެވެ.

އީރާން އިން ހުރްމުޒް ކަނޑު އޮޅީގައި ހަމަލާދިން ކަމަށް ބުނެ އެމެރިކާ އިން އީރާން އަށް ހަމަލާ ދިނީ، އީރާންގެ ތެލުގެ ވިޔަފާރި ކުރުމަށް ދީފައިވާ ހާއްސަ ހުއްދަތައް އެމެރިކާ އިން ބާތިލު ކުރިތާ ގަޑިއިރު ތަކެއް ފަހުންނެވެ. އީރާން އިން ހުރްމުޒް ކަނޑު އޮޅީގައި ދިން ހަމަލާ ތަކަކީ، އެމެރިކާ އަށް ގަބޫލު ކުރެވޭ ކަމެއް ނޫން ކަމަށާއި އެކަމުގެ ނަތީޖާ ގޯސް ވާނެ ކަމަށް އެމެރިކާ އިން ބުނެފައިވެ އެވެ. 

މި ހަމަލާ ތަކަކީ ހުރްމުޒް ކަނޑު އޮޅި މެދުވެރިކޮށް ދަތުރުކުރާ ބައިނަލްއަގުވާމީ ވިޔަފާރީގެ ބޯޓު ތަކުގެ ސަލާމަތާ ގުޅޭ ގޮތުން ކުރިމަތި ވެފައިވާ ކަންބޮޑުވުންތައް އިތުރަށް ބޮޑު ވެގެންދާ ކަމެއް ކަމަށް ބައިނަލްއަޤުވާމީ ތަޖުރިާބާކާރުން ދެކެ އެވެ.