އެމެރިކާގެ ހުރިހާ ޝަރުތަކަށް އީރާން އިން އެއްބަސްވެއްޖެ: ޓްރަމްޕް

އެމެރިކާ އާއި އީރާންއާ ދެމެދު ދާއިމީ ސުލްޙައެއް ޤާއިމު ކުރުމަށް ކުރަމުން އަންނަ މަސައްކަތުގައި، އެމެރިކާ އިން ބޭނުންވާ ހުރިހާ ޝަރުތަކަށް އީރާން އިން އެއްބަސްވެފައިވާ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ. 

ބުރާސްފަތި ދުވަހު ސީއެންބީސީ އަށް މައުލޫމާތު ދެއްވަމުން ޓްރަމްޕް ވިދާޅުވީ، އެމެރިކާ އާއި އީރާންއާ ދެމެދު މަޝްވަރާތައް ކުރިއަށްދާ ކަމަށާއި، އީރާން އިން އެމެރިކާ ބޭނުންވާ ހުރިހާ ކަމަކަށް ވެސް އެއްބަސްވެއްޖެ ކަމަށެވެ. އަދި އީރާން އިން އަމިއްލަ އެކަން ޤަބޫލު ކުރާ ކަމަށް ވެސް ޓްރަމްޕް ވިދާޅުވި އެވެ. 

ޤަތަރުން ބުނެފައި ވަނީ، އެމެރިކާ އާއި އީރާންއާ ދެމެދު ކުރިއަށް ގެންދިޔަ ނުސީދާ މަޝްވަރާތައް ބުރާސްފަތި ދުވަހު ނިންމާލާފައިވާ ކަމަށެވެ. ޤަތަރުގެ ވެރި ރަށް ދޯހާގައި ކުރިއަށް ގެންދިޔަ މަޝްވަރާ ތަކުން އުންމީދު ލިބިފައިވާ ކަމަށާއި، ދެ ވަނަ ބުރުގެ މަޝްވަރާ ތަަކަށް ވެސް ދެ ޤައުމުން އެއްބަސްވެފައިވާ ކަމަށް ޤަތަރުން ވަނީ ހާމަ ކޮށްފައި އެވެ. 

 މި މަޝްވަރާ ތަކުގެ މަޤުސަދަކީ ދެ ޤައުމުގެ މެދުގައި މީގެ ކުރިން ހިނގި ހަނގުރާމަވެރި އަމަލުތަކާ ގުޅިގެން އުފެދިފައިވާ ނުތަނަވަސްކަން ކުޑަ ކުރުމާއި، މަޝްވަރާތައް ކުރިއަށް ގެންދިއުމެވެ.

މިދިޔަ ޖޫން މަހުގެ ތެރޭގައި އެމެރިކާ އާއި އީރާން އިން ވަނީ ފަހުމުނާމާއެއްގައި ސޮއި ކޮށްފައި އެވެ. ޕާކިސްތާން އާއި ޤަތަރު މެދުވެރި ވެގެން އެކުލަވާލި މި ފަހުމުނާމާގެ ދަށުން، ގިނަ ކަންތައްތަކެއް ހާސިލު ކުރަން ޖެހެ އެވެ. އެގޮތުން 60 ދުވަހުގެ ތެރޭގައި މަޝްވަރާތައް ކުރިއަށް ގެންގޮސް، ދާއިމީ ސުލްޙައެއް ހޯދުމަށް ދެ ޤައުމުން ވެސް މަސައްކަތް ކުރަން ޖެހެ އެވެ. 

ޖުމުލަ 14 ނުކުތާގެ މައްޗަށް ހިމެނޭ މި އެއްބަސްވުމުގައި ދާއިމީ ގޮތެއްގައި ހަނގުރާމަ ނިންމުމަށް ކުރާ މަޝްވަރާ ތަކުގެ ވަގުތު އަދި ތާވަލެއް ވެސް ވަނީ ކަނޑަ އަޅައިފަ އެވެ. މީގެ އިތުރުން ހުރްމުޒް ކަނޑި އޮޅި ބޭނުން ކުރުމުގެ އިންތިޒާމު ތަކާއި، އީރާންއާ ދެކޮޅަށް އަޅާފައިވާ ދަތި ކުރުމުގެ ފިޔަވަޅު ތަކުގެ މައްސަލަ ވެސް އޭގައި ހިމެނެ އެވެ.

މި މަޝްވަރާތަކުގެ ސަބަބުން ދެ ގައުމުގެ ދެމެދުގައި އޮތް ނުތަނަވަސްކަން ކުޑަވެ، ސުލްހަވެރި ގޮތެއްގައި މައްސަލަތައް ހައްލު ކުރެވޭނެ ކަމަށް އުންމީދު ކުރެވޭ ކަމަށް މެދުވެރިން ބުނެ އެވެ.