އެކުވެރި ޤައުމު ތަކަށް ހޮރްމުޒް އިން ލުއި ތަކެއް ލިބޭނެ ކަމަށް އީރާން އިން ބުނެފި
5 ޖުލައި 2026 | އާދީއްތަ 06:22މި އައު އިންތިޒާމު ތަކުގެ ދަށުން ކަނޑު އޮޅިން ދަތުރުކުރާ އުޅަނދު ފަހަރުގެ ސަލާމަތާއި ރައްކާތެރިކަން ކަށަވަރު ކުރުމާއި، އުޅަނދު ފަހަރު ދަތުރުކުރާ ގޮތް މޮނިޓާކޮށް ބެލެހެއްޓުމުގެ އިތުރުން، ގިނަ އަދަދެއްގެ އުޅަނދު ފަހަރު ދަތުރު ކުރުމުގެ ސަބަބުން ތިމާވެއްޓަށް ކުރާ ނޭދެވޭ އަސަރުތަކާ ދެކޮޅަށް މަސައްކަތް ކުރެވޭނެ ކަމަށް ސަފީރު ވިދާޅުވި
ޗައިނާގައި ހުންނަވާ އީރާންގެ ސަފީރު އަބްދުއްރިޒާ ރަހްމާނީ ފަޒްލީ. | ގެޓީ އިމޭޖަސް
ހުރްމުޒް ކަނޑު އޮޅިން ދަތުރުކުރާ އުޅަނދު ފަހަރުގެ އަތުން އައު ފީއެއް ނެގުމަށް އީރާން އިން ނިންމާފައިވާ ކަމަށާއި، ނަމަވެސް އީރާންއާ ގާތް ގުޅުމެއް ބާއްވާ ޤައުމު ތަކަށް އެ ފީ ނެގުމުގައި ހާއްސަ ލުއި ތަކެއް ދޭނެ ކަމަށް ޗައިނާގައި ހުންނަވާ އީރާންގެ ސަފީރު އަބްދުއްރިޒާ ރަހްމާނީ ފަޒްލީ ވިދާޅުވެއްޖެ އެވެ.
ޗައިނާގައި ކުރިއަށްދިޔަ ވޯލްޑް ޕީސް ފޯރަމްގައި ވާހަކަ ދައްކަވަމުން ސަފީރު ފަޒްލީ ހޮނިހިރު ދުވަހު ވިދާޅުވީ، ދުނިޔޭގެ އެންމެ މުހިންމު އެއް ކަނޑުގެ މަގު ކަމަށްވާ ހުރްމުޒް ކަނޑު އޮޅީގެ ކަންކަން އައު އުސޫލަކުން ތަރުތީބު ކުރުމަށް އޮމާން އާއެކު ގުޅިގެން މަސައްކަތް ކުރަމުންދާ ކަމަށެވެ. އަދި ހުރްމުޒް ކަނޑު އޮ ޅިއަކީ އީރާންގެ ކަނޑުގެ ސަރަހައްދުގެ ތެރޭގައި ހިމެނޭ ތަނަކަށް ވާތީ، އެ ސަރަހައްދުން ދޭ ޚިދުމަތް ތަކަށް ފީއެއް ނަގާނެ ކަމަށް އޭނާ ވިދާޅުވި އެވެ. ނަމަވެސް މިއީ "ޓޯލް" އެއް ނޫން ކަމަށް ސަފީރު ފާހަގަ ކުރެއްވި އެވެ.
މި އައު އިންތިޒާމު ތަކުގެ ދަށުން ކަނޑު އޮޅިން ދަތުރުކުރާ އުޅަނދު ފަހަރުގެ ސަލާމަތާއި ރައްކާތެރިކަން ކަށަވަރު ކުރުމާއި، އުޅަނދު ފަހަރު ދަތުރުކުރާ ގޮތް މޮނިޓާކޮށް ބެލެހެއްޓުމުގެ އިތުރުން، ގިނަ އަދަދެއްގެ އުޅަނދު ފަހަރު ދަތުރު ކުރުމުގެ ސަބަބުން ތިމާވެއްޓަށް ކުރާ ނޭދެވޭ އަސަރުތަކާ ދެކޮޅަށް މަސައްކަތް ކުރެވޭނެ ކަމަށް ސަފީރު ވިދާޅުވި އެވެ. މީގެ އިތުރުން، އީރާން އަށް ދަތި އުނދަގޫ ދުވަސްވަރު، އެ ޤައުމާ އެކު ސާބިތުކަމާ އެކު ތިބި އެކުވެރި ޤައުމު ތަކަށް މި ފީ ނެގުމުގައި ހާއްސަ އިނާޔަތް ތަކެއް ދޭނެ ކަމަށް ވެސް އޭނާ ވިދާޅުވި އެވެ.
އީރާން އާއި އެމެރިކާއާ ދެމެދު ހިނގި ހަނގުރާމަ ނިމުމަކަށް ގެނައުމަށް އެކުލަވާލި ފުރަތަމަ އެއްބަސްވުމުގައިވާ ގޮތުން، ވިޔަފާރި އުޅަނދު ފަހަރަށް 60 ދުވަހުގެ މުއްދަތަށް އެއްވެސް ފީ އަކާ ނުލައި ކަނޑު އޮޅިން ދަތުރު ކުރެވޭނެ އެވެ. ނަމަވެސް، އެ މުއްދަތު ހަމަވުމުން އަމަލު ކުރާނެ ގޮތެއް އަދި މުޅިން ސާފެއް ނުވެ އެވެ. އީރާން އިން ފީ ނަގަން ނިންމި ނިންމުމަށް އެމެރިކާ އިން ވަނީ ދެކޮޅު ހަދައިފަ އެވެ.
ދުނިޔޭގައި ބޭނުންކުރާ ސާފު ނުކުރާ ތެލާއި، ދިޔާ ކުރި ގޭހުގެ ފަސްބައިކުޅަ އެއްބައި އާންމުކޮށް އުފުލަނީ ހުރްމުޒް ކަނޑު އޮޅި މެދުވެރިކޮށެވެ. މެދު އިރުމަތީގެ ހަނގުރާމައިގެ ދުވަސްވަރު އީރާން އިން މި ސަރަހައްދު ބަންދު ކުރުމާ ގުޅިގެން ދުނިޔޭގެ ބާޒާރުގައި ހަކަތައިގެ އަގުތައް ވަރަށް ބޮޑަށް އުފުލިގެން ދިޔަ އެވެ.
ހަނގުރާމަ ހުއްޓާލުމަށް އެމެރިކާ އާއެކު ވީ އެއްބަސްވުމަށް ފަހު އީރާން އިން މިހާރު ވަނީ ކަނޑު އޮޅި ހުޅުވާލާފައި އެވެ. އަދި މި މައްސަލަ އަށް ދާއިމީ ހައްލެއް ހޯދުމަށް ދެ ޤައުމުގެ މެދުގައި މަޝްވަރާތައް މިހާރު ވެސް ދަނީ ކުރިއަށެވެ.
މަސްދަރު: އޭއެފްޕީ
