ޚާމަނާއީގެ ޖަނާޒާގެ ތެރެއިން އީރާނުގެ ވެރިންނަށް އަމާޒުކޮށް ދޭ އެންމެ ހަމަލާއަކުން އެ އެންމެން ނައްތާލެވިދާނެ: ޓްރަމްޕް
5 ޖުލައި 2026 | އާދީއްތަ 14:08އީރާނުގެ ކުރީގެ ރޫހާނީ މީޑަރުގެ ޖަނާޒާގައި އެ ގައުމުގެ ހުރިހާ އިސްވެރިން އެއްތަންވެފައި ތިބި ވަގުތު، އެންމެ ހަމަލާއަކުން އެ އެންމެން ނައްތާލުމުގެ ގާބިލުކަން އެމެރިކާއަށް ލިބިފައިވާ ކަމަށް ރައީސް ޑޮނަލްޑް ޓްރަމްޕް ވިދާޅުވެއްޖެ. ނަމަވެސް މަޝްވަރާގެ ފުރުސަތު ދިނުމުގެ ގޮތުން އެފަދަ ފިޔަވަޅެއް ނާޅާނެ ކަމަށް ޓްރަމްޕް ވިދާޅުވި. މި ޖަނާޒާގައި އެތައް މިލިއަން ބަޔަކު ބައިވެރިވެ އެމެރިކާއާ ދެކޮޅަށް އަޑުއުފުލަމުންދާއިރު، އީރާނުން އޮތީ އެމެރިކާއާއެކު އެއްބަސްވުމަކަށް އައުމަށް ބޭނުންވެފައި ކަމަށްވެސް އޭނާ ވިދާޅުވި.
އަވަހާރަކޮށްލާފައިވާ އީރާނުގެ އެންމެ މަތީ ލީޑަރުގެ ޖަނާޒާގެ ރަސްމިއްޔާތުތަކުގައި އެތައް މިލިއަން ބަޔަކު ބައިވެރިވާނެ ކަމަށް ބެލެވޭ | ގެޓީ އިމޭޖަސް
ޚާމަނާއީގެ ޖަނާޒާގެ ތެރެއިން އީރާނުގެ ވެރިންނަށް އަމާޒުކޮށް "އެންމެ ހަމަލާ" އެއް ދިން ނަމަވެސް އެ އެންމެން ނައްތާލެވިދާނެ ކަމުގެ އިންޒާރު ޑޮނަލްޑް ޓްރަމްޕް ދެއްވައިފި އެވެ.
އެމެރިކާގެ ރައީސް ޑޮނަލްޑް ޓްރަމްޕް އިންޒާރު ދެއްވާފައިވަނީ އާޔަތުﷲ އަލީ ޚާމަނާއީގެ ޖަނާޒާއަށް އެއްވެ ތިބި އީރާނުގެ އިސްވެރިންނަށް އަމާޒުކޮށް "އެއް ފަހަރު ބަޑިޖަހައިގެން" ނުވަތަ އެއް ހަމަލާއިން އެ އެންމެން ނައްތާލެވިދާނެ ކަމަށެވެ.
ރައީސް ޓްރަމްޕް މިހެން ވިދާޅުވެފައިވަނީ، އީރާނުގެ އާ ލީޑަރު މުޖުތަބާ ޖަނާޒާގެ ރަސްމިއްޔާތުގައި ސަލާމަތީ ސަބަބުތަކަށްޓަކައި ބައިވެރިވުން މަނާކޮށްފައިވާ ކަމުގެ ރިޕޯޓްތައް ފެންމަތިވެފައިވާ ދަނޑިވަޅެއްގަ އެވެ.
އީރާނުގެ ވެރިރަށް ތެހެރާނުގައި، ކުރިއަށްދާ ޖަނާގެ ރަސްމިއްޔާތު ވަރަށް ގާތުން ބައްލަވަމުން ގެންދަވާ ކަމަށް "އެކްސިއޯސް" އަށް ދެއްވި ބަސްދީގަތުމެއްގައި ޓްރަމްޕް ވިދާޅުވި އެވެ.
އަދި އީރާނުގެ ދީނީ އިލްމުވެރިންނާއި ވެރިންނަށް ޖަނާޒާގައި ބައިވެރިވުމުގެ ފުރުސަތު ދިނުމުގެ ގޮތުން، އެމެރިކާގެ ޓީމާއި އީރާނުގެ މަންދޫބުން މަޝްވަރާތައް މެދުކަނޑާލައި ހަފުތާއެއްގެ ޗުއްޓީއެއް ދީފައިވާ ކަމަށް ޓްރަމްޕް ތަފްސީލުކޮށްދެއްވި އެވެ.
ނަމަވެސް ޓްރަމްޕް ވިދާޅުވީ، "އެ އެންމެން ތިބީ އެތަނުގައި. އެންމެ ހަމަލާއަކުން [އެ އެންމެން ނައްތާލެވިދާނެ]، އެކަމަކު އަހަރެމެން އެކަމެއް ނުކުރާނަން. ސަބަބަކީ އެހެން ހަދައިފިނަމަ މަޝްވަރާ ކުރާނެ އެއްވެސް މީހަކު ބާކީ ނުވާނެތީ،" ކަމުގައެވެ.
އީރާނުން އޮތީ "އެއްބަސްވުމަކަށް އައުމަށް އެދި އާދޭސްކުރާ" ހާލަތެއްގައި ކަމަށް އެމެރިކާގެ ރައީސް ވިދާޅުވި އެވެ. އަދި ޖަނާޒާގެ ތެރެއިން އެ ގައުމުގެ ސަރުކާރަށް ތާއީދުކުރާ އެތައް މިލިއަން ބަޔަކު ފާޅުކުރަމުންދިޔަ އަސަރުގަދަ ޝުއޫރުތަކާ މެދު ހައިރާންވާ ކަމަށް ވެސް އޭނާ ފާހަގަކުރެއްވި އެވެ. އަވަހާރަވި އާޔަތުﷲ ގެ އަނިޔާވެރި ވެރިކަމުގެ ސަބަބުން ގިނަ އީރާނު ރައްޔިތުން އޭނާ ދެކެ ނަފްރަތު ކުރާނެ ކަމަށް ގަބޫލުކުރައްވާ ކަމަށް ވިދާޅުވަމުން ޓްރަމްޕް އިތުރަށް ވިދާޅުވީ، "ފަހަރުގައި އެއީ އަސްލު ކަރުނަނޫން ކަމަށް ވެދާނެ" ކަމަށެވެ.
މި ޖަނާޒާގައި 20 މިލިއަނާ ގާތްކުރާ އަދަދަކަށް އީރާނު ރައްޔިތުންނާއި، ސަރަހައްދީ ގައުމުތަކުގެ ވެރިންނާއި، އީރާނުގެ ދީނީ އިސްވެރިން ބައިވެރިވި ނަމަވެސް، އީރާނުގެ އެންމެ މަތީ ވެރިޔާ މުޖްތަބާ ރަސްމިއްޔާތުތަކުން ފެނިފައެއް ނުވެ އެވެ.
ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލުން ގުޅިގެން ދިން ވައިގެ ހަމަލާއެއްގައި ބައްޕާފުޅު އަވަހާރަވުމާ ގުޅިގެން، ލީޑަރުގެ މަގާމާ ހަވާލުވެވަޑައިގެންނެވި މުޖުތަބާ، ޖަނާޒާގައި ބައިވެރިވުން މަނާކޮށްފައިވާ ކަމަށް ބައެއް ރިޕޯޓްތައް ބުނެ އެވެ.
ޖަނާޒާގެ އެންމެ ފަހު ދުވަހު ބައްޕާފުޅުގެ މައްޗަށް ކަށުނަމާދު އަދާކުރުމުގެ ހުއްދައަށް އޭނާ އެދިވަޑައިގަތް ކަމަށްވެ އެވެ. ނަމަވެސް ސަލާމަތީ އޮފިޝަލުން އިންޒާރު ދިނީ އެކަމުގެ ނުރައްކާ އިންތިހާއަށް ބޮޑު ކަމަށާއި، ޖަނާޒާގެ ތެރެއިން އިސްރާއީލުން އާ ލީޑަރަށް އަމާޒުކޮށް ހަމަލާއެއް ނުދޭނެ ކަމުގެ އެއްވެސް ޔަގީން ކަމެއް ނެތް ކަމަށެވެ.
އިސްރާއީލުން އެތަނުގައި އޭނާއަށް ހަމަލާ ނުދިން ނަމަވެސް، އޭނާ ދިރިއުޅުއްވާ ތަން ދެނެގަތުމަށް އިސްރާއީލުން އޭނާގެ ފަހަތްޕުޅުން ފާރަލާނެ ކަމަށް އީރާނުގެ ރިވޮލިއުޝަނަރީ ގާޑްސްގެ މަސްދަރުތަކާ ހަވާލާދީ ނިއުޔޯކް ޓައިމްސް އިން ރިޕޯޓްކޮށްފައިވެ އެވެ.
މުޖުތަބާ މިހާރު ހުންނެވި ތަނެއް އެނގިފައި ނުވާއިރު، ބައްޕާފުޅު އަވަހާރަވި އެމެރިކާގެ ހަމަލާގައި އޭނާ ޒަޚަމްވެފައިވާ ކަމަށް ރިޕޯޓުތައް ބުނެ އެވެ.
މަގާމަށް އޭނާ އައްޔަންކުރި ފަހުން އާންމުންގެ ތެރެއިން ފެނިފައެއް ނުވެ އެވެ.
އީރާނު ސަރުކާރުގެ އިސްވެރިން "ގަރުނުގެ ޖަނާޒާ" ގެ ނަމުން ނަންދީފައިވާ މި ހަރަކާތުގައި އެތައް މިލިއަން ބަޔަކު ބައިވެރިވަމުން ގެންދާއިރު އީރާނުގެ ދިދަ ހޫރުވަމުން "އެމެރިކާ ހަލާކުވެދާށި!" (ޑެތު ޓު އެމެރިކާ) ފަދަ ޝުއޫރުތައް ފާޅުކޮށްފައިވެ އެވެ.
އަދި ރޮމުން ބައެއް މީހުން "އަހަރެމެންގެ ޝިއާރަކީ އެންމެ ބަހެއް: ބަދަލުހިފުން، ބަދަލުހިފުން" އަދި "އަހަރެމެންގެ އިމާމު ގަތުލުކުރި މީހާ އަހަރެމެން މަރާލާނަން" މިފަދައިން ގޮވަމުންދިޔަ އަޑު އިވެމުންދިޔަ އެވެ.
އެމެރިކާގެ ރައީސް ވިދާޅުވީ، "އަހަރެމެންނަކީ ހިތްހެޔޮ ބަޔަކަށް ވާތީ، ޖަނާޒާ ބޭއްވުމަށްޓަކައި އެމީހުންނަށް [އީރާނަށް] ހަފުތާއެއްގެ މުއްދަތު ދިނީ" ކަމަށެވެ.
