މެޑްވެޑޭވް: އީރާނަށް ދިން ހަމަލާއަކީ އެއްވެސް ސަބަބަކާ ނުލައި ދިން ހަމަލާއެއް

މި އަހަރުގެ ކުރީކޮޅު އެމެރިކާ އާއި އިސްރާއީލުން އީރާނަށް ދިން ހަމަލާއަކީ އެއްވެސް ސަބަބަކާ ނުލައި ދީފައިވާ ހަމަލާއެއް ކަމަށް ރަޝިޔާގެ ކުރީގެ ރައީސް ޑިމިޓްރީ މެޑްވެޑޭވް ވިދާޅުވެއްޖެ އެވެ. ރަޝިޔާގެ ސެކިއުރިޓީ ކައުންސިލްގެ ޑެޕިއުޓީ ޗެއާމަން މިހެން ވިދާޅުވީ އީރާނުގެ ކުރީގެ ރޫހާނީ ލީޑަރު، އާޔަތުﷲ އަލީ ޚާމަނާއީގެ ޖަނާޒާގައި ބައިވެރިވެވަޑައިގަތުމަށް ތެހެރާނަށް ކުރެއްވި ދަތުރުފުޅު ނިންމަވާލެއްވުމަށްފަހު އެނބުރި ގައުމަށް ވަޑައިގަންނަވަމުންނެވެ.

އުމުރުފުޅުން 86 އަހަރުގެ ޚާމަނާއީ އަވަހާރަކޮށްލާފައިވަނީ ފެބްރުއަރީ މަހުގެ 28 ވަނަ ދުވަހު އެމެރިކާ އާއި އިސްރާއީލުން އީރާނަށް ދިން ވައިގެ ހަމަލާތަކުގެ ފުރަތަމަ މަރުހަލާގަ އެވެ. މި ހަމަލާތަކުގައި އެމަނިކުފާނުގެ އާއިލާގެ ބައެއް މެންބަރުން ވެސް ވަނީ އަވަހާރަކޮށްލާފަ އެވެ.

ހޮނިހިރު ދުވަހު އެނބުރި ރަޝިޔާއަށް ވަޑައިގަންނަވަމުން ނޫސްވެރިންނާ ވާހަކަދައްކަވަމުން މެޑްވެޑޭވް ވިދާޅުވީ، އެމެރިކާއިން އެ ހަމަލާ ދޭންޖެހޭ އެއްވެސް ސީރިއަސް ސަބަބެއް ނެތް ކަމަށާއި، އީރާނުގެ ފަރާތުން އެމެރިކާއަށް އެއްވެސް ނުރައްކަލެއް އޮތް ކަމަށް ގަބޫލުނުކުރައްވާ ކަމަށެވެ.

ރަޝިޔާގެ މި އިސް އޮފިޝަލް ފާހަގަކުރެއްވި ގޮތުގައި، އެމެރިކާގެ ރައީސް ޑޮނަލްޑް ޓްރަމްޕް އެ ހަމަލާ ދިނުމަށް އަމުރުކުރެއްވި ދަނޑިވަޅަކީ އީރާނުން ވޮޝިންޓަނާއެކު މަޝްވަރާތަކެއް ކުރިއަށްގެންދިޔަ ވަގުތެކެވެ. މެޑްވެޑޭވް ވިދާޅުވި ގޮތުގައި މިކަމުން ދޭހަވަނީ ބައިނަލްއަގުވާމީ ގާނޫނުތަކުގެ ބާރު ކެނޑިފައިވާ މިންވަރެވެ. އީރާނުގެ ލީޑަޝިޕްގެ ބޭފުޅުންނާއި، ސްކޫލް ކުދިން ހިމެނޭހެން ގިނަ އަދަދެއްގެ އާންމު ރައްޔިތުން މަރާލުމަކީ އެފަދަ ނިންމުންތައް ނިންމި ފަރާތްތަކަށް ލިބޭނެ އެއްވެސް ޝަރަފެއް ނޫން ކަމަށް ވެސް އޭނާ ވިދާޅުވި އެވެ.

މީގެ އިތުރުން މެޑްވެޑޭވް ވިދާޅުވީ، ފެބްރުއަރީ މަހުގެ ފަހުކޮޅު ހަމަލާތައް ފެށުމުގެ ކުރިން، އީރާނުގެ ނިއުކްލިއާ ޕްރޮގްރާމާ ގުޅޭ މައްސަލަ ސުލްހަވެރިކަމާއެކު ހައްލުކުރުމަށް ރަޝިޔާގެ ރައީސް ލަޑީމިއަރ ޕޫޓިން "ރޯޑްމެޕް" އެއް ހުށަހެޅުއްވި ކަމަށެވެ. ނަމަވެސް އެމެރިކާ އާއި އިސްރާއީލުން އީރާނާ ދެކޮޅަށް އަސްކަރީ ފިޔަވަޅު އެޅުމަށް ދެއްކި އެއް ބަހަނާއަކީ އެ ގައުމުގެ ނިއުކްލިއާ ޕްރޮގްރާމެވެ.

"އަޅުގަނޑު ގަބޫލުކުރާ ގޮތުގައި އީރާނަށް މި ކުރިމަތިވި އުނދަގޫ އިމްތިހާނުން އަރައިގަތީ ވަރަށް ސާބިތުކަމާއެކު،" މެޑްވެޑޭވް ވިދާޅުވި އެވެ. އޭނާ އިތުރަށް ފާހަގަކުރެއްވި ގޮތުގައި ތެހެރާނުގެ ބައެއް ސަރަހައްދުތައް އަދިވެސް ސުންނާފަތިވެފައި އޮތް ނަމަވެސް، އެ ސިޓީގެ އާންމު ދިރިއުޅުން މިހާރު ވަނީ ގާތްގަނޑަކަށް އާންމު ހާލަތަކަށް ރުޖޫއަވެފަ އެވެ.

މެޑްވެޑޭވް ރަޝިޔާގެ ނޫސްވެރިންނަށް މައުލޫމާތު ދެއްވި ގޮތުގައި، މި ހަމަނުޖެހުންތަކުގެ ތެރޭގައި އީރާނަށް ވަނީ އެ ގައުމުގެ އަތުގައި ނިއުކްލިއާ ހަތިޔާރާ އެއްވަރުގެ ބާރުގަދަ ވަސީލަތެއް އޮތްކަން ވިސްނިފަ އެވެ. އެއީ ހުރްމުޒް ކަނޑުއޮޅި އެވެ. މި ހަމަނުޖެހުން ފެށުމުގެ ކުރިން ދުނިޔޭގެ ހަކަތައިގެ ޝިޕްމަންޓްތަކުގެ ފަސްބައިކުޅަ އެއްބައި ދަތުރުކުރަނީ އެ ކަނޑުއޮޅި މެދުވެރިކޮށެވެ. އީރާނުން އެ ސަރަހައްދު ބަންދުކުރުމާ ގުޅިގެން ދުނިޔޭގެ ބާޒާރުގައި ސާފުނުކުރާ ތެޔޮ ފީފާއެއްގެ އަގު 120 ޑޮލަރަށް ވުރެ މައްޗަށް އެރި އެވެ.

އަލުން އަނބުރާ އީރާނަށް ހަމަލާއެއް ދީފި ނަމަ، ބާބުލް މަންދަބް ކަނޑުއޮޅި ވެސް އީރާނަށް ބަންދުކުރެވިދާނެ ކަމަށް މެޑްވެޑޭވް ވިދާޅުވި އެވެ. ރަތް ކަނޑާއި އަދަން ކަނޑުއޮޅި ގުޅުވައިދޭ މި ސަރަހައްދަކީ މެދުއިރުމަތީގެ ތެޔޮ އެކްސްޕޯޓް ކުރުމުގައި ބޭނުންކުރާ ވަރަށް މުހިންމު މަގެކެވެ.

މޮސްކޯ އާއި ތެހެރާނާ ދެކޮޅަށް ހުޅަނގުގެ ގައުމުތަކުން އަޅާފައިވާ ދަތިކުރުމުގެ ފިޔަވަޅުތަކަށް އިޝާރާތް ކުރައްވަމުން ރަޝިޔާގެ ކުރީގެ ރައީސް ވިދާޅުވީ، އެއީ ބައިނަލްއަގުވާމީ ގާނޫނުތަކާ ޚިލާފަށް، އެއްފަރާތުން އަޅާފައިވާ ޣައިރު ގާނޫނީ ފިޔަވަޅުތަކެއް ކަމަށެވެ.