މިޞްރު އަތުން ލިބުނު މޮޅާ އެކު، ސްކަލޯނީގެ ލޮލުން އުފާވެރި ކަމުގެ ކަރުނަ!

ފީފާ ވޯލްޑް ކަޕްގެ ގަދަ 16 ގައި މިޞްރާ ދެކޮޅަށް ކުޅުނު މެޗުން އާޖެންޓީނާ އަށް ލިބުނު މޮޅާ އެކު، އޭނާގެ ލޮލުން އުފާާވެރި ކަމުގެ ކަރުނަ އައި ކަމަށް އާޖެންޓީނާގެ ކޯޗު ލިއޮނަލް ސްކަލޯނީ ބުނެފި އެވެ. 

މެޗުގެ ފަހު 11 މިނެޓަށް ދިޔައިރު ވެސް، އާޖެންޓީނާ އޮތީ ދެ ލަނޑުން ފަހަތުގައި އެވެ. ނަމަވެސް، ފަހަތުން އަރައި ތިން ލަނޑު ޖަހައިގެން މިޞްރު ކަޓުވާލައި އާޖެންޓީނާ އިން ވަނީ މުބާރާތުގެ ކުއާޓާ ފައިނަލްގެ ޖާގަ ހޯދައިފަ އެވެ. 

މެޗަށް ފަހު ނޫސްވެރިންނާ ވާހަކަ ދައްކަމުން ސްކަލޯނީ ބުނީ، އޭނާ އަކީ އަބަދު ވެސް ކަންކަމާ ވަރަށް އަސަރު ކުރާ މީހެއް ކަމަށާއި، ޑްރެސިން ރޫމުގެ ތެރޭގައި ވެސް އޭނާ އަށް ރޮވުނު ކަމަށެވެ. އަދި ޓީމުގެ ކުޅުންތެރިން ވެސް އޭނާއާ ދިމާ ކުރުމުގެ ގޮތުން އެ ވާހަކަ ދައްކާ ކަމަށް ސްކަލޯނީ ބުންޏެވެ. 

އެކަމާ ފަރުވާލެއް ނެތްކަން ފާހަގަކޮށް ސްކަލޯނީ ބުނީ، 20 އަހަރު ވަންދެން ފުޓުބޯޅަ ކުޅުނު މީހެއް ހައިސިއްޔަތުން މި ހުރިހާ ކަމެއް ތަހަންމަލު ކުރަން ޖެހޭނެކަން ޤަބޫލު ކުރެވޭ ކަމަށެވެ. އަދި ކޯޗެއްގެ ގޮތުގައި މަސައްކަތް ކުރުމަށް ލިބޭ އެންމެ ބޮޑު ހިތްވަރަކީ އެއީ ކަމަށް ވެސް ސްކަލޯނީ ވަނީ ބުނެފައި އެވެ.

މެޗުގެ ނަތީޖާއާ ގުޅޭ ގޮތުން ވާހަކަ ދައްކަމުން ސްކަލޯނީ ބުނީ، މިޞްރުން ދެ ލަނޑުގެ ލީޑުގައި އޮތްއިރު ވެސް މެޗު އަތުން ދޫވެގެން ދިޔަ ކަމަށް ޤަބޫލު ނުކުރާ ކަަމަށެވެ. އޭނާ ބުނީ މެޗުގެ ނަތީޖާ ކޮންމެ ގޮތަކަށް އޮތް ނަމަވެސް، އާޖެންޓީނާ އިން ދިޔައީ ރަނގަޅަށް ކުޅެ، ލިބެމުން ދިޔަ ފުރުސަތު ތަކުގެ ބޭނުން ކުރަން މަސައްކަތް ކުރަމުން ކަމަށެވެ. އެއާ އެކު އޭނާ ބުނީ ކޭޕް ވާޑްއާ ދެކޮޅަށް އިތުރު ވަގުތުގެ ދެ ހާފު ކުޅުނު މެޗަށް ވުރެ، މިޞްރު މެޗުގައި ކުރިއެރުން ތަކެއް ފެނިގެން ދިޔަ ކަމަށެވެ. 

ސްކަލޯނީ ބުނީ ކޭޕް ވާޑްއާ ދެކޮޅަށް ކުޅުނު އިރު ޓީމު އޮތީ ބޮޑު ނުރައްކަލެއްގެ ތެރޭގައި ކަމަށެވެ. ނަމަވެސް، މިޞްރާ ދެކޮޅަށް ކުޅުނުއިރު ދެ ލަނޑުން ބަލިވެފައި އޮތް ވަގުތު ވެސް، މެޗު އަނބުރާލެވޭނެ ކަމުގެ ފުރިހަމަ އިތުބާރު އޮތް ކަމަށް ސްކަލޯނީ ބުންޏެވެ. ސްކަލޯނީ ބުނީ އެ މެޗުގައި އާޖެންޓީނާގެ ފަރާތުން ފެނިގެން ދިޔައީ މުޅިން ތަފާތު މޮޅު ކުޅުމެއް ކަމަށެވެ. 

މުބާރާތުގެ ކުއާޓާ ފައިނަލް އިން އާޖެންޓީނާ ޖާގަ ހޯދިއިރު، ކުއާޓާ ފައިނަލްގައި ނިކުންނާނީ ސްވިޒަލެންޑްއާ ދެކޮޅަށެވެ.