ފަހަތުން އަރައި ތިން ލަނޑު ޖަހައިގެން މިޞްރު ކަޓުވާލައި، ޗެމްޕިއަން އާޖެންޓީނާ ކުއާޓާ ފައިނަލް އަށް

ފީފާ ވޯލްޑް ކަޕްގެ ގަދަ 16 ގައި މިޞްރާ ދެކޮޅަށް ކުޅުނު މެޗުން ފަހަތުން އަރައި މޮޅުވެ އެންމެ ފަހުގެ ޗެމްޕިއަން އާޖެންޓީނާ އިން މުބާރާތުގެ ކުއާޓާ ފައިނަލް އިން ޖާގަ ހޯދައިފި އެވެ.

އަންގާރަ ދުވަހުގެ ރޭ ކުޅުނު މެޗު އާޖެންޓީނާ އިން ކާމިޔާބު ކުރީ 3-2 އިންނެވެ. މެޗުގައި މިޞްރުން ދެ ލަނޑު ޖަހައިގެން ކުރި ހޯދާފައި ވަނިކޮށް، އާޖެންޓީނާ އިން ވަނީ ފަހަތުން އަރައި ތިން ލަނޑު ޖަހައިފަ އެވެ. 

މެޗު ފަށައިގެން އާޖެންޓީނާ އިން ރަނގަޅަށް ކުޅެމުން ދަނިކޮށް، މިޞްރުން ލަނޑު ޖަހައި ލީޑު ނެގި އެވެ. އެގޮތުން މެޗުގެ 14 ވަނަ މިނެޓުގައި މިޞްރަށް ލީޑު ނަގައިދިނީ ޔަސީމް އިބްރާހީމް އެވެ.

މެޗުގެ ނަތީޖާ ހަމަހަމަ ކުރަން އާޖެންޓީނާ އަށް ލިބުނު ފުރުސަތުގައި ކެޕްޓަން ލިއޮނަލް މެސީ ފޮނުވާލި ބޯޅަ މިޞްރުގެ ގޯލު ކީޕަރު ވަނީ މަތަ ކޮށްފައި އެވެ. 

މެޗުގެ ދެ ވަނަ ހާފުގައި މިޞްރުގެ މުސްތަފާ ޒަކީ ޢަބްދުލް ރައުފް ޖެހި ލަނޑު، ވީޑިއޯ އެސިސްޓެންޓް ރެފްރީ (ވީއޭއާރު) އިން ވަނީ ބަލައި ނުގަންނަން ނިންމައިފަ އެވެ. އޭގެ ފަހުން 67 ވަނަ މިނެޓުގައި އޭނާ ވަނީ މިޞްރުގެ ދެ ވަނަ ލަނޑު ޖަހައި ލީޑު ފުޅާ ކޮށްފައި އެވެ. 

މެޗުގެ 79 ވަނަ މިނެޓުގައި ކްރިސްޓިއަން ރޮމެރޫ ވަނީ އާޖެންޓީނާގެ ފުރަތަމަ ލަނޑު ޖަހައި އުންމީދު ހޯދައި ދީފައި އެވެ. އެއީ މެސީ ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. 

މެޗުގެ ފުރިހަމަ ވަގުތު ހަމަވާން ހަތް މިނެޓަށް ވެފައި ވަނިކޮށް އާޖެންޓީނާ އަށް ނަތީޖާ ހަމަހަމަ ކޮށްދިނީ މެސީ އެވެ. އޭގެ ފަހުން މެޗުގެ ފުރިހަމަ ވަގުތު ހަމަވރ އިތުރަށް ދެއްކި ވަގުތުގައި އާޖެންޓީނާގެ ތިން ވަނަ ލަނޑު ޖަހައި ކުރި ހޯދައިދިނީ އެންޒޯ ފެނާންޑޭސް އެވެ.