ވޯލްޑް ކަޕްގައި ފޭވަރިޓުންނެއް ނެތް، ބޮޑެތި ޓީމު ތަކަށް ގިނަ ގޮންޖެހުން ތަކެއް ކުރިމަތިވި: ސްކަލޯނީ

މިފަހަރުގެ ފީފާ ވޯލްޑް ކަޕްގައި ވަކި ޓީމެއް މޮޅުވާނެ ކަމަށް ބުނަން ދަތި ކަމަށާއި، ބޮޑެތި ޓީމު ތަކަށް މުބާރާތުގައި ގޮންޖެހުންތަކާ ކުރިމަތިލާން ޖެހިފައިވާ ކަމަށް އާޖެންޓީނާގެ ކޯޗު ލިއޮނަލް ސްކަލޯނީ ބުނެފި އެވެ.

އޭނާ މިހެން ބުނީ މުބާރާތުގެ ގަދަ 16 ގެ ބުރުގައި އަންގާރަ ދުވަހު މިސްރާ ދެކޮޅަށް އާޖެންޓީނާ ކުޅޭ މެޗުގެ ކުރިން ބޭއްވި ނޫސްވެރިންގެ ބައްދަލުވުމުގައި އެވެ.

މުބާރާތުގެ އެންމެ ފަހުގެ ޗެމްޕިއަން އާޖެންޓީނާ ގަދަ 16 އަށް ދަތުރު ކުރީ ގުރޫޕު ސްޓޭޖުގެ ތިން މެޗުން މޮޅު ވެގެންނެވެ. ނަމަވެސް، އެންމެ ފަހުން ކޭޕް ވާޑްއާ ދެކޮޅަށް ކުޅުނު މެޗުގައި އާޖެންޓީނާ އަށް ވަނީ ބޮޑު ސިހުމެއް ލިބިފައި އެވެ. އެ މެޗުން އާޖެންޓީނާ މޮޅުވެފައި ވަނީ 3-2 އިންނެވެ. 

ސްކަލޯނީ ބުނި ގޮތުގައި މިފަހަރުގެ ވޯލްޑް ކަޕް އަކީ ހުރިހާ ޓީމަކަށް ވެސް އުނދަގޫ މުބާރާތެކެވެ. ކުރީގެ މުބާރާތްތަކާ ހިލާފަށް، މިފަހަރު މުބާރާތް ފެށުނުއިރު ފޭވަރިޓުންގެ ގޮތުގައި ބެލެވުނު ޓީމު ތަކުން އުންމީދުކުރި ފެންވަރުގެ ކުޅުމެއް ނުދެއްކޭކަން އޭނާ ފާހަގަ ކުރި އެވެ.

މިގޮތުން، އެންމެ ފަހުގެ ރަނަރަޕް ފްރާންސް އިން ޕެރަގުއޭ ބަލިކުރީ ޕެނަލްޓީ އަކުން ކަމަށާއި، ސްޕެއިން މޮޅުވީ އިތުރު ވަގުތުގެ ލަނޑަކުން ކަމަށް އޭނާ ބުންޏެވެ. އަދި ބްރެޒިލް އާއި ޖަރުމަނު ފަދަ ބޮޑެތި ޓީމުތައް މިހާރު މުބާރާތުން ކަޓާފައިވާކަން ވެސް އޭނާ ހަނދާން ކޮށްދިނެވެ.

ކުޅުންތެރިންގެ ފެންވަރު ދަށްވާން ދިމާވި ސަބަބުތަކާ ގުޅޭ ގޮތުން ވާހަކަ ދައްކަމުން ސްކަލޯނީ ބުނީ، ގިނަ ކުޅުންތެރިން މުބާރާތަށް އައީ ގިނަ އަދަދެއްގެ މެޗުތައް ކުޅެ ވަރުބަލި ވެފައި ތިބެގެން ކަމަށެވެ. މީގެ އިތުރުން ދަތުރު ފަތުރުގެ ދަތިކަމާއި، ހޫނު މިނާއި، ދަނޑު ތަކުގެ ވިނަގަނޑުގެ ފެންވަރު ހުރި ގޮތުން ބޯޅަ ދައުރު ކުރުމަށް އުނދަގޫވާ ކަމަށް އޭނާ ބުންޏެވެ. މި ހުރިހާ ސަބަބުތަކާ ހުރެ، ޓީމު ތަކުގެ މޮޅުކަން ދެއްކުމަށް ހުރަސް ތަކެއް ކުރިމަތިވާ ކަމަށް އޭނާ ގަބޫލު ކުރެ އެވެ.

މި ހުރިހާ ގޮންޖެހުންތަކާ އެކު ވެސް، އާޖެންޓީނާގެ ކުޅުމާ މެދު ހިތްހަމަ ޖެހޭ ކަމަށް ސްކަލޯނީ ބުންޏެވެ. އޭނާ ބުނީ ހަތަރު މެޗުން މޮޅުވުމަކީ ހިތްހަމަ ޖެހުމެއް ކަމަށާއި، ނަމަވެސް އަދިވެސް ރަނގަޅު ކުރަން ޖެހޭ ކަންތައްތައް ހުރި ކަމަށެވެ. އަދި ކުޅުން ރަނގަޅު ނޫން ވަގުތު ތަކުގައި ވެސް، އާޖެންޓީނާގެ ކުޅުންތެރިންގެ ކިބައިގައި ހުންނަ ހިތްވަރާއި ރޫހުގެ ބޭނުން ކޮށްގެން މެޗުތައް ކާމިޔާބު ކުރަން އެނގޭ ކަމަށް އޭނާ ފާހަގަ ކުރި އެވެ.

ސްކަލޯނީގެ ވާހަކަ ނިންމާލަމުން ބުނީ، އެންމެ ފަހުން ކުޅުނު މެޗުގައި އާޖެންޓީނާގެ ކުޅުންތެރިންގެ ހިތްވަރު ނުދެއްކި ނަމަ، އެޓީމު މުބާރާތުން ކަޓާނެކަން ޔަގީންވާ ކަމަށެވެ. އެހެން ކަމުން ކުރިއަށް ހުރި މެޗު ތަކުގައި ވެސް އެ ރޫހުގައި ކުޅުން މުހިންމު ކަމަށް އޭނާ ބުންޏެވެ.